Pradstaŭnictva AAN nie zaprasiła «Viasnu» na mižnarodnuju kanfierencyju, bo jana niezarehistravanaja
10 sakavika ŭ Miensku projdzie mižnarodnaja kanferencyja, pryśviečanaja śmiarotnamu pakarańniu. Pravaabarončy centar «Viasna», jaki nia pieršy hod zajmajecca pytańniem admieny śmiarotnaha pakarańnia ŭ Biełarusi, nie atrymaŭ zaprašeńnia na hetuju kanferencyju.
Pradstaŭnik «Viasny» Valancin Stefanovič tak prakamentavaŭ hetuju sytuacyju: «Heta praciah palityki MZS, jakoje pryncypova nie zaprašaje nas na mierapryjemstvy, jakija ładziacca pry ich udziele, pakolki my nia majem aficyjnaj rehistracyi. Ja razumieju, što prablema ŭ hetym. Bo kali byli kansultacyi pa ŭniversalnym peryjadyčnym ahladzie, jakija MZS ładziŭ ź niaŭradavymi arhanizacyjami, nas taksama nie zaprašali, choć my aktyŭna ŭdzielničali ŭ pracedury ŭniversalnaha peryjadyčnaha ahladu, rychtavali alternatyŭnuju spravazdaču, raspracoŭvali rekamendacyi. Z adnaho boku, jany nas nie rehistrujuć, a ź inšaha — nie zaprašajuć na roznyja mierapryjemstvy, bo my nie zarehistravanyja. Ale toje, što mižnarodnyja arhanizacyi taksama faktyčna padtrymlivajuć takija padychody padziełu arhanizacyjaŭ na «zarehistravanyja» i «niezarehistravanyja», «drennyja» i «dobryja», — heta niadobra dla pravaabarončaha sektaru».
Sama sytuacyja ź nierehistracyjaj «Viasny» nienarmalnaja. Bo ŭ nas jość dva rašeńni Kamitetu pa pravach čałavieka AAN adnosna likvidacyi našaj arhanizacyi i troch admovaŭ u jaje rehistracyi, dzie jość patrabavańnie da ŭładaŭ ab rehistracyi. Ale ŭłady hetaha nie vykonvajuć.
Dahetul dziejnaść niezarehistravanych arhanizacyjaŭ u nas kryminalizavanaja, kryminalnaja adkaznaść za heta jość, choć i nie prymianiajecca. Ale, niahledziačy na ŭsio heta, my i nadalej budziem pracavać u miežach kampanii «Pravaabaroncy suprać śmiarotnaha pakarańnia».
Arhanizataram kanferencyi vystupaje pradstaŭnictva Prahramy raźvićcia AAN pry finansavaj padtrymcy ambasady Vialikabrytanii ŭ Biełarusi.
Presavy sakratar Pradstaŭnictva AAN u Biełarusi Viktar Radzivinoŭski tak patłumačyŭ sytuacyju:
«Pryncyp zaprašeńnia na mierapryjemstva taki — arhanizacyja pavinna isnavać i być zarehistravanaj. Kali Biełaruski Chelsynski Kamitet zarehistravany ŭ Biełarusi, jon zaprošany dla ŭdziełu. Hetak ža z «Pravavoj inicyjatyvaj» i BAŽ. Tamu taki pryncyp, inšaha nia dadziena. «Viasna» nie zarehistravanaja, tamu jaje i nie zaprašali».
Adnak udzielniki kanferencyi planujuć sustrecca pa-za ramkami kanferencyi taksama z pravaabaroncami «Viasny». U pryvatnaści, na sustreču ich zaprasiŭ specyjalny pradstaŭnik Eŭrapiejskaha Źviazu pa pravach čałavieka Staŭras Łambrynidzis, jaki naviedaje Biełaruś z pracoŭnym vizytam z 8 pa 11 sakavika. Siarod udzielnikaŭ kanferencyi taksama značycca dakładčyk pa Biełarusi kamisii Parlamenckaj asamblei Rady Eŭropy pa palityčnych pytańniach i demakratyi Andrea Ryhoni.