Свой слоўнічак
Кастрыца небагатая на разнастайныя моўныя формы. Наша гаворка бліжэйшая да беларускай літаратурнай мовы. Натуральна, што ёсьць пэўныя асаблівасьці. Так, замест таго каб казаць «зашпіліць», у нас кажуць «зашплікнуць» ці «паграбы» замест «лёхі». Аднак апошнім часам узьнікаюць і новыя словы. Ці старыя словы пачынаюць ужывацца ў новым значэньні, як «бадыльле» ці «драбы». Таму і прапаную чытачам «НН» зусім маленькі слоўнічак.
Акалелы — п’яны. Ты ўчора зусім акалелы быў.
Бадыка — недарэка. Ну як ты робіш, бадыка.
Бадыльле — ламачча, калі пра адну якую-небудзь пэўную рэч, то бадыліна.
Драбы — кепская машына, нічога ня вартая. Колькі твае драбы каштуюць?
Кіпцюрнуць — уцякаць. Ну ты ўчора й кіпцюрнуў!
Лягучка — аўтобус, маршрутка. Учора нешта халопеніцкая лягучка не праходзіла.
Тукнуць — шугануць. Пайду малых тукну.
Зьміцер Панкавец, Кастрыца (Барысаўшчына)