U Haradku demantavali pomnik «Tarasu na Parnasie»
Čynoŭniki admovilisia apłacić užo ŭstanoŭleny manumient.
U Haradku da «Dažynak» pastavili pomnik «Taras na Parnasie». Adnak da ździŭleńnia miascovych žycharoŭ 28 listapada pomnik demantavali.
Pomnik «Taras na Parnasie», jaki byŭ ustalavany ŭ Haradku da abłasnych «Dažynak». Fota Haradok.info.
Tak ciapier vyhladaje miesca, na jakim stajaŭ pomnik. Haradok.info.
Miascovy sajt Haradok.info źviazaŭ źniknieńnie pomnika z baraćboj čynoŭnikaŭ z mahčymaj karupcyjaj: nibyta cana pomnika ŭ 1 miljard 200 miljonaŭ rubloŭ kamuści padałasia padazrona vysokaj.
«Pavodle čutak, čynoŭniki ad kaznačejstva źviarnulisia ŭ pravaachoŭnyja orhany nakont abhruntavanaści zajaŭlenaha koštu pomnika i nie atrymali dabra na pieraličeńnie hrošaŭ aŭtaram pomnika», — piša sajt.
Adnak vidać pa ŭsim, pryčyna demantažu pomnika bolš prazaičnaja: čynoŭniki prosta admovilisia płacić za pomnik.
Načalnik adździeła ideałahičnaj raboty, kultury i pa spravach moładzi Haradockaha rajvykankama Natalla Hamziuk paviedamiła «Našaj Nivie», što pomnik znachodziŭsia ŭ Haradku pa damovie biazvypłatnaha karystańnia, i ciapier nadyšoŭ čas viarnuć pomnik jaho ŭładalniku — AAT «Liciejny dvor».
Dyrektar liciejna-mastackaha pradpryjemstva «Liciejny dvor» Mikałaj Stolar paćvierdziŭ: pomnik ciapier sapraŭdy znachodzicca na terytoryi pradpryjemtsva. Jaho zabrali, bo čynoŭniki prosta nie zapłacili za jaho.
«Jašče kali my rabili pomnik i staršynia, i namieśnik staršyni rajvykankama zvanili nam i pahražali, kab my vyrabili pomnik. My prasili zapłacić, a jany nam adkazvajuć: «Zapłacim, čaho vy pieražyvajecie». My pomnik zrabili: usio ž śviata. Zavieźli pomnik u Haradok, pastavili jaho, kab ludzi sustreli «Dažynki».
Pieršapačatkova ŭ nas była damova na kuplu pomnika. Jaje zaklučali z upraŭleńniem kapitalnaha budaŭnictva.
Potym rajvykankam vyrašyŭ, što UKS pomnik nie vykupić, a vykupić adździeł kultury. Trojčy padaŭžali termin raźliku za prajekt. Tamu my aformili damovu biazvypłatnaha karystańnia, kab u rajvykankama byŭ čas padrychtavać dakumienty i kab nie zabirać pomnik z Haradka.
Na žal, jany ničoha nie vykupili, a ŭ apošnim liście z rajvykankama paprasili zabrać pomnik. Voś my i zabrali».
Mikałaj Stolar kaža, što ŭ pradpryjemstva dahetul jość damova z upraŭleńniem kapitalnaha budaŭnictva, pavodle jakoj pomnik musiać vykupić.
«My možam sudzicca z Haradockim rajvykankamam, ale vyrašyli nie rabić hetaha», — kaža Stolar.
Dyrektar «Liciejnaha dvara» nahadvaje, što čynoŭniki ŭsio ž mohuć vykupić pomnik za 1 miljard 186 miljonaŭ biełaruskich rubloŭ.
Mahčyma, što čynoŭniki i nie źbiralisia kuplać pomnik — jon moh być patrebny nie dla ŭšanavańnia pamiaci aŭtara «Tarasa na Parnasie» Kanstancina Vieranicyna, a ŭ jakaści dekaracyi dla «Dažynak».