Strałkoŭ-Hirkin stvaryŭ arhanizacyju, jakaja budzie zmahacca za «viartańnie ŭ skład Rasii» Biełarusi i Ukrainy
U Maskvie ŭ subotu apublikavanaja «Palityčnaja deklaracyja ahulnarasiejskaha nacyjanalnaha ruchu» pad kiraŭnictvam Ihara Hirkina (pseŭdanim Strałkoŭ) — byłoha «ministra abarony» «DNR», viadomaha palavoha kamandzira.
novorossia.pro
Metaj arhanizacyi, na schodzie jakoj u subotu ŭdzielničali da paŭtary dziesiatkaŭ čałaviek, nazyvajecca «adradžeńnie Rasiei ŭ jakaści rasiejskaj nacyjanalnaj dziaržavy, jakaja słužyć intaresam rasiejskaj nacyi».
«My nie pryznajem ni savieckaha terytaryjalnaha dzialeńnia, ni Biełavieskaj damovy. Ziemli, na jakich žyvuć ruskija ludzi, palityja kryvioju ruskich ludziej, majuć prava viarnucca ŭ skład Rasiei. My vystupajem za abjadnańnie RF, Ukrainy, Biełarusi, a taksama inšych ruskich ziamiel u adzinaj ahulnaruskaj dziaržavie i pieratvareńnie ŭsioj terytoryi byłoha SSSR u biezumoŭnuju rasiejskuju zonu ŭpłyvu. My padtrymlivajem lubyja namahańni rasiejskich ludziej pa abjadnańni, adkul by jany ni zychodzili», — adznačajecca ŭ deklaracyi.
U tekście havorycca, što ŭdzielniki ahulnaruskaha nacyjanalnaha ruchu zmahajucca za pravy, svabody i intaresy ruskich, jakija žyvuć u inšych dziaržavach i «pakutujuć ad dyskryminacyi».
Ihar Strałkoŭ-Hirkin staŭ šyroka viadomy ŭ krasaviku 2014 hoda, kali jaho niezakonnaje ŭzbrojenaje farmavańnie zachapiła horad Słaviansk. Mienavita dzień zachopa Słavianska pryniata ličyć pačatkam vajny na Danbasie.