2,5 młn štrafu vypłacić minskaja firma za abjavu pra pošuk dziaŭčynki
Takoje rašeńnie było pryniata ŭ dačynieńni da kampanii, jakaja rekłamavała svaje pasłuhi abjavami ŭ vyhladzie aryjencirovak ab pošuku čałavieka. Historyja tady aburyła nie tolki zvyčajnych hramadzian, ale i pradstaŭnikoŭ Ministerstva handlu. Apošnija i padali pazoŭ na firmu ŭ sud.
Pra rašeńnie suda, jaki adbyŭsia ŭčora, nam raskazała pradstaŭnik dabraachvotnaha pošukovaha atradu «LizaAlert» Natalla Bortnik, jakaja vystupała tam u jakaści śviedki:
— Kampaniju abvinavačvali pa dvuch artykułach — parušeńnie zakanadaŭstva ab rekłamie i padmanie spažyŭcoŭ. Pradstaŭnik kampanii adrazu pryznaŭ vinu. U vyniku dali 2,5 miljona štrafu. Choć heta i nie šmat, ale vielmi važna, što ludziam pakazali: rabić takija ŭčynki niapravilna.Ludziej, jakija sapraŭdy šukajuć źnikłych, u nas mała. A voś takich «prykalistaŭ», na žal, šmat. Dobra, što dziaržaŭnyja ŭstanovy, u pryvatnaści Ministerstva handlu, nie pakinuli hetuju situacyju biez ŭvahi.
Nahadajem, 21 studzienia minčanin Anton dasłaŭ u Tut.by zdymak abjavy, jakuju ŭbačyŭ na aŭtobusnym prypynku ŭ rajonie Haradskoha vała na Niamizie. Ź pieršaha pohladu małady čałaviek pryniaŭ jaje za sapraŭdnuju aryjenciroŭku ab pošuku dziaŭčynki, ubačyŭšy standartnyja hrafy «prykmieta» i «była apranuta». Adnak na samoj spravie akazałasia, što nijakaja dziaŭčynka nie zhubiłasia, a takim čynam adna minskaja kampanija vyrašyła prarekłamavać svoj sajt. «Kreatyŭny» pijar vyklikaŭ asablivuju chvalu abureńnia siarod vałanciorskich atradaŭ, dla jakich pošuk ludziej — heta ciažkaja i štodzionnaja praca.