Praces 14-ci
Na siońnia ŭsie čatyrnaccać padazravanych pa spravie vuličnaj akcyi 10 studzienia pieraviedzienyja ŭ status abvinavačanych. Z hetaj pryčyny niekatoryja fihuranty spravy dali pres‑kanferencyju, kab raskazać pra padrabiaznaści śledztva.
«10 studzienia była absalutna mirnaja i niehvałtoŭnaja demanstracyja, ludzi vyjšli na płošču, kab damahacca svaich pravoŭ. My ŭsie byli zatrymanyja i asudžanyja na sutki. Na Akreścina ŭ nas adbyvalisia dopyty. Tydzień tamu sa śviedkaŭ nas pieraviali ŭ padazravanych, a 4 sakavika — u abvinavačanyja», — pačaŭ aktyvist AHP Michaił Kryvaŭ.
Na jahonuju dumku, sudovy praces pa hetaj spravie projdzie ŭ pačatku krasavika.
Michaił Paškievič z «Maładych demakrataŭ» raskazaŭ, što siońnia jon razam ź inšymi palitykami i hramadzkimi aktyvistami sustrakaŭsia z pasłom ABSE Hans‑Jochenam Šmitam.
«My pieradali spadaru pasłu zvarot da mižnarodnaj supolnaści z prośbaj źviarnuć uvahu na našu kryminalnuju spravu, Andreja Kima, Siarhieja Parsiukieviča. My zaklikali dyplamata asabista naviedać Kima ŭ turmie, kab jon na svaje vočy ŭbačyŭ hetaha i chłopca i daviedaŭsia padrabiaznaści spravy ź pieršych vusnaŭ. Nas užo sudzili za hetyja pravaparušeńni, a ciapier źbirajucca zrabić heta paŭtorna», — kaža M.Paškievič.
Chłopiec taksama paviedamiŭ, što najchutčej, nia ŭsie abvinavačanyja paŭstanuć pierad sudom. Alaksandar Barazienka znachodzicca ciapier va Ŭrocłavie, dzie navučajecca pa adukacyjnaj prahramie fondu Kalinoŭskaha. Ciapier ujezd na terytoryju Biełarusi dla Barazienki zakryty.
Anton Kojpiš i Taciana Ciškievič padčas śledztva pazbavilisia miescaŭ u VNU. Dziaŭčynu 21 studzienia vyklučyli z Akademii fizvychavańnia za niesvoječasovuju apłatu. Kojpiša ž na dniach adličyli z mechmatu BDU nibyta za akademičnuju niepaśpiachovaść. Anton kaža:
«U materyjałaŭ spravy pastajanna źjaŭlajucca tolki niejkija niajakasnyja ciomnyja fotazdymki, na jakich ciažka navat razabrać tvary ludziej. Pryčym, bačna, što zroblenyja jany ŭžo ŭ ciomnuju paru sutak, a pa materyjałach spravy ja nibyta parušaŭ zakon i a 14 hadzinie».
Michaił Kryvaŭ praciahvaje: «Ja nieadnarazova pytaŭsia ŭ śledčaha, ci jość u tym, što ja rabiŭ skład kryminalnaha złačynstva? Chiba ja biŭsia ź milicyjantami, raźbivaŭ vitryny kramaŭ, ci varočaŭ aŭtamabili? Nie».
Uładzimier Siarhiejeŭ adznačaje, što novy kryminalny cisk na aktyvistaŭ apazycyi pačaŭsia akurat napiaredadni 25 Sakavika. Chłopiec ličyć, što takim čynam ułady pasprabujuć źnizić pratestny nastroj u hramadztvie. Siarhiejeŭ taksama zhadaŭ, što ŭ sud pieradadzienaja i kryminalnaja sprava Kaciaryny Sałaŭjovaj, jakuju abvinavačvajuć va ŭdziele ŭ niezarehistravanaj arhanizacyi.
Alaksiej Bondar kaža, što zaviadzieńnie suprać jaho kryminalnaj spravy nie było dzivam.
«U našaj krainie pravaachoŭnyja orhany nie kirujucca zakonam, a tolki zahadami. Ja ničoha nie chaču kazać u svajo apraŭdańnie. Varta aceńvać svaje dziejańni z punktu hledžańnia marali i filazofskaha razumieńnia svabody i spraviadlivaści», — kaža A.Bondar.
Na pres‑kanferencyi taksama prysutničała maci Andreja Kima Taciana, jejnaha syna abvinavačvajuć užo pa druhim kryminalnym artykule.
«Mnie nie dazvolili sustrecca z synam na jahony dzień naradžeńnia. Kali ja patelefanavała ŭ prakuraturu z prośbaj vyzvalić jaho z turmy pad chatni aryšt ci inšuju mieru strymańnia, to mnie paviedamili, što adkaz budzie praź miesiac. Ja skazała, što za miesiac Andrej moža pamierci. Na heta byŭ nastupny adkaz: nu i što? Ja razumieju, što ŭ našaj krainie, čym bolš prystojny čałaviek, tym bolš niebiaśpiečny jon dla hramadztva», — ličyć Taciana Kim.
Varta adznačyć, što na praciahu ŭsioj pres‑kanferencyi, jakaja prachodziła na ofisie AHP, kala budynku dziažuryli amonaŭcy. Najchutčej, jany čakali Alesia Stralcova i Alaksieja Bondara, jakija tak i nie źjaŭlalisia da śledčych pa spravie. Siońnia chłopcy majuć atrymać pastanovy ab pieravodu ich u abvinavačanyja.
videa maci Kima