Aktyvist Juryj Rubcoŭ «znajšoŭsia»: jon zatrymany ŭ Homieli i znachodzicca ŭ IČU
Homielski aktyvist Juryj Rubcoŭ paśla adbyćcia aryštu ŭ Minsku zatrymany pa viartańni dadomu ŭ Homieli i znachodzicca ŭ IČU.
21 maja termin jaho aryštu skončyŭsia. Staličnyja milicyjaniery nie vypuścili jaho z budynka centra izalacyi pravaparušalnikaŭ, dzie Rubcoŭ adbyvaŭ pakarańnie, a advieźli na čyhunačny vakzał i tam vyzvalili. Jak paviedamiła BiełaPAN žonka Rubcova, 21 maja ŭ 22.30 muž patelefanavaŭ joj i skazaŭ, što vyjazdžaje ŭ Homiel na ciahniku. Ale ranicaj dadomu nie pryjšoŭ, i nijakich źviestak ad jaho nie było. 23 maja vyśvietliłasia, što Rubcoŭ znachodzicca ŭ homielskim IČU. U izalatary BiełaPAN paviedamili, što žychar Homiela znachodzicca ŭ ich za ŭčynieńnie niejkaha administracyjnaha pravaparušeńnia, ale admovilisia rastłumačyć, jakoha mienavita.
Nahadajem, u Minsku Rubcoŭ adbyvaŭ 25-sutačny aryšt.
Jon byŭ zatrymany milicyjaj paśla tradycyjnaj masavaj akcyi apazicyi «Čarnobylski šlach» 26 krasavika. Na šeści Rubcoŭ prysutničaŭ u futbołcy z nadpisami «Łukašenka, sychodź!» i «Aryštujcie mianie! Padstava? Ja suprać Łukašenki!».
28 krasavika sudździa suda Savieckaha rajona Minska Kirył Pałulech pryznaŭ hamialčanina vinavatym u «niepadparadkavańni zakonnym patrabavańniam słužbovaj asoby», «drobnym chulihanstvie» i pakaraŭ aryštam. Varta zaznačyć, što ŭ sud milicyja pryviezła aktyvista biez futbołki, hołym da pojasa. Futbołku ŭ Rubcova kanfiskavali.