«Minsktrans» dapoŭniŭ tablički z raskładam kodam dla SMS-servisu
Płatny servis dubliruje ličbavyja tabło i biaspłatnaje «virtualnaje tabło» ŭ internecie.
Fota: Siarhiej Pažoha, «Minsk-naviny»
Na tablički z nazvaj prypynku i maršrutami transpartu «Minsktrans» nanosić dadatkovy ličbavy kod, raspaviadaje «Minsk-naviny».
Kod pryznačany dla SMS-servisu: abanientu treba nabrać *960*[kod]#, kab daviedacca, kali na prypynak pryjdzie transpart. Karystalnik atrymaje ŭ adkaz numary maršrutaŭ i čas da ich prybyćcia.
Pakul SMS-servis dastupny tolki abanientam MTS, ale ŭ stadyi prapracoŭki jaho raspaŭsiud na inšych apierataraŭ. Cana SMS budzie zaležyć ad apieratara.
Servis źviarajecca nie z raskładam transpartu (ad jakoha transpart moža z roznych pryčyn adchilacca), a z kaardynatami mašyn, što zdymajucca ŭ realnym časie.
Kody na prypynkach rasšyfroŭvajucca prosta. Pieršaja ličba značyć rajon horada, druhaja i treciaja — numar u ałfavicie pieršaj litary nazvy prypynku, čaćviortaja i piataja — numar prypynku siarod tych, što pačynajucca z takoj litary ŭ hetym rajonie.
***
SMS-servis dubliruje elektronnyja tabło, užo ŭstalavanyja ŭ Minsku na dvuch dziasiatkach prypynkaŭ (u płanach — jašče 20 tabło), a taksama «Virtualnaje tabło» na sajcie «Minsktransa». I realnyja, i virtualnyja tabło biaspłatnyja.
Dadać u prahramu dla smartfonaŭ «Virtualnaje tabło» sprabavali minskija raspracoŭščyki. Paśla taho, jak funkcyja źjaviłasia ŭ inšaj prahramie, «Minsktrans» zakryŭ servis, kab amal praz hod adkryć jaho z abaviazkovaj rehistracyjaj.