U Viciebsku akcioraŭ paprasili zapłacić za padoranyja kvietki
Historyja, jakaja prymusiła b Zoščanku i Daŭłatava ŭziacca za piaro, adbyłasia ŭ Viciebsku.
Nie, heta nie miljon punsovych ružaŭ sa staroj pieśni Puhačovaj. Heta kvietki koštam amal miljon rubloŭ, padoranyja zdymačnaj hrupie filma «Hraf u apielsinach» u kancy sakavika na premjery ŭ Viciebsku.
Akcior Saša Laśko z tymi samymi kvietkami
Natchnionyja sustrečaj ź viciebskaj publikaj i miascovymi prakatčykami, artysty i režysior viarnulisia ŭ Miensk. A praz tydzień atrymali rachunak za padoranyja kvietki — 927 tysiač rubloŭ, piša gazetaby.com.
Režysior filma «Hraf u apielsinach» Ułada Siańkova (fota Siarhiej Bałaj / gazetaby.com)
Atrymaŭšy akt ad «Viciebskaha kinavideaprakatu», režysior Ułada Siańkova achnuła ad ździŭleńnia.
— Ja patelefanavała hałoŭnamu buchhałtaru i pačuła: «Ja kazała dyrektaru, što ŭ nas niama hrošaj na kvietki». Havorka idzie pra dyrektara kinateatra. — «Jak ža tak? Navošta nam ich daryli?» — Spytała ja. — «Źviartajciesia ŭ sud!» — zajaviła buchhałtar. — «Nu, vy ž razumiejecie, što ja źviarnusia». — «Dy kali łaska», — buchhałtar adklučyłasia.
Za prakat filma ŭ Viciebsku jaho aŭtary zarabili krychu mienš za miljon rubloŭ. Akramia rachunku za kvietki, z hanararu adniali zatraty na raźmiaščeńnie afiš na tumbach horada.
— Pieršapačatkova ahavorvałasia, što afišy drukujem my, a raźmiaščajuć jany. Heta značyć, pa fakcie jany ž sami sabie i zapłacili za rasklejku hetych afiš, — tłumačyć Ułada Siańkova.
Nahadajem, film pra biełaruskich padletkaŭ «Hraf u apielsinach» režysior Ułada Siańkova źniała na ŭłasnyja srodki, akciory i apieratary pracavali na vałanciorskich pačatkach.
Ciapier tvorčaja bryhada zajmajecca arhanizacyjaj prakatu filma pa Biełarusi, kab za vyručanyja srodki ŭdzielničać u kinafiestyvalach.
— Biełaruskaje kino i tak biez hrošaj, biez pradziusaraŭ, biez asablivych dystrybjutaraŭ, biez zaachvočvańnia Minkulta sprabuje zarabić hetuju drobiaź, kab addać daŭhi za zdymki i jašče vialikija vydatki na rekłamu, a tut jaho hałoŭbuch viciebskaha kinavideaprakatu dabivaje, — piša Ułada Siańkova ŭ fejsbuku.
Zrešty, heta jašče kvietački. Raniej režysior pisała pra ciažkaści, źviazanyja z prakatam.
— Moj znajomy z Krakava — fokuśnik — vystupaje na vulicy. Niejak raz jaho prahnali. Jon aburyŭsia i napisaŭ pra heta ŭ fejsbuku. Jamu asabista patelefanavali, doŭha pieraprašali, a potym navat prapanavali padumać, što moža palepšyć moładzievy vuličny ruch horada. Moj znajomy siadzieŭ, papivajučy kavu, i pierabiraŭ varyjanty: a moža, pastavić pijanina na płoščy? A moža, toje? A moža, sioje?
Biełaruś, 2016 hod. Hod kultury. U adnym horadzie kino zabaraniajuć. U inšym horadzie jano nie adpaviadaje marali. U trecim horadzie kino pakažuć tolki dla školnikaŭ. …Voś tak za košt školnikaŭ biełaruskaje kino i žyvie. Da pary apłat usialakich fsznaŭ, viadoma. …Biełaruskaje kino ŭ rehijonach u prajm-tajm čaściej za ŭsio nie staviać. Tamu što na jaho nichto nie chodzić. …Modu na biełaruskaje kino raźvivać nichto nie choča. Nu, tolki kali ty ŭžo ŭvieś śviet zavajavaŭ — voś tady tak.