U hipiermarkiecie «Karona» kupcy ŭbačyli pacuka, toj achvotna paziravaŭ — fotafakt
Hihancki hryzun poŭzaŭ pa firancy ŭ paviljonie kampanii «Vełkom». U handlovym centry na Kalvaryjskaj admaŭlajucca kamientavać incydent.
«Pacuk nikoha nie bajaŭsia. Pa firancy załaziŭ navierch, potym spuskaŭsia,— piša na svajoj staroncy ŭ Fejsbuku minčuk Uładzimir Sośnin. Pakupnik paviedamlaje, što zrabiŭ fota ŭ 23.00. Na toj momant paviljon «Vełkom» nie pracavaŭ užo hadzinu.
«U jaho stolki ježy i taki vielizarny vybar delikatesaŭ... — iranizuje aŭtar fota. — My zaraz lažam spać, a jon pakliča ŭsiu svaju siamju i siabroŭ z Kalvaryjskaj. Voś ža bal zrobiać na śviežaj vypiečcy i hrudzinki palandvičnaj!».
Jak pacuk apynuŭsia ŭ handlovym centry, i što maje namier rabić administracyja hipiermarkieta — na žal, hetyja pytańni zastalisia biez adkazaŭ.Karespandent «Salidarnaści» źviazałasia z handlovym centram «Karona». Adznačym, što datelefanavacca ŭ infacentr i siektar pracy z klijentami było niaprosta: linija albo zaniataja, albo nichto nie biare słuchaŭku.
Supracoŭnica infacentra, pačuŭšy pra historyju z pacukom, paraiła patelefanavać jurystu HC «Karona». Razmova ź Irynaj Trubiła była karotkaj: «Ja nie dumaju, što chtości vam kamientuje hetuju infarmacyju, — zajaviła surazmoŭca. — Usiaho dobraha!»