Uładzimir Niaklajeŭ budzie adznačać 70 hadoŭ biez dazvołu Minharvykankama
Paet i palityk Uładzimir Niaklajeŭ siońnia źbirajecca adśviatkavać svoj 70-hadovy jubilej čytańniem vieršaŭ u skviery imia Janki Kupały.
Pra heta jon paviedamiŭ na svajoj staroncy ŭ fejsbuku. Padčas imprezy adbudziecca prezientacyja novaj knihi paeta «Tolki vieršy».
Razam ź jubilaram pieśni na vieršy Niaklajeva dy inšych biełaruskich paetaŭ praśpiavajuć Źmicier Vajciuškievič i Lavon Volski.
Na minułym tydni Uładzimir Niaklajeŭ chacieŭ uziać dazvoł na praviadzieńnie litaraturnych čytańniaŭ u skviery imia Janki Kupały, ale atrymaŭ admovu.
«U zajaŭcy ja napisaŭ pra daŭniuju tradycyju litaraturnych čytańniaŭ la pomnika Janku Kupału. Tam čytali svaje vieršy ŭ jubilejnyja dni Maksim Tank, Arkadź Kulašoŭ, Pimien Pančanka, Ryhor Baradulin, Nił Hilevič, maładyja paety. Tradycyi litaraturnych čytańniaŭ isnujuć va ŭsich jeŭrapiejskich stalicach, i ciapier mianie z nahody jubileju zaprašajuć u Chielsinki i Stakholm, Ńju-Jork, Vilniu i Varšavu. A voś u rodnym horadzie ja hość niežadany. Spačatku mnie pieraškadžali vydavać vieršy, ciapier zabaraniajuć ich čytać», — skazaŭ Niaklajeŭ.