Kantrabandnyja biełaruskija cyharety voziać va Ukrainu furami
Tolki na pamiežnym pierachodzie «Damanava» adnačasova znachodziłasia 38 fur z cyharetami, jakija vieźli va Ukrainu.
Adpaviedny dakumient apublikavaŭ u svaim akaŭncie ŭ sacyjalnaj sietcy «Fejsbuk» deputat Viarchoŭnaj Rady Ihar Huź.
«Na terytoryi Biełarusi, pablizu ŭkrainskaha pamiežna-prapusknoha punkta «Damanava» staić 38 fur z kantrabandnymi cyharetami. Aryfmietyka nastupnaja: 38 pamnožyć na $ 30 tysiač = $ 1.140.000.
Pavodle nieaficyjnaj infarmacyi, da hetaj spravy maje dačynieńnie Raman Mikiciuk, eks-rehijanał i pretendent na pasadu načalnika Vałynskaj mytni. Jaho prateže, v.a. kiraŭnika mytni Dźmitryj Jakabčuk u ciažkich rozdumach, jak dać ruch spravie.
Darahija žurnalisty, cikavaja tema dla rasśledavańnia. Užo siońnia asabista źviarnuŭsia z hetaj nahody da kiraŭnika SBU Vasila Hrycaka».
Deputat taksama apublikavaŭ list SBU načalniku Vałynskaj mytni, u jakim idzie havorka ab vialikaj kolkaści hruzavych aŭtamabilaŭ na terytoryi Biełarusi la ŭkrainskaj miažy.
Nahadajem, učora hubiernatar Zakarpackaj vobłaści Ukrainy Hienadź Maskal paviedamiŭ ab tym, što kantrabandnyja cyharety pastupajuć ź Biełarusi va Ukrainu i praz Čarnihaŭskuju vobłaść.