U Minsku za marychuanu sudziać akciora Kupałaŭskaha, uvieś kalektyŭ pryjšoŭ u sud padtrymać kalehu
abnaŭlajecca anłajn
U sudzie Kastryčnickaha rajona Minska pačaŭsia praces akciora Kupałaŭskaha teatra Arcioma Barodziča.
Arciom Barodzič siońnia ŭ čas suda pryznaŭsia, što ŭžyvaje marychuanu raz-dva ŭ miesiac na praciahu apošnich šaści hadoŭ, paviedamlaje z zały suda karespandent «Našaj Nivy».
«Marychuanu spažyvaju z-za stresaŭ na pracy», — apraŭdvaŭsia jon.
U 2010 hodzie sud Kastryčnickaha rajona Viciebska ŭžo vynosiŭ jamu prysud za niezakonny abarot narkotykaŭ. «Tady mianie prysudzili da hoda ŭmoŭna».
«Ja pryznaju, što ŭžyvaŭ i zachoŭvaŭ marychuanu. Ale mety zbytu ŭ mianie nie było. Ja nabyvaŭ jaje zaŭsiody tolki dla siabie», — skazaŭ Barodzič.
Jon raskazaŭ, što tuju marychuanu, za jakuju jaho «ŭziali», jon kupiŭ u niejkaha Siarhieja.
«Niekalki hadoŭ na zdymkach paznajomiŭsia ź dziaŭčynaj, a jana mianie paznajomiła sa svaim znajomym, jaki pradstaviŭsia Siarhiejem. Jon skazaŭ, što moža pradać mnie marychuany», — raskazaŭ Barodzič.
Dalej, pavodle akciora, Siarhiej zapisaŭ jahony numar i sam telefanavaŭ, kali ŭ jaho byli narkotyki na prodaž.
Usiaho Barodzič niekalki razoŭ kuplaŭ u narkahandlara marychuanu. Kožny raz — pa 50 hram za 750 dalaraŭ.
«Jak pačaŭsia ciažki teatralny siezon, to vyrašyŭ nabyć sabie štości supakojvajučaje i rassłablalnaje», — adkazaŭ Barodzič na pryčyny novaj pakupki.
Barodzič raskazaŭ, što pieršy raz pakaštavaŭ narkotyki ŭ kampanii siabroŭ — «pačastavali».
«Ja — akcior teatra i kino, časta zdymajusia. Rabota napružanaja i źviazanaja z emacyjnymi stresami i nervami. Da taho ž, ščylnaja zahružanaść — ad 6 da 10 śpiektaklaŭ u miesiac, byvała pa 4 śpiektakli za dva dni, plus repietycyi. Ja pracuju ščyra, a kali pracavać ščyra, to ŭsich piersanažaŭ prapuskaješ praź siabie, heta stres i šok dla arhanizmu. Treba było rassłabicca», — raskazaŭ Barodzič pra toje, čamu kuryŭ narkotyki.
Pry hetym akcior padkreślivaŭ, što marychuanu kuplaŭ tolki dla siabie, a nie na raspaŭsiud
«Bolš za toje, ja chavaŭ heta. Bo taki aśpiekt nie charaktarazujecca sa stanoŭčaha boku»,— skazaŭ akcior pra svajo zachapleńnie marychuanaj.
Na pasiadžeńni 23 lutaha była dapytanaja sužycielnica Barodziča. Jana ciažarnaja, bačny nievialički žyvot. «Ja nie viedała, što Arciom štości ŭžyvaje», — patłumačyła sudu Natalla. Pavodle žančyny, jana bačyła ŭ ladoŭni słoik, dzie Barodzič chavaŭ marychuanu. Ale, kali jana spytała, što tam, to toj adkazaŭ joj, što tam «asabistyja rečy». A pryvatnych rečaŭ, maŭlaŭ, jana nie čapała.
Budučaja žonka Barodziča pasprabavała patłumačyć schilnaść akciora da narkotykaŭ ciažkaj pracaj i źmienaj unutranych stanaŭ praź źmienu rolaŭ.
Na sud pryjšoŭ narodny artyst Biełarusi Viktar Manajeŭ. Fota sputnik.by.
Situacyja akciora niaprostaja. Što źviarnuła ŭvahu – jahonyja kalehi, usio adno, družna pryjšli jaho padtrymać.
Vystupiŭ mastacki kiraŭnik Kupałaŭskaha teatra Mikałaj Pinihin.
Režysior prasiŭ miakkaha pakarańnia akcioru.
Jon adznačyŭ, što Barodzič adnosicca da takoha typu artystaŭ, jakich mała.
«Heta mahutny prafiesijanał, — skazaŭ Pinihin sudu. — Pry horšym skančeńni spravy heta budzie vializnaja ctrata dla nas. Zrazumiejcie, što ŭ Nacyjanalny akademičny teatr vypadkovyja ludzi nie traplajuć. Arciom pryjšoŭ da nas u 2009 hodzie i za karotki čas staŭ adnym ź viadučych akcioraŭ».
Pinihin skazaŭ, što navat kali Barodziča asudziać, to teatr budzie ź im supracoŭničać i paśla adbyćcia pakarańnia.
«Za tyja hrošy, što nam płacić dziaržava, vypadkovyja ludzi ŭ teatry nie pracujuć. Tam pracujuć ludzi, jakija žyvuć hetaj prafiesijaj», — skončyŭ Pinihin.
U zale suda sabralisia akciora Kupałaŭskaha i teatralnyja krytyki. Krajni źleva — akcior Raman Padalaka. U aranžavym džempiery — akcior Aleh Harbuz. Pamiž imi — teatralny krytyk Dzianis Marcinovič.
Jak śviedka ad abarony vystupiŭ i viadomy akcior Pavieł Charłančuk. «Heta adzin z najlepšych akcioraŭ u svaim pakaleńni, kažu jak kaleha», — pačaŭ Charłančuk.
«Arciom — vielmi pavažany čałaviek. Napeŭna, niama ŭ teatry ludziej, ź jakimi b jon byŭ u kanflikcie. Hetaja tema visić u teatry piermanientna, my zabyvajemsia na heta tolki padčas śpiektaklaŭ, bo Arciom nam jak svajak», — skazaŭ Charłančuk.
Taksama jon dadaŭ, što nikoli nie čuŭ ad Barodziča słovaŭ pra narkotyki, maŭlaŭ, hetaja sprava dla kaleh — poŭnaja niečakanaść.
Ad 10 ranicy dahetul nie prahučała nivodnaha śviedčańnia na karyść taho, što Barodzič raspaŭsiudžvaŭ narkotyki.
A pałovie na čaćviortuju prakuror pačaŭ začytvać charaktarystyku Barodziča z Kupałaŭskaha teatra. Taja napisanaja pa-biełarusku, tamu prakuror čytaje ledź nie pa składach: «pavodle Ada-moviča», «apan-tany».
Pavodle miedyčnaj ekśpiertyzy, Barodzič nie maje ałkaholnaj ci narkatyčnaj zaležnaści. U centry psichijatryi na ŭliku nie staić, u narkatyčnych i ałkaholnych dyspansierach na ŭliku nie staić, śviedčyć prakuror.
Vyhladaje, što sproba abvinavacić Barodziča ŭ raspaŭsiudzie hruntujecca tolki na abjomie znojdzienaj marychuany — kala 25 h.
Śviedkaŭ z boku abvinavačańnia, jakim by akcior prapanoŭvaŭ narkotyki, u sudovaj zale nie było.
«Navošta vam treba było stolki marychuany?» — pytajecca prakuror.
«Heta ŭsio dla svajho vykarystańnia. Nikoha častavać ci pradavać ja nie źbiraŭsia», — paŭtaraje Barodzič.
«Dyk a navošta ŭžyvali?» — znoŭ kaža prakuror.
« Dla źniaćcia stresu, była i biassońnica», — adkazvaje akcior.
«A čaho nie pajšli da doktara?»
«Nie ličyŭ siabie nastolki chvorym».
A 16-j u sudovym pracesie byŭ abvieščany pierapynak da zaŭtrašniaha dnia.
Pakul što sprava vyhladaje dosyć niezrazumieła.
Pa-pieršaje, nie jasna, jakim čynam na Barodziča vyjšli, bo nivodnaha śviedki z boku abvinavačańnia nie było. Ale i zatrymlivaŭ akciora pahraničny (!) śpiecnaz.
Taksama dziŭna, što taho «Siarhieja», jaki pradavaŭ Barodziču narkotyki, nie znajšli.
Dyk adkul ža siłaviki daviedalisia, što ŭ Barodziča doma jość narkotyki?
Taksama, pavodle Barodziča, vynikaje, što za niapoŭnych 2 miesiacy jon skuryŭ 25 hramaŭ marychuany — u vieraśni jon kupiŭ 50, a padčas zatrymańnia 22 kastryčnika zastałasia pałova.
Atrymlivajecca, što jon kuryŭ niedzie praź dzień (pa 0,7 hramy za raz). A adzin hram marychuany kaštuje 15 dalaraŭ! Adkul u aktora Kupałaŭskaha takija hrošy, kab zadavolvać svaju zvyčku? Kali sam Pinihin kazaŭ, što ludzi pracujuć tam za ideju?
Zaŭtra my musim pačuć adkazy na hetyja pytańni.
***
Arciom Barodzič abvinavačvajecca pa č.2 art.328 (niezakonny abarot narkatyčnych srodkaŭ, psichatropnych rečyvaŭ, ich prekursoraŭ i anałahaŭ) Kryminalnaha kodeksa Biełarusi. Jamu pahražaje pazbaŭleńnie voli na 5—8 hadoŭ z kanfiskacyjaj abo biez kanfiskacyi majomaści.
U kastryčniku 2015 hoda Barodzič byŭ zatrymany supracoŭnikami pravaachoŭnych orhanaŭ u siabie ŭ kvatery. U jaho znajšli 26 hram marychuany. Pakul išło rasśledavańnie, akcior zastavaŭsia na voli, ihraŭ u śpiektaklach. Adnak zatym jaho dziejańni pierakvalifikavali na bolš ciažkaje złačynstva, i 25 studzienia Arciomu Barodziču pradjavili ŭžo kančatkovaje abvinavačańnie pa č. 2 art. 328 KK. Ciapier jaho abvinavačvajuć «u niezakonnych dziejańniach z metaj zbytu», nabyćcia i zachoŭvańnia marychuany. U toj ža dzień jaho ŭziali pad vartu.
Niekalki hadoŭ tamu Barodzič taksama pryciahvaŭsia da kryminalnaj adkaznaści za niezakonnaje zachoŭvańnie niebiaśpiečnych narkatyčnych srodkaŭ.