U ZŠA ŭsypili alenia, jaki prasłaviŭsia na YouTube
Supracoŭniki nacyjanalnaha parku Hrejt-Smoki-Mauncins (štaty Paŭnočnaja Karalina i Tenesi) pryniali rašeńnie ŭsypić maładoha alenia, jaki niadaŭna staŭ zorkaj YouTube.
Aleń skaryŭ sercy internet-karystalnikaŭ svajoj tavaryskaściu — ułasna, hetaja rysa charaktaru i stała dla žyvioliny fatalnaj, paviedamlaje WBIR-TV.
Pa słovach pradstaŭnikoŭ parku, usypić žyviołu vyrašyli z-za taho, što jana ŭvieś čas vychodziła da ludziej. Zaołahi tak i nie zmahli pryvučyć alenia bajacca ludziej i trymacca ad ich dalej.
U apošni čas cikaŭny źvier usio čaściej vychodziŭ da cyvilizacyi ŭ pošukach ježy, zajavili śpiecyjalisty. Žyviolinu ŭsypili ŭ kancy minułaha tydnia. Pry hetym u Hrejt-Smoki-Mauncins pryznalisia, što zabivać alenia im było vielmi škada.
Žyviolina atrymała šyrokuju viadomaść paśla taho, jak u Siecivie źjaviŭsia videazapis jaje znajomstva z fatohrafam Džejmsam Jorkam.
Aleń padyšoŭ da mužčyny, jaki, fatahrafujučy, siadzieŭ na ŭzbočynie darohi, i pačaŭ jaho badać. Pry hetym rahami aleń mužčynu amal nie čaplaŭ, ruchi byli dastatkova akuratnyja, tak što badańnie bolš nahadvała siabroŭskaje pryvitańnie, čym ataku dzikaha źviera.
Pry prahladzie stvarajecca ŭražańnie, što aleń prosta choča pahulać z fatohrafam. Rolik z udziełam alenia chutka nabraŭ bolš za miljon prahladaŭ.
Kamientujuču navinu ab ŭsypleńni žyvioliny, Džejms Jork zajaviŭ, što nie razumieje, čamu supracoŭniki parku nie znajšli inšaha vyjścia.
«Niaŭžo niama nikoha, chto b moh uziać jaho da siabie? Niaŭžo niama zaaparka? Niaŭžo nie było nijakaha žadańnia vyratavać heta alenia?» — ździŭlajecca fatohraf.
«Nichto nie paciarpieŭ, usim było viesieła. A ciapier jasna, što incydent z maim udziełam paspryjaŭ pryniaćciu rašeńnia. Ja padaŭleny i mnie vielmi chaciełasia b usio źmianić», — zajaviŭ Jork.