Viełasipiedyst Kiryjenka, jaki pravaliŭsia ŭ Rya: «Alimpijada mnie nie vielmi cikavaja»
Vasil Kiryjenka paśla alimpijskaj raździełki, u jakoj zaniaŭ 17-je miesca, padzialiŭsia ŭražańniami ad Alimpijady.
Vasil Kiryjenka. Fota Reuters.
— Vam padabajecca atmaśfiera Alimpijady? Viarnulisia b praz čatyry hady?
— Viedajecie, asabista ŭ mianie arhanizacyja Hulniaŭ nijakich emocyj nie vyklikaje. U svaim žyćci bačyŭ prafiesijnyja spabornictvy samaha vysokaha ŭzroŭniu. Tudy prychodziać ludzi, jakija lubiać viełasport. A tut siarod zaŭziataraŭ pałova — žurnalisty, pałova — vałanciory. Jość jašče niejkich piatnaccać čałaviek. Upieršyniu źviarnuŭ na heta ŭvahu ŭ Piekinie, dzie na trasie naohuł nikoha nie było. A na Vialikabrytanii ci «Tur de Frans» źbirajecca kala troch miljonaŭ hledačoŭ.
— Alimpijada zžyvaje siabie?
— Jana mnie nie vielmi cikavaja jak forum. Plus niešta abvastryłasia nakont dopinhu. Spartsmieny abvinavačvajuć adzin adnaho… Sustreŭ niadaŭna byłoha tavaryša pa kamandzie Sašu Siarova — kataŭsia pa trasie, dzie prachodziła indyvidualnaja honka. Pacikaviŭsia, jak spravy. Kaža: «Dy jakija spravy? U nas traim zabaranili startavać…» Siońnia jechaŭ brytaniec — moj tavaryš pa kamandzie, dobry chłopiec. Tolki ja, kab mieć dźvie licenzii dla Biełarusi, vyjhraŭ čempijanat śvietu. A jon startavaŭ prosta tamu, što dobry chłopiec. Rasijanaŭ ža nie dapuskajuć pa licenzijach, jakija zasłužyli. Heta ŭžo realna padvojnyja standarty.
— A viełasport, pa-vašamu, prajšoŭ ačyščeńnie ad dopinhu?
— Nie ŭ majoj kampietencyi kahości vinavacić i niešta kamientavać. Ale chaču zaŭvažyć, što tut, u Rya, sutyknuŭsia ź cikavaj źjavaj pry prachodžańni dopinh-kantrolu. Mnie zusim niama čaho bajacca, adnak byli parušeńni. U pryvatnaści, prasiŭ dapisać u pratakoł, što nie źniščyli štrych-kody dla prabirak. Skazali, kudyści treba prylapić. Ale heta ž stroha rehłamientavanaja pracedura. Ja zdavaŭ piać kantrolaŭ na «Tur de Frans» — zaŭsiody ŭsio rabiłasia pa praviłach.