Tyhry nie robiacca travajednymi — Viačasłaŭ Siŭčyk raspavioŭ, čym budzie zajmacca ŭ Biełarusi
Siońnia ŭ krainu viarnuŭsia adzin z aktyvistaŭ biełaruskaj apazicyi Viačasłaŭ Siŭčyk. «Naša Niva» pahutaryła ź im adrazu pa viartańni.
Viačasłaŭ Viŭčyk na staličnym vakzale. Fota: Radyjo Svaboda
«Va mnie ničoha nie zvaruchnułasia, kali ja pryjechaŭ u Minsk, nastalhii nie było, — pačaŭ Viačasłaŭ, — pa sutnaści, ja ž i nie byŭ palityčnym imihrantam. Ja ŭvieś čas znachodziŭsia pobač ź Biełaruśsiu, byŭ u kursie ŭsich navinaŭ i zajmaŭsia biełaruskaj spravaj — ładziŭ akcyi ŭ padtrymku Biełarusi ŭ Polščy, va Ukrainie».
Pavodle Viačasłava, jahony pryjezd čakany — jon sam paviedamiŭ pra heta ŭ červieni.
«Adnak kali ja źjazdžaŭ, to nie dumaŭ, što praviadu za miežami krainy amal piać hadoŭ. Reč u tym, što ŭ 2010 hodzie pačalisia brutalnyja i masavyja represii, tamu ja paličyŭ za lepšaje na čas zastacca za miažoju. I voś, momant nadyšoŭ — vyzvalili Statkieviča dy inšych palitviaźniaŭ, pamiać pra jakich ja padtrymlivaŭ za miažoju svaimi akcyjami. Tamu i ja ciapier budu bolš karysnym unutry krainy», — skazaŭ Viačasłaŭ i padkreśliŭ, što nie vieryć u toje, što represii spynilisia.
«Tyhry nie robiacca travajednymi.
Ale adsutnaść mirnaha supracivu ŭ Biełarusi moža pryvieści da žudasnych vynikaŭ. Ludzi musiać vieryć u svai siły nie zvažajučy ni na što. Tamu ŭžo 17 vieraśnia ja prymu ŭdzieł u akcyi ŭ Minsku», — skazaŭ Viačasłaŭ i dadaŭ, što za čatyry z pałovaju hady jahonaj adsutnaści ludzi ŭ Biełarusi stali bolš zapałochanymi.
«Ja pryjechaŭ i ŭbačyŭ, što hramadstva adroźnivajecca navat ad samoha siabie 20-hadovaj daŭniny. A što ŭžo paraŭnovać z Polščaju ci Ukrainaj. Ludzi nadta naściarožanyja», — zaznačyŭ Viačasłaŭ naprykancy.