Luboŭ i nianaviść. Čamu ja zaŭziaŭsia suprać Rasii
Stolki Ałžyra, jak ŭčora, u majoj stužcy fejsbuka nie było nikoli. Mabyć, nikoli bolš i nie budzie. Hetaja afrykanskaja kraina pieraharadziła vychad zbornaj Rasii ŭ 1/8 finała čempijanatu śvietu pa futbole. I maje biełaruskija i ŭkrainskija frendy hetamu ščyra paradavalisia.
Siońnia ž ja niekalki razoŭ pračytaŭ, što heta była «stužka nianaviści». Pierad tym, jak kamientatary abvinavaciać mianie ŭ nianaviści da ŭsiaho ruskaha, ja zrablu nievialikaje adchileńnie.
Štotydzień u internecie ja hladžu matčy čempijanatu Rasii pa futbole. Ź dziacinstva čempijanat Rasii hladžu. Nie baču pryčyn admaŭlacca ad hetaj zvyčki i siońnia. I nie prosta hladžu. Viadu futbolnyja sšytki čempijanataŭ Rasii i Biełarusi. Z hadoŭ dziesiaci, mabyć. Viadu i ciapier. Nu, pavinna być u mužčyny niejkaje biaskryŭdnaje chobi.
Mabyć ža, nie ad nianaviści ja ŭsio heta rablu. Mnie cikavy rasijski futboł. Ja viedaju na pamiać składy kožnaj kamandy, pamiataju trenieraŭ i ŭładalnikaŭ kłubaŭ. Navat vyniki pieršaj lihi starajusia prahladać. Anhlijski ci ispanski futboł ja nie viedaju hetak daskanała.
Ale, kaniečnie, učora ja zaŭzieŭ za Ałžyr. Chacia nie tak, zaŭzieŭ suprać zbornaj Rasii. Čamu? Zusim niadaŭna ŭ źviazku z chakiejnym čempijanatam ja pisaŭ, što «spartovyja pieramohi dobra raźvivajuć u ludziach patryjatyzm». Na žal, hety patryjatyzm nie zaŭsiody stvaralny. U siońniašniaj Rasii jon chutčej razburalny.
Jak vynik, rejtynh Pucina ŭźniaŭsia na rekordnyja 85%. Navat libierały radujucca ad taho, što «krymnaš». Rasija viadzie (chaj i nie adkrytuju, a zamaskiravanuju i podłuju) vajnu z Ukrainaj. Zusim niadaŭna Rasija vajavała z Hruzijaj, zaachvočvała biasčynstvy ŭ Talinie, šantažavała pastaŭkami enierhanośbitaŭ paŭ-Jeŭropy, prapanoŭvała Biełarusi dałučycca «šaściu hubierniami». I heta nieadjemnyja častki sučasnaha rasijskaha patryjatyzmu. Ahresiŭnaha i varožaha da śvietu.
I sport tut hraje nie apošniuju rolu. Rasija paŭstaje z kaleń — čujecca paśla kožnaj takoj pieramohi. Pieramahli hiejropu, pindosaŭ i ałžyrafašystaŭ u chakiej, chutka pieramožam i ŭ vajnušku. Asabista mnie ad hetaha dzika. Voś čamu ja zyčyŭ parazy rasijskaj zbornaj. A nie tamu, što ja «nienavidžu ŭsio ruskaje».
Zdajecca, što ja vas užo pierakanaŭ, što lublu ruski futboł, lublu chakieistaŭ Daciuka i Aviečkina, lublu lohkaatletku Alenu Isinbajevu, lublu «Mašinu vriemieni» i Ziemfiru, lublu Čechava i Hohala, lublu hienijalny rasijski kiniematohraf savieckaha času… Dy šmat čaho jašče.
Na pieršaj pres-kanfierencyi paśla vyzvaleńnia Aleś Bialacki skazaŭ: «Spadziajusia, što Rasija – jeŭrapiejskaja kraina – usio ž dałučycca da siamji jeŭrapiejskich narodaŭ». I mnie zdajecca, što ŭ hetym pavinny być zacikaŭlenyja ŭsie. A biełarusy najpierš.
Ja nie vieru, što spartovyja parazy mohuć stać niejkaj kroplaj dla ačyščeńnia Rasii. Kaniečnie, nie. Ale, mahčyma, heta choć toliku źmienšyć hety šavinistyčny pafas, jaki štodnia ŭsio hučniej čujecca z Uschodu.
Učora asabista ŭ mianie pryjemnym ździŭleńniem była reakcyja na parazu Rasii ad sajta sports.ru. Redakcyja prademanstravała trolinh vaśmidziasiataha łeveła. U šapcy sajta było źmieščana fota pradstaŭnikoŭ rasijskaha televizijnaha panoptykumu — ad Kisialova da Žyrynoŭskaha — z chlostkim zahałoŭkam: «Dobro požałovať domoj, riebiata».
I heta ściob z toj atmaśfiery pafasa, što akružała zbornuju Rasii ŭvieś hety čas. Ściob ź miljonnych zarobkaŭ futbalistaŭ siaredniaj ruki, nivodzin ź jakich nie hulaje na Zachadzie i nie patrebien surjoznym kamandam.
Kamientatary taksama nie padkačali. Adznačaŭčy, što «siehodnia Kisielev rasskažiet o židobandierovcach,kotoryje upravlali rukami našieho hołkipiera». I takija kamienty luta plusujucca. Zajdzicie pa spasyłcy, dy vybierycie opcyju «10 lepšych kamientaŭ».
Takija voś rečy ŭva mnie pakidajuć spadziavańni, što ŭ Rasii moža być narmalnaja jeŭrapiejskaja budučynia. I moža być futbolnaja zbornaja, za jakuju budzie nie soramna zaŭzieć.