Łukašenka: Jeŭrazijski sajuz i ES stanuć roŭnavialikimi partniorami
dapoŭniena
U najbližejšaj pierśpiektyvie Jeŭrazijski ekanamičny sajuz (JEES) i Jeŭrasajuz stanuć prykładna roŭnavialikimi partniorami, zajaviŭ Alaksandr Łukašenka 21 kastryčnika na sustrečy z kiraŭnikami niekatorych ŚMI krain SND.
Pavodle jaho słoŭ, udzielniki Mytnaha sajuza — Biełaruś, Rasija i Kazachstan — uščylnuju nablizilisia da novaha etapu intehracyi, Jeŭrazijskaha ekanamičnaha sajuza. «Z ulikam imknieńnia šerahu inšych krain da ŭdziełu ŭ hetym prajekcie na šachmatnaj došcy hieapalityki ŭ samy blizki čas Jeŭrazijski ekanamičny sajuz i Jeŭrapiejski sajuz stanuć prykładna roŭnavialikimi partniorami. Ich intaresy treba budzie zbałansavać. Heta i jość žyvy prykład taho, što ideja intehracyi intehracyj absalutna realnaja», — cytuje Łukašenku dziaržaŭnaje ahienctva BiełTA.
Biełaruski kiraŭnik pierakanany, što pieramovy z adzinaj Jeŭropaj z boku JEES buduć bolš efiektyŭnymi.
«Kali my budziem vieści pieramovy z adzinaj Jeŭropaj (naprykład) razam, heta daść značna bolšy efiekt, čym sieparatnyja pieramovy asobnych krain — udzielnic SND, jakija časta prachodziać na źnievažalnych dla ich umovach. Bo razam my — siła, ź jakoj buduć ličycca», — skazaŭ Alaksandr Łukašenka.
Jon taksama pierakanany ŭ nieabchodnaści zachoŭvać i raźvivać Sadružnaść Niezaležnych Dziaržaŭ jak adzinuju placoŭku dla dyjałohu i vypracoŭki sumiesnych rašeńniaŭ.
«Časam zadajuć pytańnie: a ci byŭ i ci zastajecca ciapier sens u isnavańni SND?
Pry hetym časta ŭkazvajuć na toje, što mnohija krainy ŭžo aryjentujucca na roznyja centry siły. Rasija, Kazachstan i Biełaruś budujuć Jeŭrazijski ekanamičny sajuz. Ukraina, Małdova, zbolšaha Armienija sprabujuć pašyryć suviazi ź ES. U Centralnaj Azii chutkimi tempami raście pryciahnieńnie Kitaja», — adznačyŭ Łukašenka.
«Vykažu dumku, jakaja kamuści moža zdacca paradaksalnaj: toj fakt, što krainy Sadružnaści pravodziać roznuju palityku, nie tolki nie asłablaje, ale, naadvarot, uzmacniaje patrebnaść u niejkim ściahvajučym miechaniźmie, značnym elemientam jakoha źjaŭlajecca ahulnaja placoŭka dla dyjałohu», — padkreśliŭ biełaruski kiraŭnik.
Na jaho dumku, nieabchodna zachoŭvać SND jak placoŭku dla pryniaćcia peŭnych rašeńniaŭ.
«Kali my ŭ vuzkich kołach abmiarkoŭvajem hetuju prablemu, pačynajem vielmi rezka nakatvać na SND, na nieefiektyŭnaść jaho funkcyjanavańnia, až da taho, što cikavaści niama. Ja zaŭsiody kažu: nie śpiašajciesia, bo jana nam niadoraha kaštuje siońnia. Raspuścić, razahnać, razyścisia — praściej, a voś potym sabracca razam budzie vielmi składana», — skazaŭ Łukašenka.
Jon ličyć całkam naturalnym, kali niekatoryja z krain Sadružnaści «šukajuć ščaścia dzieści za morami», ale heta nie aznačaje, što treba admovicca ad SND: «Kali ciapier nam raspuścić, razahnać Sadružnaść, jakaja isnuje jak placoŭka dla sustreč, pieramoŭ, vypracoŭki rašeńniaŭ, što budzie tady, kali mnohija z nas, pašukaŭšy ščaścia za morami-akijanami, zachočuć iznoŭ viarnucca razmaŭlać na ahulnyja temy».
Alaksandr Łukašenka taksama adznačyŭ, što paśla raspadu SSSR nie było inšaj histaryčnaj alternatyvy, akramia jak stvaryć novaje abjadnańnie.
«Saviecki Sajuz byŭ vialikaj dziaržavaj, kałasalnaj hieapalityčnaj siłaj, jakaja niepasredna ŭpłyvała na los śvietu. Takaja dziaržava, viadoma, nie mahła zhinuć biasśledna: zanadta mahutnym było pryciahnieńnie ekanamičnych, kulturnych, duchoŭnych suviaziaŭ, što skłalisia ŭ SSSR. Tamu pierachod u novaje ŭtvareńnie — SND — staŭ absalutna naturalnym i histaryčna nieabchodnym», — pierakanany biełaruski kiraŭnik.
Pry hetym jon padkreśliŭ, što ŭ intehracyjnych pracesach nie treba ŭvieś čas ahladacca na Jeŭrasajuz.
«Treba navučycca bolš canić toje, što ŭžo daŭno jość u nas samich. Bo Jeŭropa šmat u čym pakul tolki idzie da abjadnańnia, i ŭ hetym pamknieńni joj jašče vielmi šmat treba pieraadoleć. U našych ža krain jość kałasalny histaryčny vopyt sumiesnaha žyćcia», — zaŭvažyŭ Alaksandr Łukašenka.
Pavodle jaho słoŭ, u adroźnieńnie ad ES, dziaržavy jakoha nie mieli vopytu žyćcia ŭ adzinym abjadnańni, krainy SND takoj vopyt majuć, i ŭ hetym — ich pieravaha.
«Z savieckich časoŭ nas źviazvaje ahulnaja kryvianosnaja sistema ekanomiki — adzinyja enierhietyčnaja i trubapravodnaja sietki, aŭtamabilnyja darohi i čyhunki, suviaź (praŭda, karystacca hetym na karyść usich krain SND my jašče nie navučylisia). I našy vytvorča-kaapieracyjnyja suviazi pa-raniejšamu dla šmatlikich pradpryjemstvaŭ zastajucca biezalternatyŭnymi, zabiaśpiečvajuć pracoŭnymi miescami miljony ludziej», — cytuje Łukašenku BiełTA. U jakaści prykładu jon pryvioŭ toj fakt, što pradpryjemstvy Biełarusi dajuć pracu prykładna siami miljonam žycharoŭ Rasii.
Akramia taho, dadaŭ biełaruski kiraŭnik, pamiž narodami SND niama niepieraadolnych psichałahičnych barjeraŭ. «Niezdarma naša intehracyjnaje ŭtvareńnie zaviecca Sadružnaściu: usich jaje členaŭ abjadnoŭvaje ahulnaja histaryčnaja historyja, adzinyja standarty adukacyi, bahataja savieckaja kultura i vialikaja ruskaja mova», — skazaŭ jon.
Alaksandr Łukašenka zaklikaŭ kiraŭnikoŭ ŚMI krain SND, jakija, pavodle jaho słoŭ, stvarajuć hramadskuju dumku i časta ŭpłyvajuć na chod historyi, pravieści sustreču ŭ farmacie adkrytaj hutarki biez zakrytych i zabaronienych tem.
«Dla mianie vielmi važnyja vašy dumki pra toje, jakim bačycca budučaja SND i što my — palityki i žurnalisty — možam razam zrabić dla našych narodaŭ», — skazaŭ Łukašenka. «Adrazu ahavarusia, — dadaŭ jon, — ja nie pretenduju na viedańnie absalutnaj praŭdy. Viadomy ruski kłasik mudra zaŭvažyŭ kaliści: vialikaje bačycca na adlehłaści. Zusim mahčyma, pavinna prajści jašče niamała času, kab i ludzi, i palityki, i historyki dali dakładnyja i spraviadlivyja acenki Sadružnaści».
Sustreča Alaksandra Łukašenki z kiraŭnikami niekatorych ŚMI krain SND prachodzić napiaredadni pasiadžeńnia Savieta kiraŭnikoŭ dziaržaŭ Sadružnaści, jakoje adbudziecca 25 kastryčnika ŭ Minsku. U pramym tele- i radyjoefiry sustreča nie tranślujecca. Televiersija mierapryjemstva budzie pakazanaja ŭ viačernim efiry telekanałaŭ «Biełaruś 1» i «Biełaruś 24».