Pientahon analizuje svaje šansy ŭ mahčymaj vajnie suprać Pucina
Tank Korpusa marskoj piachoty ZŠA padčas vučeńniaŭ.
Ministerstva abarony ZŠA praviało hetym letam niekalki sakretnych vučeńniaŭ, metaj jakich była acenka zdolnaści Amieryki vieści vialikuju vajnu ŭ vypadku adkrytaha kanflikta z Rasijaj, piša thedailybeast.com.
Mnohija amierykanskija vajskoŭcy ličać, što paśla 15-hadovaj kancentracyi Pientahona na vajnie suprać terarystaŭ i paŭstancaŭ jahonyja naziemnyja vojski drenna padrychtavanyja dla maštabnych vajennych dziejańniaŭ u tym vypadku, kali Maskva napadzie na adnaho ź siabraŭ NATA.
Prablemy paŭstajuć i ŭ śfiery łahistyki, jakaja budzie patrabavać masavaha i dalokaha pierakidvańnia vojskaŭ, hetak i ŭ niedastatkovych zapasach kiravanych bojeprypasaŭ.
«Ci možam my siońnia pabić rasiejcaŭ? Tak, ale heta budzie patrabavać usich našych sił. My nie nastolki hatovyja, jak my chočam być», — skazaŭ adzin z pradstaŭnikoŭ Minabarony ZŠA.
«Vojny [u Iraku i ŭ Afhanistanie] źnizili našu zdolnaść doŭhi čas vieści bajavyja dziejańni», — skazaŭ inšy čynoŭnik, spasyłajučysia na vyniki sakretnych vyprabavańniaŭ, jakija pravodzilisia Pientahonam pry ŭdziele niekalkich inšych fiederalnych orhanaŭ.
«Suprać takoha voraha jak Rasija, nielha spadziavacca na tuju tatalnuju pieravahu ŭ pavietry, jakuju my mieli ŭ kanfliktach paśla 11 vieraśnia [2001 hoda]. Luby kanflikt vialikaha maštabu z takim praciŭnikam budzie patrabavać našych ludziej i resursaŭ ź inšych častak śvietu, dzie ciapier jany dziejničajuć tak aktyŭna, što ŭ ich niama času na padrychtoŭku da vajny inšaha typu», — dadaŭ jon.
Analityki blizkija da administracyi prezidenta Baraka Abamy i Demakratyčnaj partyi ličać, što Pientahon takim čynam prosta sprabuje atrymać bolšy biudžet.
«Raniej takim ža čynam fłot kazaŭ pra pahrozu z boku Kitaja», — kaža supracoŭnik vašynhtonskaha Center for American Progress Łoŭrens Korb.