Parašenka prapanuje ŭvieści asablivy paradak na Danbasie
Prezident Ukrainy Piatro Parašenka prapanuje na try hady ŭvieści asablivy paradak samakiravańnia ŭ Danieckaj i Łuhanskaj abłaściach.
Adpaviedny zakonaprajekt deputaty VR atrymali ŭ paniadziełak.
Zhodna z zakonam, dziaržava harantuje «niedapuščeńnie kryminalnaha pieraśledu, pryciahnieńnia da kryminalnaj, administracyjnaj adkaznaści i pakarańnia asob — udzielnikaŭ padziej na terytoryi Danieckaj, Łuhanskaj abłaściej», akramia taho «zabaraniajecca dyskryminacyja, pieraśled i pryciahnieńnie da adkaznaści asob z nahody padziej, jakija mieli miesca ŭ Danieckaj, Łuhanskaj abłaściach».
«Zhodna z hetym Zakonam časova, na try hady z dnia nabyćcia hetym Zakonam dziejańnia, uvodzicca asablivy paradak miascovaha samakiravańnia ŭ asobnych rajonach Danieckaj i Łuhanskaj abłaściej, da jakich naležać rajony, harady, pasiołki, vioski, raźmieščanyja stanam na dzień nabyćcia dziejańnia hetym Zakonam u miežach rajona praviadzieńnia ATA, vyznačanaha zhodna z Zakonam Ukrainy «Ab baraćbie z teraryzmam» (dalej — asobnyja rajony)».
Dziaržava harantuje prava vykarystańnia rasijskaj abo luboj inšaj movy «ŭ hramadskim i pryvatnym žyćci, vyvučeńnie i padtrymka rasijskaj i luboj inšaj movy, ich svabodnaje raźvićcio i raŭnapraŭje».
Prajekt praduhledžvaje praviadzieńnie miascovych vybaraŭ u hetym rehijonie.
«Paŭnamoctvy deputataŭ miascovych savietaŭ i słužbovych asob, abranych na pazačarhovych vybarach, pryznačanych Viarchoŭnaj Radaj Ukrainy hetym Zakonam, nie mohuć być daterminova spynienyja», — skazana ŭ prajekcie.
Taksama ŭvodzicca asablivy paradak pryznačeńnia kiraŭnikoŭ orhanaŭ prakuratury i sudoŭ, jaki praduhledžvaje ŭdzieł orhanaŭ miascovaha samakiravańnia ŭ vyrašeńni hetych pytańniaŭ.
Kabmin, inšyja centralnyja orhany vykanaŭčaj ułady mohuć padpisvać z adpaviednymi orhanami miascovaha samakiravańnia pahadnieńnia adnosna ekanamičnaha, sacyjalnaha i kulturnaha raźvićcia asobnych rajonaŭ.
Akramia taho, zakonam praduhledžvajecca padpisańnie pahadnieńnia adnosna ekanamičnaha, sacyjalnaha i kulturnaha raźvićcia asobnych rajonaŭ.
Padtrymku sacyjalna-ekanamičnaha raźvićcia Danbasa pradastaŭlaje Ukraina.
«Dziaržpadtrymka zaklučajecca va ŭviadzieńni adroznaha ad ahulnaha ekanamičnaha režymu ažyćciaŭleńnia haspadarčaj i inviestycyjnaj dziejnaści, nakiravanaha na adnaŭleńnie abjektaŭ pramysłovaści, transpartnaj i sacyjalnaj infrastruktury, žyllovaha fondu, pieraaryjentacyju pramysłovaha patencyjału, stvareńnie novych pracoŭnych miescaŭ, pryciahnieńnie inviestycyj i kredytaŭ dla adnaŭleńnia i raźvićcia abjektaŭ, raźmieščanych u asobnych rajonach», — skazana ŭ prajekcie.
«U zakonie ab dziaržbiudžecie Ukrainy kožny hod praduhledžvajucca vydatki, jakija nakiroŭvajucca na dziaržpadtrymku sacyjalna-ekanamičnaha raźvićcia asobnych rajonaŭ. Ukraina harantuje vyznačeńnie takich vydatkaŭ ahulnaha fondu dziaržbiudžetu abaronienymi vydatkami, abjom jakich nie moža mianiacca pry ažyćciaŭleńni skaračeńnia zaćvierdžanych biudžetnych pryznačeńniaŭ», — skazana ŭ dakumiencie.
Dakumient praduhledžvaje «ŭzmacnieńnie i pahłybleńnie dobrasusiedskich adnosin pamiž terytaryjalnymi supołkami, orhanami miascovaha samakiravańnia asobnych rajonaŭ z administracyjna-terytaryjalnymi adzinkami Rasijskaj Fiederacyi na asnovie pahadnieńniaŭ ab małym pamiežnym ruchu, jakija składajucca terytaryjalnymi supołkami, orhanami miascovaha samakiravańnia, miascovymi orhanami vykanaŭčaj ułady Ukrainy i terytaryjalnymi supołkami ŭ miežach kampietencyi, ustanoŭlenaj zakonam».
Na terytoryi ATA rašeńniem haradskich, pasiałkovych, sielskich savietaŭ stvarajucca atrady narodnaj milicyi, kaardynacyja ich dziejnaści ažyćciaŭlajecca adpaviednym sielskim, pasiałkovym, haradskim kiraŭnikom.
«Atrady narodnaj milicyi ŭtvarajucca na dobraachvotnych pačatkach ź liku hramadzian Ukrainy, jakija pastajanna pražyvajuć u adpaviednych nasielenych punktach», — skazana ŭ dakumiencie.
U zaklučnych pałažeńniach rekamiendujecca pryznačyć pazačarhovyja miascovyja vybary na 9 listapada 2014 hoda.