Rasija pašyraje krymski scenar na Danieck, Charkaŭ, Adesu: usiudy šturmy pad rasijskimi ściahami
abnaŭlajecca, dapaŭniajecca
U Daniecku ŭdzielniki prarasijskaha mitynhu pasprabavali ŭziać šturmam administracyju vobłaści. Jak paviedamlaje partał zadonbass.org, paśla taho, jak aktyvistam nie ŭdałosia ŭvajści ŭnutr budynka, jany spuścili ŭkrainski ściah i ŭźniali na jaho miesca rasijski.
U zachopie ŭdzielničali ludzi sa ściahami Rasii, udakładniaje partał.
Pierad hetym u centry Daniecka prajšli dva šmatlikija mitynhi. Na adnym, na płoščy Lenina, sabrałasia niekalki tysiač čałaviek. Pratestoŭcy zapatrabavali ad rehijanalnych uładaŭ admovicca ad padparadkavańnia Kijevu. Taksama jany vybrali kamandzira «Narodnaha apałčeńnia Danbasa» Paŭła Hubarava novym hubiernataram.
Adnačasova z hetym pierad budynkam abłasnoj administracyi prajšła akcyja kolkaściu ŭ piać tysiač čałaviek, udzielniki jakoj zajavili ab padtrymcy bajcoŭ «Bierkuta».
Taksama na hetym mitynhu trymali płakaty «Vietierany afhancy za niedielimuju Ukrainu», «Russkij jazyk – naš rodnoj jazyk». «Donbass «za» stabilnosť i poriadok», «Afhancy Donbassa protiv vojny», «My za hubiernatora Donieckoj obłasti», «V Rośsii naši braťja, v Jevropie my raby» i druhija.
Mitynh suprać novych uładaŭ Ukrainy taksama prajšli ŭ Mikałajevie i Charkavie. Niekalki tysiač žycharoŭ Mikałajeva vystupili za fiederalizacyju ŭschodnich i paŭdniovych rehijonaŭ krainy.
U Charkavie, pa dadzienych «Interfaks-Ukraina», udzielniki mitynhu suprać novych uładaŭ ŭstupili ŭ supraćstajańnie z prychilnikami Majdanu. Jak adznačaje ahienctva, udzielniki sutyknieńnia kidajuć adzin u adnaho pałki, bjucca, palivajuć vadoj z šłanha.
Mitynhoŭcy ŭziali šturmam abłasnuju dziaržaŭnuju administracyju. Nad joj padniaty rasijski fłah.
U budynku Abłasnoj dziaržadministracyi i ŭ dvary čuvać streły. Jość paciarpiełyja.
Rasijskija ściahi ŭźniatyja i nad Łuhanskaj abłasnoj administracyjaj.
Prarasijski mitynh z udziełam 5000 čałaviek adbyŭsia taksama ŭ Adesie.
Nahadajem, što ŭ minułyja dni dla ŭdziełu ŭ hetych akcyjach pad vyhladam turystaŭ na ŭschod Ukrainy pryjechali sotni maładych ludziej z Rasii. Ale hałoŭnaja rola ŭ «mitynhach» advodzicca miascovym prarasijskim arhanizacyjam, takim jak «Apłot», «Dazor», «Ruskaje adzinstva», što finansujucca z Maskvy.
Nahadajem, što ŭ Sievastopali taki scenar byŭ realizavany 24—25 lutaha. Mienavita tam byli vysadžany padraździaleńni rasijskaj marskoj piachoty i desantu, što razam z čaściami Čarnamorskaha fłota za 26—28 lutaha ŭziali pad kantrol Krym.
U Simfieropali miascovyja tatary i ŭkraincy sarvali scenar zachopu budynkaŭ z dapamohaj «masavaha mitynhu», bo sabrali ŭ piać razoŭ bolš demanstrantaŭ na płoščy. Tady parłamient i ŭrad byŭ zachopleny ŭnačy ŭzbrojenymi ludźmi ŭ rasijskaj formie, z rasijskim uzbrajeńniem, ale biez apaznavalnych znakaŭ.
Byŭ pryznačany novy «ŭrad aŭtanomii».
Praź dzień uzbrojenyja ludzi biez apaznavalnych znakaŭ zaniali aeraporty. A jašče praź dzień kiraŭnik «urada aŭtanomii» zaprasiŭ Rasiju dapamahčy ŭ «padtrymańni miru».
Ciapier adbyvajecca masavaja pierakidka vojskaŭ i vajennaj techniki ŭ Krym.
Raźvićcio padziej u Krymie nahadvaje situacyju vakoł Sudietaŭ u 1938 hoda, kali Hitler uvioŭ vojski ŭ Čechasłavakiju dziela abarony hramadzian niamieckaj nacyjanalnaści i pry ich padtrymcy.