Deputat Zdanovič vostra krytykuje admienu 12-hodki
«Nahruzka pieraniasiecca sa škoły dadomu, źnizicca kolkaść nastaŭnikaŭ, a praź niekatory čas našy dzieci i ŭnuki buduć pracavać na kitajskich pradpryjemstvach, raźmieščanych u Biełarusi, a kiravać pradpryjemstvam buduć kitajcy, bo buduć bolš adukavanymi», — kaža deputat.
Pavodle jaho słoŭ, pry pierachodzie na 11‑hadovuju adukacyju adnym z varyjantaŭ reformy ŭ škole adnačasova prapanoŭvajecca źmienšyć kolkaść urokaŭ «da biaźmiežna nizkaj kolkaści».
«Na adnaho vučnia budzie prypadać mienš za 800 urokaŭ u hod. Dla paraŭnańnia, u Kitai — 1.500 pry 12‑hadovym navučańni ŭ škole. Heta pryviadzie da taho, što vučniam daviadziecca doma samim biez nastaŭnikaŭ prapracoŭvać tyja ž samyja temy, prahramy. Navučalnaja nahruzka pieraniasiecca sa škoły dadomu», — skazaŭ deputat.
Aprača taho, ličyć jon, reforma pryviadzie da skaračeńnia nastaŭnikaŭ u škołach.
«Pa‑pieršaje, skaračajucca navučalnyja hadziny, pa‑druhoje, subota stanovicca svabodnaj. Tak, jość prapanova źmienšyć kolkaść hadzin na staŭku, ale niekatoryja pradmiety poŭnaściu likvidujuć. Kali heta adbudziecca, to razam z pradmietam škołu pakinuć i nastaŭniki suśvietnaj mastackaj kultury, asnoŭ biaśpieki žyćciadziejnaści i inš. Uvohule ž skaračeńni zakranajuć faktyčna ŭsie pradmiety, u tym liku matematyku, fiziku, bijałohiju», — zaznačyŭ U.Zdanovič.
Deputat niehatyŭna stavicca i da poŭnaj likvidacyi vyvučeńnia asobnych pradmietaŭ na pavyšanym i pahłyblenym uzroŭni.
«Kali prymiecca varyjant Ministerstva adukacyi, to my ŭsich padstryžem pad adzin hrebień: chto słaba vučycca, chto mocna, buduć vučycca pa adnolkavych prahramach. Fakultatyvy, jakija płanujecca pravodzić u subotni čas, nie vyratujuć stanovišča», — ličyć jon.
«Kali reforma budzie praviedziena ŭ takim vyhladzie, to praź niekatory čas našy dzieci i ŭnuki buduć pracavać na kitajskich pradpryjemstvach, raźmieščanych na terytoryi Biełarusi, a kiravać pradpryjemstvam buduć kitajcy. Uzrovień adukavanaści biełarusaŭ i kitajcaŭ budzie adroźnivacca, pryčym daloka nie na našu karyść», — dadaŭ U.Zdanovič.
***
Uładzimier Zdanovič taksama miarkuje, što ad paśpiešlivaha pierachodu na 11‑hadovuju školnuju adukacyju istotna pacierpiać vučni niekalkich uzrostaŭ. Pavodle jaho słoŭ, užo padrychtavany prajekt dekreta, u jakim prapanoŭvajecca škole z 1 vieraśnia pracavać pa‑novamu.
Deputat padkreśliŭ, što «hety pierachod rychtujecca ŭ vielmi vialikaj śpiešcy».
«Jaje dapuskać nielha. Treba dać mahčymaść ciapierašnim dzieviatym i dziesiatym kłasam zaviaršyć navučańnie pa 12‑hadovaj prahramie», — ličyć jon. U.Zdanovič upeŭnieny, što za dva hady padrychtavacca da pierachodu možna «vielmi sur\jozna, pradumać usie jaho varyjanty, pakazać usie niehatyŭnyja i pazityŭnyja momanty jak śpiecyjalistam, tak i hramadstvu ŭ cełym».
Deputat ličyć, što vučni 9—10 kłasaŭ pacierpiać pa niekalkich pryčynach. Pa‑pieršaje, jany za adzin hod buduć prachodzić prahramu dvuchhadovaj padrychtoŭki. Pa‑druhoje, navučańnie «budzie vieścisia skomkana, tamu što niama sur\joznych prapracovak ni ŭ prahramach, ni ŭ temach, ni ŭ padručnikach».
Vielmi admoŭna U.Zdanovič stavicca «da mocnaha pradaŭžeńnia navučalnaha hoda na letni pieryjad».
«Inicyjatary nie zadumvajucca ab nastupstvach pradaŭžeńnia. Mała taho što daviadziecca mianiać ukaz prezidenta ab praviłach pastupleńnia ŭ VNU, bo źmiaščajucca terminy. Praktyčna adnačasova ŭ škole buduć prachodzić navučalnyja zaniatki, małodšyja kłasy buduć znachodzicca pry škole ŭ dziciačym azdaraŭlenčym łahiery, škoła budzie rychtavacca da novaha navučalnaha hoda, dla niekatorych kłasaŭ buduć pravodzicca vypusknyja ekzamieny. I ŭsiu hetuju rabotu buduć vykonvać adny i tyja ž nastaŭniki, pierahruzka jakich u hety čas budzie kałasalnaj», — zaznačyŭ deputat.
Daviedka nn.by Uładzimier Zdanovič -- deputat Pałaty pradstaŭnikoŭ pa Drahičynskaj vybarčaj akruzie №9. Naradziŭsia 15 sakavika 1959 h. u v. Zastaŭje Drahičynskaha rajonu Bieraściejskaj vobłaści. Zasłužany nastaŭnik Respubliki Biełaruś, mahistar pedahohiki.
Pracavaŭ małodšym supracoŭnikam, inžynieram BDU, vychavaŭcam Bieździežskaj škoły, namieśnikam dyrektara Kremnaŭskaj vaśmihodki, nastaŭnikam Lipnickaj vaśmihodki, Drahičynskaj siaredniaj škoły, dyrektaram himnazii ŭ Drahičynie. Žanaty, maje syna i dvuch dačok.