Hajdukievič-małodšy: Zaklikać da zabarony razdačy hieorhijeŭskaj stužki mohuć tolki idyjoty
Zaklikać da zabarony razdačy hieorhijeŭskaj stužki «mohuć tolki idyjoty», zajaviŭ pieršy namieśnik staršyni Libieralna-demakratyčnaj partyi Aleh Hajdukievič 6 maja na pres-kanfierencyi ŭ Minsku.
Nahadajem, 4 maja ruch «Za Svabodu» vystupiŭ z zaklikam da ŭładaŭ zabaranić razdaču i vykarystańnie ŭ hramadskich miescach hieorhijeŭskich stužak. «Čorna-aranžavaja simvolika ŭsio mienš i mienš asacyirujecca z Dniom Pieramohi nad nacyzmam i fašyzmam. Jana ŭsio bolš stanovicca simvałam rasijskaha impieryjalizmu. Paśla apošnich padziej va Ukrainie jana adnaznačna maje novy admoŭny sens jak prasłaŭleńnie sieparatyzmu i vajennaj ahresii», — havorycca ŭ zajavie «Za Svabodu».
Aktyvisty ruchu zaklikali biełarusaŭ «admaŭlacca ad vykarystańnia hetych stužak u znak salidarnaści z Ukrainaj i pratestu suprać vajennaj ahresii», prapanavali «śviatkavać hadavinu pieramohi ŭ Druhoj suśvietnaj vajny ź inšymi, u tym liku nacyjanalnymi, simvałami».
Hajdukievič nie bačyć u razdačy i našeńni hieorhijeŭskich stužak palityki.
«My ŭžo nie pieršy hod razdajem stužki. Tut niama palityki. Čamu mienavita hieorhijeŭskija stužki? Tak skłałasia histaryčna, tut navat nie važna, jak jany nazyvajucca», — ličyć jon. Hajdukievič adznačyŭ, što z pavahaj stavicca da bieł-čyrvona-biełaha ściaha. «Ale ž i jaho vykarystoŭvali ŭ nie samych lepšych metach. Taksama i ŭ hieorhijeŭskaj stužcy možna znajści štości kiepskaje. Ale dla bolšaści biełarusaŭ heta simvał pieramohi ŭ Vialikaj Ajčynnaj vajnie», — padkreśliŭ jon.
Pavodle słoŭ Hajdukieviča, padziei va Ukrainie «tut ni pry čym». Jon paviedamiŭ, što za siońnia aktyvisty partyi razdali na vulicy niekalki tysiač stužak, pryčym nivodzin čałaviek nie admoviŭsia jaje ŭziać.
Hajdukievič taksama paabiacaŭ pryjści sa svaimi prychilnikami z hieorhijeŭskimi stužkami na kanhres demakratyčnych sił.
«Niachaj pasprabujuć nas nie puścić. Niama ŭ ich takich sił», — zajaviŭ jon.