Ekołah: Z-za bujnych žyviołahadoŭčych haspadarak praz 20 hadoŭ u Biełarusi moža nie zastacca čystych rek
Pra heta zajaviła 6 lipienia ekśpiert Centra ekałahičnych rašeńniaŭ (CER) Natalla Parečyna.
Fota i.ytimg.com.
Jak raskazała ekołah, u kancy červienia ŭ CER źviarnulisia turysty, jakija spłaŭlalisia na łodkach pa race Načy i ŭ rajonie raźmiaščeńnia śvinahadoŭčaha kompleksu «Chaciuchova» (Krupski rajon) natrapili na zator z žyviołahadoŭčych adchodaŭ.
U Krupskaj rajonnaj inśpiekcyi pryrodnych resursaŭ i achovy navakolnaha asiarodździa prakamientavali ŭbačanaje turystami tak: «Heta narmalna i nijakaj škody navakollu nie niasie».
Ekołahi, jakija vyjechali na miesca, vyśvietlili, što adchody trapili ŭ raku ź mielijaracyjnaha kanała, u jaho — z paloŭ paśla daždžu.
Ekołahi bačyli, što hnojevuju vadkaść na pali dastaŭlaŭ u łahunach i raźlivaŭ traktar. Paśla daždžu ŭzrovień vady na ich padymaŭsia, i brud z daždžavoj vadoj ściakaŭ u vadu mielijaracyjnaha kanała. Toje ž samaje adbyvajecca ŭzimku, kali rastaje śnieh.
Vymiareńnie vady ŭ studniach najbližejšaj vioski Padklonak pakazała, što hraničny ŭzrovień kancentracyi nitrataŭ pieravyšany ŭ 6—11 razoŭ.
Miascovyja žychary kazali ekołaham, što sa źjaŭleńniem ŭ 2002 hodzie pobač śvinakompleksa ŭ race stała źnikać ryba. Ciapier jaje ŭ Načy niama naohuł.
Ekśpiert polskaj niaŭradavaj arhanizacyi «Fiederacyja zialonych Haja» Jakub Skarupski paraŭnoŭvaje fiermu z pahałoŭjem u 2,5 tysiačy śviniej z horadam na 7,5 tysiač žycharoŭ bieź sistemy ačystki ściokaŭ. «Chaciuchova» z pahałoŭjem u 25 tysiač śviniej možna pryraŭniać da nievialikaha horada typu Słonima abo Lidy, ličyć Parečyna.
Centr ekałahičnych rašeńniaŭ padrychtavaŭ i nakiravaŭ aficyjny zapyt u Minski abłasny kamitet pryrodnych resursaŭ i achovy navakolnaha asiarodździa.
«U ich jość miesiac, kab adreahavać na hetuju situacyju. Kali žyviołahadoŭčyja kompleksy buduć praciahvać takuju praktyku, to hadoŭ praz 20 u nas nie zastaniecca nivodnaj čystaj raki», — zajaviła Parečyna.