Babrujski ziefir i minski abutak sychodziać pad kantrol dziaržavy

Urad pastaviŭ zadaču da kanca sakavika atrymać kantrolnyja pakiety akcyj u minskim chołdynhu «Abutak-Łuč» i babrujskim «Čyrvonym charčaviku».

Epapieja ciahniecca ŭžo bolš za hod, i pośpiecham pakul nie skončyłasia. Zaraz ułady źbirajucca dziejničać bolš spraktykavana, kab nie davodzić situacyju da toj stupieni skandału, jaki prahrymieŭ na kandytarskich fabrykach «Kamunarka» i «Spartak».

«Łuč»

Kala miesiaca tamu schody akcyjanieraŭ abutkovych pradpryjemstvaŭ «Otyka» i «Sivielha», jakija ŭvachodziać u minski chołdynh «Abutak-Łuč», prahałasavali za pieradaču dziaržavie adpaviedna 10% i 5,55% akcyj, jakija znachodziacca na bałansie hetych pradpryjemstvaŭ. U kancy 2012 hoda pazačarhovy schod akcyjanieraŭ AAT «Łuč» — kiroŭnaja kampanija chołdynhu «Abutak-Łuč» pryniaŭ rašeńnie ab biazvypłatnaj pieradačy dziaržavie 5,45% akcyj ułasnaha vypusku, jakija znachodziacca ŭ jaho rasparadžeńni. Takim čynam, majučy pakiet u pamiery 21% akcyj, dziaržava robicca samym bujnym akcyjanieram minskaha abutkovaha chołdynhu. Zrešty, de-jure ŭhody jašče nie zavieršanyja. Sprava ŭ tym, što ŭžo bolš za hod akcyi «Łuča» znachodziacca pad maratoryjem.

Pa słovach minarytarnaha akcyjaniera «Łuča», «jość zahad kiraŭnictva ŭrada davieści dolu dziaržavy da kantrolnaj». «Kiraŭniki pradpryjemstvaŭ paddalisia na zapałochvańni i vyrašyli pieradać dziaržavie pakiety akcyj na biazvypłatnaj asnovie. Mabyć, im paabiacali, što pakinuć u kresłach», — skazaŭ jon.

Dziaržavie da niadaŭniaha času naležała 0,015% akcyj chołdynhu, jurydyčnym asobam — 26%, astatnija akcyi znachodzilisia va ŭłasnaści piersanału.

Pa słovach krynicy, znajomaj z raźvićciom situacyi, ciapier rychtujecca «rašeńnie ŭrada ab pieradačy akcyj dziaržavie». Hetym dakumientam płanujecca «vyzvalić pradpryjemstva ad vypłaty padatkaŭ pry pieradačy akcyj u dziaržułasnaść».

Raniej hetyja pakiety akcyj płanavałasia pradać stratehičnamu inviestaru z raźlikam na ŭkładańni ŭ raźvićcio chołdynhu. U pačatku minułaha hoda aktyŭna abmiarkoŭvałasia mahčymaść stvareńnia chołdynhu «Biełaruskaja harbarna-abutkovaja kampanija» na bazie minskaha chołdynhu «Abutak-Łuč» i biełaruska-rasijskaha pradpryjemstva «Biełviest». Adnak hety dakumient byŭ adpraŭleny na dapracoŭku. Nieŭzabavie akcyjaniery «Łuča» ŭchvalili prychod jašče adnaho inviestara — kitajskaj kampanii Foshan NanhaI Chengming Trade, asnoŭnaha pastaŭščyka syraviny na minskuju fabryku.

Pa słovach staršyni Biznes-sajuza pradprymalnikaŭ i najmalnikaŭ imia Kuniaŭskaha Hieorhija Badzieja, jaki ŭvachodzić ŭ skład naziralnaj rady chołdynhu «Abutak-Łuč», akcyjaniery spadziajucca na finansavuju padtrymku z boku dziaržavy ŭ suviazi ź pieradačaj akcyj. «Urad pastaviŭ zadaču pa vynasie vytvorčaści za miežy Minska i naroščvańni abjomaŭ u 2–3 razy. Inviestycyi patrebnyja na hetyja mety», — skazaŭ Badziej. Pry hetym jon adznačyŭ, što kali ŭ dziaržavy niama hrošaj dla hetaha, to «niachaj daść mahčymaść „Łuču“ pryciahvać taho inviestara, jakoha jon ličyć patrebnym».

U kancernie «Biellehpram» admovilisia padrabiazna abmiarkoŭvać hetuju temu, spasłaŭšysia na toje, što pravodzicca rabota pa vykanańni daručeńniaŭ kiraŭnika dziaržavy, dadzienych na naradzie pa raźvićci abutkovaj haliny ŭ kancy minułaha hoda. Kiraŭnictva krainy vykazała niezadavolenaść tym, što ajčynnyja abutniki zabiaśpiečvajuć unutrany rynak tolki na tracinu. Va ŭradzie ličać, što vyrašyć prablemu dapamoža stvareńnie ŭ halinie viertykalna intehravanych chołdynhaŭ — ad vytvorčaści skuranoj syraviny da vytvorčaści abutku. Ułady prapanavali stvaryć u halinie 3 chołdynhi — na bazie pradpryjemstvaŭ «Marka», «Biełviest» i «Łuč». «Liču, što treba pajści na hetyja chołdynhi. Tam, dzie my majem kantrolny pakiet, prymusić imiem revalucyi pajści ŭ chołdynh», — zajaviŭ pieršy vice-premjer Uładzimir Siamaška.

«Čyrvony charčavik»

Situacyja na babrujskim pradpryjemstvie «Čyrvony charčavik», u abjomach prodažaŭ jakoha kala 70% zajmaje ziefir, krychu inšaja.

Dniami Mahiloŭski abłvykankam pryniaŭ rašeńnie ab realizacyi svajho pieravažnaha prava na nabyćcio 1197 akcyj AAT «Čyrvony charčavik» na sumu 359 młn rubloŭ, paviedamlaje Biełaruskaja valutna-fondavaja birža. Rašeńnie ab kupli akcyj pryniataje na padstavie padadzienych u abłvykankam apaviaščeńniaŭ fizičnych asob — akcyjanieraŭ tavarystva ab namiery pradać svaje akcyi.

Staršynia naziralnaj rady pradpryjemstva Valancina Šarstniova admoviłasia paviedamić, jaki pakiet akcyj AAT «Čyrvony charčavik» naležyć dziaržavie ciapier, spasłaŭšysia na kamiercyjnuju tajamnicu. Pry hetym jana skazała, što «hetaja dola jašče mienšaja za 50%». Čakajecca, što ŭ chutkim časie dola dziaržavy budzie pavialičanaja da bolš za 50% za košt dadatkovaj emisii akcyj na sumu dziaržpadtrymki, akazanaj pradpryjemstvu ŭ 2012 hodzie. Pytańnie płanujecca razhledzieć na pazačarhovym schodzie akcyjanieraŭ 12 sakavika, paviedamiła krynica, znajomaja z raźvićciom padziej. Pavodle jaje słovaŭ, schod akcyjanieraŭ, jaki adbyŭsia dva tydni tamu, nie zaćvierdziŭ rašeńnia naziralnaj rady tavarystva ab pavieličeńni doli dziaržavy na sumu dziaržpadtrymki. Jano było adchilenaje pradstaŭnikami kampanii «Biełciažmaš», jakaja vałodaje błakavalnym pakietam akcyj, skazała krynica.

«Biełciažmaš» Ihara Aniščanki ŭžo piać hadoŭ sprabuje realizavać na pradpryjemstvie svaje inviestycyjnyja płany. Ale ŭsie inicyjatyvy błakujucca kiraŭnictvam kancerna «Biełdziaržcharčpram» i samoj fabryki. Akcyjaniery narakajuć na toje, što chočuć atrymlivać bolš prybytku, a «adziny šlach da hetaha — zrabić pradpryjemstva bolš prybytkovym, inviestavaŭšy ŭ jaho raźvićcio».

Z admienaj 1 studzienia 2011 h. maratoryja na rynku kaštoŭnych papier Aniščanka davioŭ da kantrolnaj dolu svaich kampanij u «Čyrvonym charčaviku». Adnak 14 sakavika 2011 h. byŭ padpisany ŭkaz prezidenta № 107, jaki daŭ pieravažnaje prava miascovym orhanam ułady na nabyćcio akcyj stratehičnych kampanij. Pryčym ukaz pačaŭ dziejničać zadniaj dataj — z 1 studzienia 2011. Haspadarčy sud Mahiloŭskaj vobłaści svaim rašeńniem chutka vyrašyŭ sprečku Aniščanki z uładami — jaho dola była zrezanaja da pieršapačatkovaj. Pryvatnym akcyjanieram była tolki vypłačanaja kampiensacyja zychodziačy z naminalnaj cany adnoj akcyi. Praz rezkija kursavyja roźnicy, jakija byli ŭ 2011 hodzie, svaje straty akcyjaniery acanili ŭ 500 tysiač dalaraŭ.

U «Biełciažmašy» karespandentu TUT.BY zajavili, što ŭ ciapierašni čas «pazicyi bakoŭ udakładniajucca». «Prachodziać pieramovy pa vykanańni daručeńniaŭ kiraŭnika dziaržavy», — skazaŭ načalnik słužby markietynhu «Biełciažmaš» Dźmitryj Aniščanka, admoviŭšysia ad padrabiaznych kamientaroŭ.

Pradstaŭnik «Čyrvonaha charčavika» śćviardžaje, što «jość rašeńnie Łukašenki pa daviadzieńni doli dziaržavy da kantrolnaha pakieta». «Jaho treba było vykanać jašče ŭ minułym hodzie. Ale, dumaju, my heta zrobim u najbližejšy čas», — adznačyŭ jon.

Pa słovach Šarstniovaj, «Čyrvony charčavik» — «heta prybytkovaje pradpryjemstva». Adnak jana admoviłasia nazvać dakładnyja ličby da zaćvierdžańnia ich hadavym schodam akcyjanieraŭ 29 sakavika. Mienavita da hetaj daty nieabchodna zrabić dziaržavu paŭnavartasnym uładalnikam babrujskaha pradpryjemstva.

Kamientary da artykuła