Navukoŭcy: Kureńnie zabje tracinu maładych kitajcaŭ
Kureńnie ŭ chutkim časie moža stać pryčynaj zaŭčasnaj śmierci traciny maładych ludziej u Kitai. Da takoj vysnovy pryjšli navukoŭcy z Oksfardskaha univiersiteta, Kitajskaj akademii miedycynskich navuk i Kitajskaha centra pa kantroli za zachvorvańniami.
AP
Vyniki daśledavańnia, apublikavanaha ŭ časopisie Lancet, śviedčać, što dźvie traciny maładych mužčyn u Kitai pačynajuć kuryć, nie dasiahnuŭšy 20 hadoŭ. I ŭ pałovie vypadkaŭ kureńnie stanie pryčynaj zaŭčasnaj śmierci.
Daśledavańni pravodzilisia dvojčy, ź pierapynkam u 15 hadoŭ, i achapili niekalki sotniaŭ tysiač ludziej.
Kali lik kurcoŭ u Kitai nie budzie skaračacca, to śmiarotnaść, źviazanaja z kureńniem, da 2030 hoda dasiahnie dvuch miljonaŭ čałaviek u hod. Aŭtary dakładu nazyvajuć heta «epidemijaj zaŭčasnaj śmiarotnaści».
«Kab spynić chvalu śmierciaŭ, treba kinuć [kuryć]. A kali vy jašče maładyja, nie pačynajcie», — kaža navukoviec Ryčard Peta z Oksfardskaha univiersiteta.
Pavodle daśledavańnia, za apošni čas kolkaść mužčyn-kurcoŭ u Kitai značna pavialičyłasia, i praparcyjna hetamu raście kolkaść śmierciaŭ ad zachvorvańniaŭ, vyklikanych kureńniem. U toj ža čas maładyja žančyny ŭ krainie mienš schilnyja da kureńnia.
Ułady Kitaja ŭžo vykazvajuć svaju zaniepakojenaść. Z 1 červienia hetaha hoda ŭ Piekinie ŭstupiła ŭ siłu zabarona na kureńnie ŭ hramadskich miescach.
Novy zakon zabaraniaje kuryć u restaranach, ustanovach i hramadskim transparcie ŭ Piekinie. Tysiačy inśpiektaraŭ buduć sačyć za jaho vykanańniem. Parušalnikam pahražaje štraf u 200 juaniaŭ (32 dalara).
Adnak efiektyŭnamu vykanańniu zakona pieraškadžaje papularnaść kureńnia siarod nasielnictva, a taksama toj fakt, što prodaž cyharet prynosić značnyja prybytki dziaržavie.
Suśvietnaja Arhanizacyja Achovy zdaroŭja zajaŭlaje, što ŭ cełym u śviecie prykładna pałovu kurcoŭ čakaje zaŭčasnaja śmierć.