Venesueła-Ekvador-Kalumbija: ściahvajucca vojski
U aŭtorak ułady Kalumbii apublikavali novyja dakumenty, zachoplenyja, jak śćviardžajecca, u stanie FARK. Siarod ich śviedčańni, što hierylja atrymała ŭ jakaści finansavańnia ad Uha Čavesa 300 miljonaŭ dalaraŭ. Budzie vajna, jakaja zaciahnie j biełarusaŭ?
Na mapie: rajony aktyŭnaści kalumbijskich partyzanaŭ. Krynica: gazeta.ru.
U aŭtorak ułady Kalumbii apublikavali novyja dakumenty, zachoplenyja, jak śćviardžajecca, u stanie FARK. Siarod ich śviedčańni, što hierylja atrymała ŭ jakaści finansavańnia ad Uha Čavesa 300 miljonaŭ dalaraŭ. Budzie vajna, jakaja zaciahnie j biełarusaŭ?
Nakalajecca abstanoŭka na paŭnočnym zachadzie Łacinskaj Ameryki.
Začepkaj dla kanfliktu stała aperacyja kalumbijskaj avijacyi i specvojskaŭ. U časie jaje na ekvadorskaj terytoryi byli zabityja asoba numar dva ŭ paŭstanckich Revalucyjnych uzbrojenych siłach Kalumbii (FARK) Raul Rejes i jašče 17 (pavodle inšych źviestak - 20) partyzanaŭ. Pakul niajasna, ci zahinuła razam ź imi žonka Rejesa — dačka hałoŭnaha pravadyra kalumbijskich partyzanaŭ.
Rejes byŭ adnym ź siami siabroŭ paŭstanckaha sakrataryjatu. Upieršyniu za 40 hadoŭ kalumbijskim uładam udałosia źniščyć kiraŭnika hierylji takoha vysokaha ranhu.
Aficyjna śćviardžajecca, što pierachop telefavańniaŭ, a taksama źviestki ad špieha dazvolili vyznačyć miesca načoŭki Rejesa. Pišuć, što z hetym kalumbijskim vajskoŭcam mieli pamahčy amerykancy. Ministar abarony Kalumbii padkreśliŭ, što Rejes načavaŭ usiaho za 1800 metraŭ ad miažy, što kalumbijskija samaloty viali ahoń, nie parušajučy pavietranaje prastory Ekvadoru i što tolki paśla incydentu kamandas vyvieźli z ekvadorskaj terytoryi cieły Urybe i druhoha partyzana, nie čapajučy astatnich.
Rejes byŭ hałoŭnym pradstaŭnikom paŭstancaŭ na pieramovach pra vyzvaleńnie palityčnych zakładnikaŭ, jakich utrymlivaje FARK. Ź im naŭprost kantaktavali ŭradoŭcy Venesueły i Ekvadoru, jakim paŭstancy daviarajuć, i Francyi, jakaja patrabuje vyzvaleńnia eks-kandydatki ŭ prezydenty Kalumbii Inhryd Betankur, jakaja maje taksama francuskaje hramadzianstva.
Ekvadorskija i venesuelskija aficyjnyja asoby źvinavacili ŭłady Kalumbii ŭ metaskiravanym zryvie pieramoŭnaha pracesu, abvieściŭšy, što byli blizka taho, kab vyzvalić Betankur.
Karea nazvaŭ prezydenta Kalumbii kiraŭnikom «varjackaha brachlivaha ŭradu», a Čaves — «pachanom bandy».
Rejd na terytoryju Ekvadoru dazvoliŭ uładam Kalumbii dakazać svaje daŭnija abvinavačvańni: Ekvador, blizki sajuźnik Venesueły, dazvalaje kalumbijskim partyzanam vykarystoŭvać svaju terytoryju ŭ jakaści bazy.
Adnak aperacyja parušyła mižnarodnaje prava. Vojski adnoj krainy nia majuć prava ŭryvacca na terytoryju druhoj. Praŭda, tyja samyja normy na tych ža padstavach niadaŭna ŭziała pad husienicy svaich tankaŭ Turcyja ŭ Irackim Kurdystanie.
FARK viadzie partyzanku ŭžo 40 hadoŭ. Napačatku za FARK stajała bajavoje kryło Kampartyi, ale z časam, kali stała vidavočna, što FARK skaciłasia da narkahandlu i bandytyzmu, kamunisty razarvali z FARK.
Prezydenty Venesueły i Ekvadoru, što pryjšli da ŭłady na chvali antyamerykanskaha papulizmu, zdaŭna nienavidziać prezydenta Kalumbii — viernaha sajuźnika ZŠA, jaki abapirajecca na dapamohu Vašynhtonu ŭ baraćbie suprać narkamafii i partyzanki.
U aŭtorak ułady Kalumbii apublikavali novyja dakumenty, zachoplenyja, jak śćviardžajecca, u stanie FARK. Siarod ich śviedčańni, što hierylja atrymała ŭ jakaści finansavańnia ad Uha Čavesa 300 miljonaŭ dalaraŭ.
U noŭtbuku Rejesa taksama ŭtrymlivajecca list, u jakim Rejes namaŭlaje svaich paplečnikaŭ z FARK, kab jany vydali šerah zakładnikaŭ, jakija ŭtrymlivajucca ŭ džunhlach, za pasiarednictvam prezydenta Ekvadoru Karea, što mieła b dapamahčy jamu «ŭ jahonych palityčnych dziejańniach».
Čaves maje ambicyi arhanizavać panamerykanskuju revalucyju i spansaruje praciŭnikaŭ ZŠA ad Kuby (tannaj naftaj) da Biełarusi (kancesijaj na naftavyja radoviščy). Jaho padtrymlivajuć prezydenty Ekvadoru, Nikarahua, Arhientyny, Balivii.
Sytuacyju zaraz maje razhladać Rada Arhanizacyi Amerykanskich Dziaržavaŭ. Pasiarednictva ŭziała na siabie prezydentka Arhientyny Krystyna Fernandes de Kiršner. Heta nie abiacaje ničoha dobraha: jana vyrazna staić za Čavesa i moža halvanizavać napružanaść.
Stanovišča mahli b razradzić niedvuchsensoŭnyja prabačeńni Kalumbii pierad Ekvadoram, ale prezydent Alvara Urybe na toje naŭrad ci pojdzie.
U aŭtorak Urybe zajaviŭ hrupie žurnalistaŭ pra namier padać na svajho venesuelskaha kalehu ŭ Mižnarodny trybunał u Haazie «za apiekavańnie i finansavańnie hienacydu».
A vice-prezydent Kalumbii paviedamiŭ, vystupajučy ŭ Ženevie, što ŭ kamputarach Rejesa ŭtrymlivajucca źviestki, što pakazvajuć, što FARK imknułasia atrymać radyjeaktyŭny ŭran dla vyrabu «brudnaj bomby».
Papularnaść Urybe ŭ krainie rezka vyrasła: bolšaść kalumbijcaŭ nienavidziać biaźlitasnych partyzanaŭ.
Na lepšaje dazvalaje spadziavacca chiba toje, što Bahata pakul nie pierasunuła svaich vojskaŭ da miežaŭ z Venesuełaj i Ekvadoram. Urešcie, u vajnie, u vyniku jakoj ceny na naftu padnialisia b za niabiosy, nie zacikaŭleny nichto, akramia naftavych kołaŭ.
Vajna ŭ Venesuele začapiła b i Biełaruś: u Venesuele ŭžo ciapier pracujuć dziasiatki biełaruskich hramadzianaŭ, Biełaruś ekspartuje tudy zbroju, a rost cenaŭ na naftu stymuluje biełaruskuju ekanomiku.
Venesueła
Vajskovy biudžet (2007): $2.56 młrd
Uzbrojenyja siły: 115,000
Rezervisty: 8,000
Tanki: 81
Lohkija tanki: 109
Bronietransparciory: 71
Bajavyja viertaloty: 13
Bajavyja samaloty: 104
Padłodki: 2
Bajavyja karabli: 6
Kalumbija
Vajskovy biudžet (2007): $5.10 młrd
Uzbrojenyja siły: 254, 259
Rezervisty: 61,900
Bronietransparciory: 228
Bajavyja viertaloty: 31
Bajavyja samaloty: 115
Padłodki: 4
Bajavyja karabli: 4
Ekvador
Vajskovy biudžet (2007): $918 młn
Uzbrojenyja siły: 57,100
Rezervisty: 118,000
Lohkija tanki: 24
Bronietransparciory: 123
Bajavyja viertaloty: 18
Bajavyja samaloty: 57
Padłodki: 2
Bajavyja karabli: 8