U Viarchoŭnuju Radu Ukrainy ŭniasuć zakonaprajekt ab maratoryi na vydaču biełaruskich dobraachvotnikaŭ Minsku
12 krasavika narodny deputat Ukrainy Ihar Huź razam ź biełaruskimi dobraachvotnikami — bajcom Taktyčnaj hrupy Biełaruś pry «Dobraachvotnickaj Ukrainskaj armii» Janam Mielnikavym i Illoj Chrenavym z pałka «Azoŭ» — praviali bryfinh ŭ ścienach Viarchoŭnaj Rady Ukrainy.
Ihar Huź źviarnuŭsia da kiraŭnictva ŭkrainskaj dziaržavy i pravaachoŭnych orhanaŭ z patrabavańniem nie vydavać dazvoł na ekstradycyju zamiežnych hramadzian, jakija vajavali za Ukrainu na Danbasie. Deputat adznačyŭ, što ciapier u Biełarusi adbyvajucca nadzvyčajnyja padziei - niadaŭna ŭ baćkoŭ biełaruskich dobraachvotnikaŭ prajšli pieratrusy i na ich siemji praciahvajecca psichałahičny cisk, a va Ukrainie im pahražaje ekstradycyja.
«Jość takaja infarmacyja. Faktyčna biełaruskaje KDB i prezident Łukašenka choča i sprabuje paŭpłyvać na ŭkrainskuju ŭładu, kab viarnuć dobraachvotnikaŭ u Biełaruś, a tam adpaviedna ich čakajuć sudy», — adznačyŭ Ihar Huź.
Narodny deputat paviedamiŭ, što jon z kalehami ŭ parłamiencie inicyjuje padaču zakonaprajekta pra maratoryj na ekstradycyju hramadzian zamiežnych dziaržaŭ, jakija vajavali za Ukrainu. «Heta — pryncypovaje pytańnie, i my pavinny abaranić chłopcaŭ, jakija ryzykujuć žyćciom za cełasnaść i suvierenitet ukrainskaj dziaržavy. Mnohija ź ich stracili tam žyćcio. I što atrymlivajecca? Naša dziaržava pahražaje dobraachvotnikam pajści na supracoŭnictva z «karnymi» orhanami Respubliki Biełaruś i «zdać» hetych chłopcaŭ u turmu. Prašu kiraŭnictva dziaržavy nie hrać u takija hulni. U bližejšy čas my ŭniasiom adpaviedny zakonaprajekt u Viarchoŭnuju Radu», — zajaviŭ deputat.
Jan Mielnikaŭ raspavioŭ, što jon na froncie z samaha pačatku vajennych dziejańniaŭ na uschodzie Ukrainy, vajavaŭ za Krasnaarmiejsk i Aŭdziejeŭku. «Dziakujučy nam hetyja harady zastalisia ŭkrainskimi. Zatym byŭ u «haračych kropkach» u vioskach Piaski i Biełakamienka. My pryjechali na dapamohu brackamu narodu. My razumiejem, što siońnia Ukraina, jakaja ŭziała na siabie ŭdar, adstojvaje nie tolki svaje intaresy, ale i intaresy ŭsioj Uschodniaj Jeŭropy. I my zmahajemsia na ŭkrainskim boku, adstojvajučy svabodu Biełarusi. Ale ciapier padvierhlisia represijam z boku biełaruskich uładaŭ. U našych siemjach - pieratrusy i maralny cisk na baćkoŭ. I Rasija, i Biełaruś ažyćciaŭlajuć palityčny cisk na siemji dobraachvotnikaŭ. Ja źviartajusia da ŭkrainskich deputataŭ pryniać našu pietycyju na zakanadaŭčym uzroŭni ŭ jakaści narmatyŭna-pravavoha dakumienta, jaki daść nam harantyju ad niezakonnaj ekstradycyi», — zajaviŭ dobraachvotnik.
Illa Chrenaŭ, instruktar pałka «Azoŭ» dadaŭ: «Takich, jak my, šmat u inšych dobraachvotnickich bataljonach. Prosim dapamohi va ŭkrainskich uładaŭ u stvareńni lehalizavanaha dabravolnickaha bataljonu, dzie buduć sabranyja ŭsie zamiežnyja dobraachvotniki, jakija pryjechali baranić cełasnaść i suvierenitet ukrainskaj dziaržavy». Taksama biełaruskija dobraachvotniki padziakavali za mahčymaść vykazać svaju pazicyju ŭ ścienach Viarchoŭnaj Rady Ukrainy.
Nahadajem, što 4 krasavika Pałata pradstaŭnikoŭ Biełarusi ŭniesła źmieny ŭ zakanadaŭstva krainy da artykuła «najmictva». Kali raniej pavadle zakonu najmitami ličylisia ludzi, jakija za ŭdzieł u vajnie ŭ inšaj krainie atrymlivali hrošy, to ciapier najmitami mohuć być pryznanyja i asudžanyja ludzi, jakija vajavali nie za hrošy, a pa idejnych matyvach.