Pierarekłamavany (k)raj. Jak naviedać Hruziju biez Tbilisi FOTA
Ahulnyja zatraty na dźvie asoby:
- 3 dni pražyvańnia ŭ Kutaisi — 50 jeŭra;
- 11 dzion pražyvańnia ŭ Batumi — 220 jeŭra;
- pieralot Vilnia — Kutaisi ŭ abodva baki (tudy tolki z ručnym bahažom, nazad taksama z adnym zamoŭlenym bahažom) — 350 jeŭra;
- ciahnik Minsk — Vilnia ŭ abodva baki — 80 jeŭra.
Charčavańnie na dźvie asoby (u siarednim):
- śniadanak u Batumi (u pryvatnych asob) — 10 jeŭra;
- viačera ŭ restaracyi (ź vinom ci pivam) — 20 jeŭra.
Jak dabiralisia?
Pačać varta z taho, što samo naša padarožža płanavałasia vielmi spantanna, za dva tydni da daty vyletu. Adpaviedna, čakać tannych avijakvitkoŭ nie davodziłasia, choć my i karystalisia pasłuhami ŭsimi lubimaha WizzAir'a. Kali b nam udałosia značna raniej spłanavać pajezdku, addać za bilety možna było b jak minimum udvaja mienš. Ale narakać u dadzienym vypadku možna tolki na siabie i abstaviny.
Jakija, darečy, składvajucca takim čynam, što samalot ź Vilni ŭ Kutaisi padymajecca ŭ nieba a 5.00 ranicy, tamu pierad prybyćciom u Hruziju padarožnikaŭ čakaje cikavaja noč. Pieršuju jaje častku my praviali ŭ ciahniku Adler — Kalininhrad, jaki ŭ 21.48 adpraviŭsia ź minskaha čyhunačnaha vakzała i ŭ 2.14 nastupnaha dnia prypyniŭsia na vilenskim. Daroha ad vakzała da aeraporta na taksi (hramadski transpart u taki čas nie chodzić) zaniała niedzie 15 chvilin. Darečy, važny łajfchak — kali ŭ vas niama miascovaj sim-karty, kab vyklikać taksi pa telefonie, možna paprasić zrabić heta na recepcyi hatela «Panarama», jaki znachodzicca praz darohu ad vakzała. Tak vy dajedziecie za 4 jeŭra, a nie za 20, kali budziecie siadać u mašynu da dziadźkaŭ, jakija tut ža prapanoŭvajuć svaje pasłuhi.
Zapaviednik Sataplija.
Pa prylocie ŭ Kutaisi pieršaja zadača, jakuju patrebna vyrašyć — heta abmien valuty. Hruzinskija łary ŭ Minsku kupić absalutna niemahčyma, choć niekatoryja banki i zajaŭlajuć pra mahčymaść apieracyj z dadzienaj valutaj. Śpiecyjalna dla hetych metaŭ u aeraporcie majecca abmieńnik z davoli niebłahim kursam — značna lepšym za toj, što nam paśla prapanoŭvali u turystyčnym centry Batumi. Ale ŭsiu sumu lepiej adrazu nie mianiać, bo ŭ samim Kutaisi, a paśla i ŭ Batumi možna znajści lepšy kurs, choć roźnica i nie takaja značnaja. Tak, u aeraporcie za 1 dalar davali 2,28 łary, a ŭ Batumi my zdavali amierykanskich prezidentaŭ pa kursie 2,34 (choć u samych turystyčnych miescach kurs byŭ až 2,08).
Z aeraporta možna dajechać u troch samych papularnych kirunkach — Tbilisi, Batumi, Kutaisi. Da pieršych dvuch haradoŭ vas paviazie aŭtobus, da Kutaisi dajedziecie taksi za 5 łary z čałavieka, jak zrabili my.
Tut varta patłumačyć, čamu my z žonkaj vyrašyli pakinuć Tbilisi pa-za miežami našaha padarožža. Pakolki prychodziłasia jano na pačatak-siaredzinu lipienia, to ŭ hruzinskich krajach stajała lutaje piekła (horača i dušna było navat u harach vakoł Kutaisi). A pry tryccaci hradusach pa Celsii i amal dzievianostaadsotkavaj vilhotnaści na dvare badziacca pa paŭtaramiljonnym horadzie — nie samy lepšy sposab bavić čas, jak pa mnie. Tak što miascovuju stalicu naviedajem u nastupny raz, kali zachočacca pahruzicca ŭ atmaśfieru Hruzii.
Kutaisi
U Kutaisi ž, jaki znachodzicca ŭ 20 chvilinach jazdy ad aeraporta, taksama chapaje čaho pahladzieć.
Choć niepasredna ŭ samim horadzie vas moža ŭrazić tolki stary centr i taja nievialikaja infrastruktura, jakaja stvorana navokał jaho.
Usio ž samaje cikavaje znachodzicca na peŭnaj dystancyi ad horada. Ale heta asablivaj prablemy nie składaje. Za try dni, što byli ŭ našym rasparadžeńni, my zdoleli pahladzieć amal usie miascovyja cikavostki jak u horadzie, tak i ŭ navakolli.
U hetym nam dapamoh haspadar hatela Globus Hotel, dzie my spynialisia, Hiorhi, u prostanarodździ Hohi.
Jahony siabar za 80 łary ceły dzień kataŭ nas na svaim pravarulnym «Nisanie» pa ŭsich vakolicach, prypyniaŭsia ŭ važnych miescach i čakaŭ nas tam stolki, kolki nam chaciełasia.
Darečy, pravarulnych aŭtamabilaŭ u Hruzii šmat — tannyja karystanyja «japoncy» prosta zapałanili miascovyja vulicy praź nievialikija ceny. Pa słovach miascovych, absalutna realna kupić piacihadovy aŭtamabil u dobrym stanie za dźvie-try tysiačy dalaraŭ. Pieradajom vitańnie Mytnamu sajuzu, karaciej kažučy.
U piačorach Pramieteja.
Z taho, što varta naviedać abaviazkova, možam rekamiendavać Nacyjanalny zapaviednik Sataplija, piačory Pramieteja, manastyry Hiełaci i Macamieta. U hateli možna ŭziać kartu horada, dzie paznačanyja ŭsie važnyja miescy rehijona, a ŭ centry horada lohka znajści infarmacyjny centr, tamu možna prosta samastojna razabracca, kudy vam chočacca, a paśla davać ukazańni taksistu. Nam ža ŭ farmavańni maršruta dapamoh miascovy śpieleołah Łaša, ź jakim my vypadkova paznajomilisia ŭ Sataplii, dzie jon i pracuje. Pakolki heta byŭ pieršy punkt našaha padarožža pa vakolicach, to dalej jon prosta kiravaŭ pracesam i pravodziŭ nam ekskursiju pa ŭsich miescach, kudy my traplali.
I ździviła mianie navat nie takaja dobrazyčlivaść i adkrytaść čałavieka, jaki dla haściej až kinuŭ na dzień pracu. Pieršy raz u takim dalokim zamiežžy ja pabačyŭ čałavieka, jaki viedaŭ niešta pa-biełarusku. Jak vyśvietliłasia, Łaša praz svaich ukrainskich znajomych trochi vyvučyŭ ukrainskuju movu, a zaadno i niešta ź biełaruskaj, choć ni razu ŭ hetych krainach nie byŭ. Biełaruskaja mova z hruzinskim akcentam — adna z samych dziŭnych rečaŭ, što davodziłasia čuć, skažu ja vam.
Amal takaja ž dziŭnaja, jak piačora Pramieteja, jakaja pakinuła najbolšaje ŭražańnie z usiaho ŭbačanaha ŭ Hruzii. Sama jana nastolki vialikaja, a ŭnutry stolki roznych cudoŭnych tvoraŭ pryrody, što chadzić z raziaŭlenym rotam tam možna dobrych dźvie hadziny. A to i bolš, uličvajučy jaje śviežaść i prachałodu ŭ paraŭnańni z toj łaźniaj, u jakuju ty traplaješ pa viartańni na pavierchniu. Vielmi nastojliva rekamienduju!
Marshrutka
Paśla dvuch dzion u Kutaisi my nakiravalisia ŭ hałoŭny punkt padarožža — Batumi.
Usio-taki palažać na plažy i papłavać u ciopłym mory było dla mianie adnym z samych važnych punktaŭ adpačynku, tamu 11 dzion na ŭźbiarežžy — toje, što treba. Da taho ž i ŭ samim Batumi, i ŭ vakolicach jość, što naviedać dy pahladzieć. Tamu sumna nie budzie, heta adnaznačna. Choć ja i ŭvohule nie viedaju, jak moža być sumna na mory letam, navat kali tam jość tolki parason i tapki. Ale heta ŭžo inšaja historyja.
Manastyr Macamieta.
Ad Kutaisi da Batumi dajechać možna ciahnikom albo maršrutkaj. Darečy, maršrutka — jašče adno ruskaje słova, jakoje stała internacyjanalnym. Za čas pajezdki davodziłasia čuć jaho ŭžo i ad anhličan (marshrutka), i ad niemcaŭ (marschrutka), i ad palakaŭ (marszrutka). Tak što ŭ šerahu vodki i perestroiki prybyło. Dyk voś, maršrutki adpraŭlajucca ad aŭtavakzała, jaki mieścicca pobač z «Makdonaldsam».
Pakolki ŭ dzień našaha adjezdu ŭ Kutaisi išoŭ mocny doždž, i chadzić pa horadzie ŭ pošukach ježy nie chaciełasia zusim, pajechali adrazu na vakzał bieź śniadanku. Tak adbyŭsia naš samy hałoŭny kulinarny hrech usioj pajezdki — pryjšłosia śniedać u tym samym «Makdonaldsie». U «Makdonaldsie»! U Hruzii! Darečy, ničym ad našaha jon nie adroźnivajecca, navat niejkich śpiecyfičnych straŭ zaŭvažana nie było.
Raz uziaŭsia raskazvać pra darohu, dyk raspaviadu ŭsio adrazu. Jeździać hruziny jak ašalełyja, i heta jašče miakka skazana. Jakija-niebudź italjancy ŭ paraŭnańni ź imi prosta anioły na darozie.
U Hruzii jość tolki adno praviła darožnaha ruchu — chto bolš sihnalić, toj i maje racyju. Usio. Adpaviedna, čaćviarnyja i bolš abhony na vuzieńkaj dvuchpałoscy na chutkaści za 120, pastajannaje padrazańnie ŭsich i ŭsia, praskoki nie toje, što na žoŭty, a navat na čyrvony — absalutna zvyčajnaja reč. Nie dziva, što pry takich raskładach pałova ludziej jeździć biez bampieraŭ. Ale nijakaj prablemy jany ŭ hetym nie bačać. Jak skazaŭ nam adzin taksist: «A jakaja prablema? Maja mašyna — jak chaču, tak i jezdžu. Hałoŭnaje, kab byli čatyry koły i numar». Značyć, palicyja z takim stanam rečaŭ absalutna zhodnaja.
Taksama zabudźciesia, što takoje piešachodnyja pierachody, bo ich u Hruzii prosta niama. Jany, viadoma, namalavanyja, i na niekatorych navat prysutničajuć śviatłafory. Ale imaviernaść taho, što vas dzie-niebudź prapuściać — 5%. I heta ja jašče zavysiŭ.
Mašyny buduć jechać, jechać i jechać, sihnalić, sihnalić i sihnalić, kiroŭcy buduć kryčać, kryčać i kryčać, a vy budziecie viečna stajać pierad pierachodam, kali nie nabieraciesia nachabnaści i prosta nie paleziecie naprałom. U takija momanty asabliva pačynaješ canić svaju Radzimu i ludziej, skažu ja vam.
Vidy z manastyra Hiełaci.
Tamu, kali chočacie pamienšyć kancentracyju piekła ŭ vašym padarožžy, karystajciesia ciahnikom. Pa-pieršaje, jon značna tańniejšy — 4 łary na čałavieka suprać 10 ci 15 za maršrutku (tam košt vyznačajecca, jak zachočacca kiroŭcy). Pa-druhoje, dajedziecie spakojna i ŭ kamforcie: na dadzienym maršrucie chodziać novyja ciahniki viadomaj nam firmy Stadler. Ale tut taksama zakraŭsia istotny minus — chodzić ciahnik tolki raz na dzień: z Kutaisi ŭ Batumi ranicaj i ŭ advarotnym kirunku ŭviečary. Mienavita pa hetaj pryčynie my i karystalisia pasłuhami maršrutčykaŭ.
(Praciah budzie).