Andrej Hieraščanka: «Biełarusy – nie ruskija» – heta antynacyjanalny pasył, a miežy Rasii buduć pašyracca
Adyjozny dziejač ruskaha ruchu ź Viciebska Andrej Hieraščanka daŭ vialikaje intervju sajtu imperiya.by.
Kiraŭnik Kaardynacyjnaj rady ruskich suajčyńnikaŭ Biełarusi razvažaŭ ab kultury, pazicyi Biełarusi i ŭkrainskaj «chuncie».
Što vyznačaje kulturnaje žyćcio Biełarusi, papytalisia ŭ Hieraščanki. «Vyraznaha stryžnia ja nie baču. Adnak pastajanna i dzie heta tolki mahčyma biełarusaŭ pierakonvajuć, što jany nie ruskija. Heta, vidać, i jość hałoŭny kirunak».
Na dumku Hieraščanki, pasył «Biełarusy – niaruskija» jość antynacyjanalnym. «Mnohija ciapierašnija dziejačy ad kultury zajmajucca nie raźvićciom biełaruskaj kultury, a
prasoŭvańniem u dziaržaŭnuju palityku i ŭ masavuju śviadomaść razburalnaha antynacyjanalnaha pasyłu, što «biełarusy - niaruskija». Usio heta moža pieraraści ŭ rusafobiju na dziaržaŭnym uzroŭni i mieć samyja ciažkija nastupstvy».
Prahučała krytyka ŭ adras pradziaržaŭnaha Sajuza piśmieńnikaŭ, jaki zamiest vydańnia almanachaŭ vydaje paetyčnyja knihi sumniŭnaj jakaści, a taksama «Jeŭrabačańnia». Pieramoha Kančyty Vurst, na dumku Hieraščanki – heta «simvał razbureńnia siamiejnych kaštoŭnaściaŭ». «Na miesca jeŭrapiejcaŭ pryjduć narody Afryki. Chočuć jeŭrapiejcy źniknuć – heta ich prablemy».
«Napeŭna, u čynoŭnikaŭ ad Ministerstva kultury vielmi mocnaje žadańnie zapisacca ŭ šlachtu. Jany, padobna, chočuć zabycca ab nialohkim minułym našaha naroda, kab było lahčej raskazvać niebylicy pra toje, jakija ščaślivyja byli biełarusy pad uładaj šlachty», - heta pazicyja Hieraščanki adnosna rekanstrukcyi staražytnych zamkaŭ i pałacaŭ.
«Zaraz Rasija pačała pračynacca. Całkam vidavočna, što ciapierašnija miežy Rasii nie adpaviadajuć areału pražyvańnia ruskaha naroda i hetuju prablemu daviadziecca vyrašać - padabajecca heta kamuści ci nie», - namiakaje Hieraščanka na novyja dałučeńni ziemlaŭ da Rasii.
Praŭda, nie ŭdakładniaje, ci heta budzie Biełaruś, ci niejkaja inšaja terytoryja. Jość tolki apieravańnia da situacyi ŭ Łatvii i Estonii, dzie «pravodzicca palityka nacyjanalnaj siehrehacyi».
«Vielmi niepryjemna i soramna za pazicyju BRSM, jaki admoviŭsia ad hieorhijeŭskaj stužački - simvału Pieramohi. Nakolki ja viedaju, najbujniejšaje hramadskaje abjadnańnie «Biełaja Ruś» taksama nie zaniała ŭciamnaj pazicyi, a supracoŭniki MUS zusim «nie rekamiendavali» vykarystoŭvać stužku padčas Śviata 9 Maja», - kaža Hieraščanka. Taksama bol u jaho vyklikaje zryvańnie «ruskaha marša» na 9 maja.
«Ja miarkuju, što na zakanadaŭčym uzroŭni treba ŭzakonić prava vykarystoŭvać simvoliku Rasii i Biełarusi na ŭsioj terytoryi Sajuznaj dziaržavy - rasijskich ściahoŭ u hierbaŭ u Biełarusi, a biełaruskich - u Rasii».
«Biełaruś - nie prosta sajuźnik Rasii, a nieadjemnaja častka Ruskaha śvietu, častka histaryčnaj Rusi», - aburajecca Hieraščanka niavyznačanaj pazicyjaj našaj krainy pa Krymie.
«Kali ŭkrainskija vybary, jakija pravodziacca pad hrukat harmat i aŭtamatnyja čerhi, buduć pryznanyja ŭ Biełarusi całkam adpaviednymi normam mižnarodnaha prava i demakratyčnymi, heta stanie surjoznaj strataj aŭtarytetu Respubliki Biełaruś u vačach miljonaŭ rasiejcaŭ, krymčan, žycharoŭ Novarasii. Biełaruś stanie dziaržavaj, jakaja de-fakta padtrymaje chuntu ŭ Kijevie». Nahadajem, što ŭčora Alaksandr Łukašenka pavinšavaŭ Piatra Parašenku ź pieramohaj na prezidenckich vybarach va Ukrainie, faktyčna pryznaŭšy jaho lehitymnaść.
Andrej Hieraščanka – były viciebski čynoŭnik, jaki zvolnieny ź dziaržaŭnaj pracy za publičnaje admaŭleńnie dziaržaŭnaści i niezaležnaści Biełarusi, jakuju jon uvažaŭ za histaryčnuju pamyłku. Padčas apošniaha Pasłańnia da naroda i parłamienta Łukašenka, nie nazyvajučy proźvišča, adznačyŭ, što da takich ludziej treba padychodzić «jak da dyviersantaŭ».