«I tut jon tykaje palcam u fota i kaža: «Dyk voś ža ja» — u Minsku sudziać Anatola Labiedźku za pikiety 16 i 23 vieraśnia
U sudzie Centralnaha rajona Minska siońnia razhladajuć spravy za niesankcyjanavanuju akcyju, što prajšła 23 vieraśnia na płoščy Svabody ŭ Minsku.
Jaje ładziŭ eks-palitviazień Mikoła Statkievič, arhanizavaŭšy jak sustreču vybarcaŭ z Łukašenkam. Kiraŭnik dziaržavy, čakana, na schod nie pryjšoŭ. U akcyi ŭdzielničaŭ i eks-kandydat u prezidenty Uładzimir Niaklajeŭ. Na akcyju sabrałasia ad 400 da 500 čałaviek. Vystupoŭcy — Mikoła Statkievič, Anatol Labiedźka, Uładzimir Niaklajeŭ — u svaich vystupach zrabili akcenty na vybarčym farsie, represijach i niedapuščeńni prysutnaści rasijskich vojskaŭ u Biełarusi. Jany zaprasili prysutnych na akcyju 4 kastryčnika, što projdzie pad łozunham pratestu suprać rasijskich bazaŭ.
Niaklajeŭ siońnia pryjšoŭ na hanak suda, ale ŭ budynak iści admoviŭsia. «Navošta iści ŭ sud, kali ni spraviadlivaha pravasudździa, ni vybaraŭ u krainie niama», — skazaŭ jon. U vyniku Niaklajeŭ syšoŭ.
Labiedźka zajšoŭ u budynak suda, čakaje pačatku pracesu. Statkieviča niama. Labiedźka kaža, što toj admoviŭsia iści, bo nie atrymaŭ pozvu naležnym čynam.
Labiedźka, darečy, znachodzicca tut pa dźviuch spravach: za schod Statkieviča 23 vieraśnia i za pikiet kala HUMa, što prajšoŭ 16 vieraśnia, u pamiać źnikłych Viktara Hančara, Anatola Krasoŭskaha, Juryja Zacharanki, Dźmitryja Zavadskaha. Tut majuć sudzić aktyvista AHP, udzielnika pikieta, Mikałaja Kazłova.
Spravy Labiedźki, Niaklajeva i Statkieviča raskidali pa roznych kabinietach, i sudy prachodziać asobna.
Karespandent «NN» prysutničaje na sudzie nad Anatolem Labiedźkam.
Sudździa kaža lidaru AHP, što jaho chadajnictva ab advodzie sudździ adchilili, začytvaje pratakoł. Sam Labiedźka tym časam zalipaje ŭ płanšecie.
Sudździa pytajecca, ci zrazumieŭ sp. Labiedźka pratakoły. «Nie, — adkazvaje toj, — ja dumaŭ, u nas vybarčaja kampanija prachodzić».
Sudździa pytajecca, što jon rabiŭ kala HUMa 16 vieraśnia? Labiedźka adkazvaje, što prachodzić vybarčaja kampanija. — «Jakaja?» — «U interpretacyi ŭładaŭ, vybary prezidenta. U maim ujaŭleńni, vybary Łukašenki na pasadu», — adkazvaje Labiedźka.
Jon kaža, što ŭ prahramie Łukašenki nie było ničoha pra źnikłych. Raspaviadaje, što kolki hadoŭ prajšło i ničoha nie robicca.
Sudździa pytaje: navošta zaklikali da bajkotu?
Staršynia AHP adkazvaje: «My rabili toje ž, što rabili kandydaty ŭ prezidenty, u tym liku i Łukašenka. Čamu naŭprost hramadzianie nie mohuć vykazvacca, kali ich pazicyja adroźnivajecca?»
Pačynaje raskazvać sudździ pra ekanamičnyja prablemy, pra jakija ničoha nie znajšoŭ u prahramie Łukašenki.
Kaža, što art.45 vyb. kodeksu daje jamu prava iści da ludziej i ahučvać svaju pazicyju.
Kaža, što prapanavaŭ 11 kastryčnika ludziam pajechać u hryby, na rybałku, da cieščy vypić kilišak, heta nie zabaroniena
Śviedka amapaviec Aleh Baraznoŭ kaža, što Labiedźka 16 vieraśnia zaklikaŭ da bajkotu, na zaŭvahi nie reahavaŭ.
Labiedźka pakazvaje na płanšecie fotazdymki ź pikieta i kaža, što amapaŭca na ich niama. Amapaviec kaža: «Dyk voś ža ja», — i tykaje palcam u fota»
Labiedźka: «Dyk Vy ž biez formy»
Amapaviec: «Taki byŭ zahad».
Nastupny śviedka — učastkovy Centralnaha RAUS Minska. Jon kaža, što išoŭ 23 vieraśnia kala Ratušy, zaŭvažyŭ natoŭp, vyrašyŭ padyści bližej. Pacikaviŭsia, što tut, a tam na hanku Lebiedźko zaklikaŭ bajkatavać vybary.
Učastkovy zaznačaje, što padyšoŭ da Statkieviča i Labiedźki, skazaŭšy, što składzie pratakoł i prapanavaŭ razyścisia. «Nie pieraškadžajcie nam, afarmlajcie što chočacie», — pačuŭ u adkaz.
Labiedźka pytajecca, ci bačyŭ jon pikiety raniej. Śviedka adkazvaje, što tam, dzio jon nios słužbu, nivodnaha nie bačyŭ.
Nastupny śviedka — jašče adzin učastkovy Centralnaha RAUS Minska. Jon raspaviadaje pra pikiet 16 vieraśnia kala HUMa. Kaža, što spytaŭ, ci jość dazvoł. Labiedźka adkazaŭ, što dazvołu nie treba, i admoviŭsia padpisać pratakoł. Labiedźka pytajecca, čamu pratakoł nie padpisany dvuma śviedkami? Učastkovy adkazvaje, što śviedak nie znajšłosia.
Nastupny śviedka pryjšoŭ u chatnich napaŭspartovych štanach, heta Alaksandr Łaŭrecki, amapaviec.
Jaho apytvajuć pra 23 vieraśnia. Jon kaža, što jak zvyčajna nios słužbu, zaŭvažyŭ natoŭp, dzie Labiedźka zaklikaŭ nie chadzić na vybary.
Labiedźka znoŭ pakazvaje fotki na płanšecie: «A dzie vy stajali, kali ŭsio čuli?» Amapaviec pakazvaje: «Tut byŭ». Ale na fotazdymkach, ni Labiedźka, ni jon sam siabie nie znachodziać.
Źjaŭlajecca jašče adzin śviedka-amapaviec Janoŭski. Labiedźka prapanuje jamu znajści siabie na fota, toj nie znachodzić.
Sudździa dazvalaje lidaru AHP vystupić. Toj śćviardžaje, što ŭ nas nie vybary, a fars: adny majuć kanstytucyjnaje prava na kantakt z vybarščykami, inšyja takoha prava nie majuć, i śviedki sieńniašnija heta paćviardžajuć.
Labiedźka śćviardžaje, što siońniašni sud źviazany z akcyjaj suprać rasijskich vajennych baz, jakaja pavinna prajści 4 kastryčnika ŭ Minsku.
Labiedźka: «Dva śviedki prosta schłusili, jany skazali, što čuli maje razmovy ź milicyjantami, ale ž na fota śviedak niama. ich zahadzia prainstruktavali, jak vieści siabie na sudovym pracesie».
Labiedźka kaža, što, zhodna z artykułam 45 Vybarčaha kodeksa, dajecca prava abmiarkoŭvać prahramy kandydataŭ. I treba ci skazać, što vybaraŭ niama, ci dać narmalna pracavać Vybarčamu kodeksu.
«My ničoha nie parušali. ale kali chočacie znajści adkaznych, to ja biaru adkaznaść na siabie».
Anatol Labiedźka atrymaŭ dva štrafy: 5,4 młn i 1,8 młn rubloŭ.
Mikoła Statkievič za akcyju 23 vieraśnia atrymaŭ štraf — 9 młn rubloŭ, Uładzimir Niaklajeŭ — 3,6 młn (20 b.v.). Ale ich sudzili zavočna, bo na praces jany nie źjavilisia.
Mikałaj Kazłoŭ aštrafavany na 5,4 młn.
«Paśla 4 kastryčnika buduć zakryvać na sutki», — prakamientavaŭ Labiedźka.
***
Nahadajem, što za sustreču z narodam 10 vieraśnia kala HUMa Statkievič atrymaŭ 7,2 młn štrafu.