U Bałharyi aryštavali lidara prarasiejskaj partyi
U Bałharyi aryštavali lidara nacyjanalistyčnaj partyi «Ataka» Volena Siderava z-za skandału sa źbićciom palicejskaha. Pavodle dadzienych prakuratury Bałharyi, palityku pahražaje da troch hadoŭ pazbaŭleńnia voli, piša Reuters.
judicialreports.bg
Volen Sideraŭ, lidar nacyjanalistyčnaj partyi «Ataka», viadomaj svaimi antynataŭskimi i antyjeŭrapiejskimi pohladami, abvinavačvajecca ŭ ździajśnieńni chulihanstva.
Zhodna z zakanadaŭstvam Bałharyi, Siderava mohuć utrymlivać pad vartaj da 72 hadzin, paśla čaho sud Safii pavinien pryniać rašeńnie ab dalejšaj miery strymańnia.
Partyja «Ataka» taksama viadomaja svaimi prarasiejskimi nastrojami. Palityk i jaho partyja vystupajuć za adradžeńnie Rasii ŭ vyhladzie novaj dziaržavy, anałahičnaj SSSR. Taksama partyja rašuča padtrymlivaje ŭvarvańni Rasii ŭ Ukrainu, u tym liku i anieksiju Krymskaha paŭvostrava.
Raniej parłamient Bałharyi pazbaviŭ imunitetu Siderava i jaho paplečnika Desisłava Čukałava pa spravie ab incydencie, jaki adbyŭsia ŭ minułym miesiacy.
Palityk i hrupa jaho paplečnikaŭ 23 kastryčnika ŭvarvalisia ŭ budynak Nacyjanalnaj akademii mastactva teatra i kino Bałharyi i ŭčynili słoŭnuju svarku sa studentam. Na miesca prybyła palicyja, i ŭ momant zatrymańnia Sidieraŭ ŭdaryŭ adnaho palicejskaha pa tvary.