Biełaruś zaniała ŭ rejtynhu Doing Business 44-ju pazicyju
Biełaruś zaniała ŭ rejtynhu Doing Business-2016 («Viadzieńnie biźniesu-2016») 44-ju pazicyju siarod 189 dziaržaŭ, pa jakich pravodzicca heta daśledavańnie.
Zhodna z anałahičnaj spravazdačaj, apublikavanaj u kastryčniku minułaha hoda, kraina zajmała 57-je miesca. Razam z tym paśla tradycyjnaha pierahladu vynikaŭ papiaredniaha spravazdačnaha pieryjadu, źviazanaha z abnaŭleńniem danych, zasnavanym na pradstaŭleńni krainami — udzielnicami daśledavańnia dadatkovych materyjałaŭ i kamientaryjaŭ, a taksama ŭ suviazi sa źmianieńniem mietadałohii acenki pakazčykaŭ, farmalna ličycca, što Biełaruś zajmała ŭ spravazdačy Doing Business-2015 nie 57-je, a 43-je miesca.
U hłabalnym rejtynhu Sinhapur zachavaŭ svaju pazicyju lidara. U dziasiatcy krain z najbolš spryjalnymi ŭmovami dla pradprymalnickaj dziejnaści za Sinhapuram iduć Novaja Ziełandyja, Danija, Respublika Kareja, Hankonh (Kitaj), Vialikabrytanija, ZŠA, Šviecyja, Narviehija i Finlandyja.
Siarod krain postsavieckaj prastory samaje vysokaje miesca (16) zajmaje Estonija. Śledam za joj iduć Litva (20), Łatvija (22) i Hruzija (24). Dalej iduć Armienija (35), Kazachstan (41), Rasija (51), Małdova (52), Azierbajdžan (63), Kyrhyzstan (67), Ukraina (83), Uźbiekistan (87), Tadžykistan (132).
U struktury śfier «žyćciadziejnaści» biźniesu, što daśledujucca pry składańni spravazdačy «Viadzieńnie biźniesu-2016», skłalisia nastupnyja pazicyi Biełarusi (z ulikam karekciroŭki vynikaŭ papiaredniaj spravazdačy): «Rehistracyja pradpryjemstvaŭ» — 12-je miesca (u spravazdačy «Viadzieńnie biźniesu-2015» — 39); «Atrymańnie dazvołaŭ na budaŭnictva» — 34-je miesca (34); «Padklučeńnie da sistemy enierhazabieśpiačeńnia» — 89-je miesca (85); «Rehistracyja ŭłasnaści» — 7-je miesca (6); «Atrymańnie kredytu» — 109-je miesca (105); «Abarona minarytarnych inviestaraŭ» — 57-je miesca (54); «Padatkaabkładańnie» — 63-je miesca (60); «Mižnarodny handal» — 25-je miesca (25); «Vyrašeńnie niepłaciežazdolnaści» — 69-je miesca (68).
U Minekanomiki padkreślili, što ŭ spravazdačy «Viadzieńnie biźniesu-2016» dla Biełarusi zafiksavany dźvie stanoŭčyja reformy: skaračeńnie ahulnaha terminu dziaržaŭnaj rehistracyi nieruchomaj majomaści, pravoŭ na jaje i ździełak ź joj, z mahčymaściu ažyćciaŭleńnia rehistracyjnych dziejańniaŭ u terminovym paradku — na praciahu adnaho rabočaha dnia (pakazčyk «Rehistracyja ŭłasnaści»), a taksama ŭviadzieńnie dla subjektaŭ haspadarańnia elektronnaj dziaržaŭnaj rehistracyi (pakazčyk «Rehistracyja pradpryjemstvaŭ»). Spraščeńnie pravił uvachodžańnia ŭ biźnies dało mahčymaść palepšyć rejtynhavyja pazicyi krainy pa pakazčyku «Rehistracyja pradpryjemstvaŭ» adrazu na 27 punktaŭ.
Sukupny rejtynh spryjalnaści ŭmoŭ viadzieńnia biźniesu zasnoŭvajecca na pakazčyku addalenaści ad pieradavoha rubiaža (PR). Jon pakazvaje, nakolki pravavy režym, jaki rehuluje dziejnaść subjektaŭ haspadarańnia toj ci inšaj krainy, nabližany da pieradavych praktyk u śfiery rehulavańnia pradprymalnickaj dziejnaści. Čym vyšejšy bał, atrymany pa pakazčyku addalenaści ad pieradavoha rubiaža (składaje ad 0 da 100), tym bolš spryjalnaje pradprymalnickaje asiarodździe i bolš tryvałyja pravavyja instytuty ŭ krainie. U daśledavańni «Viadzieńnie biźniesu-2016» pakazčyk addalenaści ad pieradavoha rubiaža dla Biełarusi skłaŭ 72,33 bała (palepšany da papiaredniaha spravazdačnaha pieryjadu na 0,54 bała). «Heta daje mahčymaść havaryć ab tym, što razryŭ pamiž dasiahnieńniami krainy i pieradavym rubiažom, raźličanym na padstavie najlepšych pakazčykaŭ pa ŭsich krainach i za ŭsie hady, składaje 27,67 bała», — rastłumačyli ŭ Minekanomiki.
Biełaruś na praciahu apošnich hadoŭ zachoŭvaje lidzirujučyja pazicyi pa ahulnaj kolkaści praviedzienych reform, nakiravanych na palapšeńnie dziełavoha klimatu. Tak, pačynajučy z 2006 hoda, zhodna z apublikavanymi na aficyjnym sajcie Suśvietnaha banka danymi, u našaj krainie zafiksavany 32 reformy. Biełaruś pryznana adnym ź viadučych u śviecie refarmataraŭ i zajmaje čaćviortaje miesca siarod 189 krain śvietu pa kolkaści praviedzienych reform va ŭsich śfierach dziejnaści za apošnija 10 hadoŭ.
«U cełym vyniki daśledavańnia «Viadzieńnie biźniesu-2016» pakazali, što, niahledziačy na isnujučyja dasiahnieńni ŭ stvareńni spryjalnych umoŭ dla raźvićcia biźniesu, rezierv u hetym napramku dla Biełarusi zastajecca značnym. Urad krainy maje namier i dalej pravodzić reformy va ŭsich śfierach pradprymalnickaj dziejnaści, uličvajučy rekamiendacyi Suśvietnaha banka i stanoŭčy vopyt zamiežnych krain, z metaj raźvićcia pryvatnaha siektara ekanomiki i palapšeńnia ŭmoŭ dla viadzieńnia biźniesu», — zapeŭnili ŭ Minekanomiki.
Spravazdača «Viadzieńnie biźniesu» pravodzić analiz pravavych norm, što prymianiajucca adnosna pryvatnych pradpryjemstvaŭ pa 11 halinach ich žyćciovaha cykłu. U biahučym hodzie dziesiać z hetych halin byli ŭklučany ŭ sukupny rejtynh spryjalnaści ŭmoŭ viadzieńnia biźniesu. U ich lik uvachodziać: stvareńnie pradpryjemstvaŭ, atrymańnie dazvołaŭ na budaŭnictva, padklučeńnie da elektrazabieśpiačeńnia, rehistracyja ŭłasnaści, atrymańnie kredytaŭ, abarona pravoŭ minarytarnych inviestaraŭ, padatkaabkładańnie, mižnarodny handal, zabieśpiačeńnie vykanańnia kantraktaŭ i vyrašeńnie niepłaciežazdolnaści pradpryjemstvaŭ. Daśledavańnie «Viadzieńnie biźniesu» taksama vymiaraje rehulavańnie rynku pracy — pakazčyk, jaki ŭ hetym hodzie nie ŭvachodzić u rejtynh.
Z červienia 2014-ha pa červień 2015 hoda daśledavańnie «Viadzieńnie biźniesu-2016», jakoje achoplivaje 189 krain, zafiksavała 231 reformu ŭ śfiery rehulavańnia biźniesu. Ź liku realizavanych reform, nakiravanych na spraščeńnie i źnižeńnie koštu vykanańnia pravavych norm, taksama jak i ŭ minułym spravazdačnym pieryjadzie, najbolšaja kolkaść reform zafiksavana ŭ śfiery spraščeńnia pracedur stvareńnia pradpryjemstvaŭ. Nastupnymi pa papularnaści stali reformy ŭ śfiery padatkaabkładańnia, padklučeńnia da elektrazabieśpiačeńnia i rehistracyi ŭłasnaści.