Łukašenka: Biełaruś i Hiermanija mohuć istotna pahłybić uzajemadziejańnie
Taki punkt hledžańnia vykazaŭ Alaksandr Łukašenka siońnia na sustrečy z Nadzvyčajnym i Paŭnamocnym Pasłom FRH u Biełarusi Valframam Maasam, jakaja adbyłasia z nahody zaviaršeńnia jaho dypłamatyčnaj misii ŭ našaj krainie.
«Kali my prymiem sumiesnyja namahańni, to možam značna pahłybić adnosiny pamiž Biełaruśsiu i Hiermanijaj», — padkreśliŭ Łukašenka.
Jon adznačyŭ, što Biełaruś ličyć pryjarytetnym supracoŭnictva z Hiermanijaj i realizuje mnohaje z ulikam dośviedu hetaj krainy. U pryvatnaści, u biełaruskaj pramysłovaści mnohaje madernizujecca zychodziačy sa standartaŭ Hiermanii, skazaŭ kiraŭnik dziaržavy.
«Kali my z vami damovimsia, kali ŭ nas buduć ahulnyja intaresy, to my budziem vielmi adkaznymi partniorami i hatovyja realizoŭvać ahulnyja damoŭlenaści, razmaŭlać na lubyja temy pa lubych prablemach», — zapeŭniŭ jon. Łukašenka vysoka acaniŭ namahańni Valframa Maasa, nakiravanyja na ŭmacavańnie biełaruska-hiermanskich adnosin.
«Ja dziakuju Vam za tuju kanstruktyŭnuju pazicyju, jakuju Vy zajmali, budučy ŭ Biełarusi ŭ jakaści pasła, i rabili ŭsio mahčymaje, kab našy narody byli bližej i lepš razumieli adzin adnaho, — adznačyŭ kiraŭnik biełaruskaj dziaržavy. — Vy nie rabili krokaŭ, jakija b stvarali niejkaje napružańnie pamiž Biełaruśsiu i Hiermanijaj. Vy razumiejecie našu situacyju, vydatna viedajecie historyju našych adnosin. Vy mudra i taktoŭna pavodzili siabie jak pasoł».
U svaju čarhu Valfram Maas padkreśliŭ, što Biełaruś naležyć da jeŭrapiejskaj siamji narodaŭ.
«Pracujučy ŭ vašaj krainie, ja pierakanaŭsia ŭ hetym, — adznačyŭ dypłamat. — Ja nie pieraaceńvaju mahčymaści pasła ŭ raźvićci dvuchbakovych adnosin. Razam z tym chaču skazać, što mnie było lohka pracavać u Biełarusi».