Baranavičy robiacca biełaruskim Šušanskim
Užo druhi palityčny lider budzie adbyvać pakarańnie ŭ Baranavičach. Budynak ź biełaj cehły tolki napałovu z kratami na voknach nie paśpieŭ jašče zabycca na namieśnika staršyni Partyi BNF, tahačasnaha redaktara hazety «Rabočy» Viktara Ivaškieviča.
Kamianica padzielena napałam. U adnoj častcy znachodzicca «chimija», u druhoj — zvyčajny rabočy internat.
Statkieviča pryvieźli na mašynie znajomyja. Napačatku jon pravioŭ šerah sustreč z čalcami svajoj partyi dy žurnalistami i tolki paśla nakiravaŭsia da papraŭčaj ustanovy adkrytaha typu №2.
Na hanku jaho ŭžo čakali dva dziasiatki žurnalistaŭ, partyjcaŭ i hramadzkich dziejačaŭ. Akramia baćki, Statkievič maje ŭ horadzie šmat svajakoŭ i paplečnikaŭ, tamu pačuvacca adzincom nia budzie.
Pavodle słoŭ palityka, jahonaje pieranakiravańnie ŭ Baranavičy źviazana z tym, što tut specsłužbam budzie lepš za im nazirać, da taho ž jany papraktykavalisia ŭžo tut na Ivaškieviču. Tamu prośba «adpravić» jaho bližej da stareńkaha baćki, vidać, pryjšłasia daspadoby naviersie.
Pavodle słoŭ Statkieviča-małodšaha, jahonaj žoncy «ŭ Kamitecie vykanańnia pakarańniaŭ skazali, što kali ja nia budu ŭdzielničać u palityčnym žyćci, to praz hod mianie mohuć adpuścić dadomu. Ale ad hramadzkaha žyćcia ja ŭchilacca nia budu».
Paśla paŭhadziny sustrečy da ludziej, što sabralisia na hanku, padyšli try milicyjanty i zapytali, što heta za niesankcyjanavany mitynh. Paśla, razabraŭšysia, nakiravalisia sa Statkievičam u budynak, jaki sama mieniej na hod zrabiŭsia jahonym domam.
Z paniadziełka jon pačaŭ šukać pracu. U pryvatnych ustanovach uładkavacca na pracu pakul nie dazvalajuć.