Łukašenka štoviečar raskazvaje Mikałaju pra Stalina i Hitlera
Pra heta Łukašenka siońnia raspavioŭ rasijskim žurnalistam.
«Kožny viečar, kali mnie davodzicca kłaści małoha spać, jon mnie kaža: «Televizar nielha hladzieć, ty mnie raskazvaješ historyju».
Ja kažu: što, znoŭ pra vajnu? Kola, u mianie ŭžo niama hetych historyj. Štoviečar pra vajnu: pra Stalina, Hitlera, jak jany płanavali hetu apieracyju.
Chłopčyk u trecim kłasie, a my pra vajnu dy pra vajnu ceły dzień», — raspavioŭ Łukašenka epizod sa svajho siamiejnaha žyćcia.
Kali historyi pra Vialikuju Ajčynnuju vajnu zakončylisia, Łukašenka staŭ raskazvać małodšamu synu pra bitvy z Napaleonam u 1812 hodzie. «Čarciažy jamu zrabiŭ, kab jon razumieŭ, dzie revalucyja była ŭ 1917 hodzie, što da revalucyi Napaleon išoŭ u Maskvu, a potym — Baradzinskaja bitva, jak jany nazad adstupali», — zaznačyŭ jon.
Pavodle słoŭ Łukašenki, jaho synu ŭžo nie treba tłumačyć, što «była vajna» i «fašysty nam nanieśli vialiki ŭron».
Razam z tym Kola Łukašenka addaje pieravahu prahladu tematyčnych pieradač na rasijskim patryjatyčnym telekanale «Źviazda».
«Jon hladzić vajennyja prahramy, jak bandytaŭ, zabojcaŭ łavili ŭ savieckija časy», — raskazaŭ Alaksandr Łukašenka.
«Heta pavinna być normaj u našych siemjach, tamu što taja dobraja, cudoŭnaja moładź, jakaja prychodzić, — inšaja. Jany hetym nie žyvuć, čym žyli my ŭ savieckija časy, heta vielmi niebiaśpiečna», — miarkuje jon.