Ravarysta, jaki źbiŭ bitaj piešachoda ŭ Minsku, buduć sudzić
30-hadovaha minčanina, jaki napaŭ ź bitaj na piešachoda, buduć sudzić. Jaho abvinavačvajuć pavodle č.3 art.339 KK (asabliva złosnaje chulihanstva). Rasśledavańnie kryminalnaj spravy zaviaršyła ŭpraŭleńnie Śledčaha kamiteta pa Minsku.
Pavodle śledstva, uviečary 19 červienia paciarpieły padletak išoŭ pa krai rovarnaj darožki ŭzdoŭž vulicy Prytyckaha. Nasustrač jamu na rovary jechaŭ abvinavačany. U vyniku sutyknieńnia z padletkam jon upaŭ na asfalt, zatym padniaŭsia, dastaŭ z zaplečnika biejsbolnuju bitu, padyšoŭ da paciarpiełaha, udaryŭ jaho adzin raz. Zatym napadnik sieŭ na rovar i źjechaŭ. Akazvać dapamohu źbitamu padletku jon nie staŭ.
Na dopycie mužčyna skazaŭ, što bitu jamu padaravali. U toj viečar jon vyrašyŭ zabrać jaje z pracy i advieźci dadomu. Paśla kanfliktu na rovarnaj darožcy jon raśpiłavaŭ srodak złačynstva i vykinuŭ.
Sudova-miedycynskaja ekśpiertyza vyjaviła, što ŭ vyniku ŭdaru bitaj padletak atrymaŭ mienš ciažkija cialesnyja paškodžańni.
Materyjały spravy pieradadzienyja ŭ prakiraturu dla nakiravańnia ŭ sud. Abvinavačany zastajecca pad vartaj, paviedamlaje pres-słužba Śledčaha kamiteta.