KPB padtrymaje na vybarach Łukašenku i nie dapuścić mitynhaŭ paśla zakryćcia vybarčych učastkaŭ
Kamunistyčnaja partyja Biełarusi tradycyjna padtrymaje na prezidenckich vybarach Alaksandra Łukašenku.
Takoje rašeńnie kamunisty pryniali 27 červienia na XI pazačarhovym źjeździe ŭ Minsku. «Kamunistyčnaja partyja Biełarusi źjaŭlajecca adnoj ź niamnohich na jeŭrapiejskaj palityčnaj prastory, chto padtrymlivaje palityčnaje kiraŭnictva krainy. Dadzienaja padtrymka zasnavanaja na supadzieńni stratehičnych metaŭ i zadač našaj partyi i sacyjalna-ekanamičnaj palityki pa pabudovie sacyjalna aryjentavanaj dziaržavy dla naroda», — zajaviŭ, vystupajučy na źjeździe, pieršy sakratar CK KPB Ihar Karpienka, paviedamlaje pres-słužba partyi.
Kamunisty ŭpeŭnienyja, što pieradvybarnaja kampanija — prydatny pieryjad pakazać, što Biełaruś «bieź jakich-niebudź enierhietyčnych i pryrodnych resursaŭ vyhladaje značna bolš stabilnaj va ŭsich adnosinach dziaržavaj za niekatoryja susiednija dziaržavy, a tym bolš Ukrainu».
KPB ličyć adzinym prydatnym rašeńniem admovu ad vyłučeńnia ŭłasnaha kandydata i padtrymku dziejučaha kiraŭnika dziaržavy. Kamunisty majuć namier nie tolki aktyŭna ŭdzielničać va ŭsich etapach elektaralnaj kampanii, źbirać podpisy ŭ padtrymku Łukašenki i nazirać za vybarami, ale i zajmacca «vykryćciom zadum apazicyi».
«Vybarčy praces, jaki maje adbycca, nieabchodna vykarystoŭvać dla zhurtavańnia i papaŭnieńnia štychoŭ partyi, dla aśviety pracaŭnikoŭ pa ŭsich napramkach palityčnaha i sacyjalna-ekanamičnaha raźvićcia na asnovie marksiscka-leninskaj mietadałohii, praktyki sacyjalistyčnaha budaŭnictva», — skazaŭ Karpienka. Pry hetym jon nahadaŭ, što, z punktu hledžańnia kamunistaŭ, «mižnarodny kapitał maje ŭ najaŭnaści vielizarny arsienał ideałahičnych i infarmacyjnych srodkaŭ i sposabaŭ masiravanaha ŭździejańnia na hramadskuju śviadomaść z metaj palityčnaha manipulavańnia masami».
«Z ulikam najaŭnaha stanovišča naša partyja pavinna razharnuć sistemu kontrprapahandysckich mierapryjemstvaŭ u dačynieńni da «apazicyjnych kandydataŭ», ich ahitataraŭ i davieranych asob na ŭsich etapach vybarčaj kampanii.
Biełaruskija vybarščyki pavinny dobra viedać, kudy kličuć narod palityčnyja dynazaŭry, vychavanyja Dziarždepam ZŠA jašče z časoŭ harbačoŭskaj pierabudovy», — zajaviŭ hałoŭny kamunist krainy, jaki źjaŭlajecca namieśnikam staršyni Minharvykankama.
«Varta sistemna i papularna danosić da hramadzian sapraŭdnyja mety, jakija pieraśleduje «piataja kałona» ŭ adpaviednaści z płanami CRU pa pieratvareńni Biełarusi ŭ Samali, Liviju, Irak, Afhanistan abo Ukrainu», — ličyć Karpienka.
Pavodle jaho, kamunisty majuć namier «mabilizavać usie isnujučyja resursy i nie dapuścić sprob praviadzieńnia destruktyŭnymi siłami apazicyi nie sankcyjanavanych ŭpaŭnavažanymi dziaržaŭnymi orhanami pikietaŭ, schodaŭ, mitynhaŭ, šeściaŭ i inšych mierapryjemstvaŭ paśla zakryćcia vybarčych učastkaŭ».