Łukašenka: U našy płany nie ŭvachodzić niejkaje stvareńnie dadatkovaj napružanaści ź ES
Biełaruś hatova vybudoŭvać adnosiny ź ES i ZŠA, ale nie na škodu nacyjanalnym intaresam.
Ab hetym zajaviŭ Alaksandr Łukašenka siońnia na sustrečy ź ministram zamiežnych spraŭ Uładzimiram Makiejem.
«U apošni čas my kanstatujem fakt, što Jeŭrapiejski sajuz, dy i ZŠA, moža, skroź zuby, ale niejak pačynajuć razmaŭlać ź Biełaruśsiu.
Chaču publična padkreślić, što ŭ našy płany ni ŭ jakim vypadku nie ŭvachodzić niejkaje stvareńnie dadatkovaj napružanaści ź Jeŭrapiejskim sajuzam, — skazaŭ kiraŭnik dziaržavy. - u nas i tak chapaje hetaj napružanaści, nam treba razrulvać hetuju situacyju, ale nie ŭ škodu našaj krainie».
Łukašenka adznačyŭ, što hetyja pytańni abmiarkoŭvalisia padčas jaho sustrečy z kiraŭnikami biełaruskich zamiežnych ustanoŭ.
«U pryncypie, na ŭsie pytańni MZS ja adkazaŭ, u jakim kirunku my pavinny budavać našy adnosiny ź Jeŭrapiejskim sajuzam, na što možam pajści, na što — nie», — dadaŭ Alaksandr Łukašenka.
Taksama siońnia byli zakranuty pytańni inšych napramkaŭ źniešniepalityčnaj i źniešnieekanamičnaj dziejnaści.
U pryvatnaści, havorka išła pra ŭschodni viektar biełaruskaj źniešniaj palityki.
«I samaje hałoŭnaje — infarmacyja pa Rasijskaj Fiederacyi, jak tut, na ŭschodnim kirunku, u nas iduć spravy, - padkreśliŭ Alaksandr Łukašenka. — Mnie, viadoma, zabaŭna, ščyra kažučy, čytać niekatoryja kamientary pra toje, što my tut pamiž Zachadam i Uschodam. Jak byccam Haspodź nas raźmiaściŭ nie pamiž Zachadam i Uschodam».
«Naša los taki, što my pamiž Zachadam i Uschodam, i zychodziačy z hetaha my vybudoŭvajem našy adnosiny i našu pazicyju. Tut nikudy nie dzieniešsia, - skazaŭ Łukašenka. — Ale heta nie značyć, što my sprabujem siadzieć na dvuch kresłach. Heta nieprymalna dla nas, heta nie asnova našaj źniešniepalityčnaj i ekanamičnaj daktryny».
Kiraŭnik dziaržavy taksama pacikaviŭsia ŭ ministra, jakija tendencyi na źniešnieekanamičnym poli dziejnaści — ci jość zruchi, asabliva ŭ realizacyi pradukcyi za miežy krainy.
Na rabočaj sustrečy byli zakranuty i pytańni, źviazanyja ź situacyjaj va Ukrainie.