Biełarus ź nieanacysckaj tatuiroŭkaj: «Chutčej źjedu z krainy, čym jaje źviadu»
U Ministerstvie ŭnutranych spraŭ raźličvajuć, što zakonaprajekt pa nieanacysckich tatuiroŭkach trapić u Pałatu pradstaŭnikoŭ da kanca hoda. Štraf za demanstravańnie takoj simvoliki chočuć padniać z 10 da 30 bazavych vieličyniaŭ. Majstar, jaki nabje klijentu takuju kramolnuju tatuiroŭku, taksama zapłacić 30 bazavych.
MUS choča pašyryć i pieralik simvałaŭ, za jakija buduć pryciahvać da adkaznaści.
«Karać stanuć za vitalnyja žesty nacyjanał-sacyjalistaŭ, paroli, kody, ličby, u jakich zašyfravanyja imiony fiurera. Naprykład, «88» — zašyfravanaje vitańnie «Chajl Hitler!», «SS», usie mahčymyja runy, «kielty», «kałaŭraty», — tłumačać na sajcie MUS sa spasyłkaj na Michaiła Biedunkieviča, načalnika 3-ha ŭpraŭleńnia HUBAZiK MUS.
Adzin ź biełarusaŭ, jaki nie chavaje svaje nieanacysckija pohlady.
Płanujecca, što milicyjaniery buduć zatrymlivać usich, chto trapić pad padazreńnie. A sud budzie vyrašać, nieanacyscki heta simvał ci nie. Kab supracoŭnik MUS nie pierabłytaŭ, naprykład, nacyjanalny ŭzor z kramolnym simvałam, usim razdaduć adpaviednyja mietadyčki. Ale kankretnaha pieraliku zabaronienych simvałaŭ składacca nie budzie.
Zrešty, i biez zakonaprajekta ŭładalniki nieanacysckich tatu siońnia trapili pad žorstki pres. Ich štrafujuć i biaskonca sadžajuć na sutki, patrabujučy źvieści svastyki ź cieła. Vypadkaŭ stała nastolki šmat, što ludzi masava prybirajuć kramolnyja fotazdymki z sacyjalnych sietak.
Nieanacysckaja tatuiroŭka, jakuju vystaŭlaje ŭ sacsietkach adzin ź biełaruskich karystalnikaŭ.
«Praz tatuiroŭku mianie adpravili ŭ psichdyspansier»
Jeŭraradyjo źviazvajecca z dvuma ŭładalnikami kramolnych tatu. Pavieł z Hrodzienskaj vobłaści prachodzić terminovuju słužbu ŭ vojsku. U jaho na plačy — stylizacyja pad staradaŭni kielcki kryž. Simvał praz šmat hadoŭ paśla Druhoj suśvietnaj vajny pačali vykarystoŭvać nieanacysty. U vajenkamacie na tatu źviarnuli pilnuju uvahu.
«Byli prablemy tolki pry prachodžańni psichołahaŭ. Pieršy raz ničoha nie pytalisia. A potym trapiŭ na dziaŭčat, i jany adpravili mianie ŭ psichdyspansier. Ale ŭsio skončyłasia narmalna», — zhadvaje Pavieł.
Jon sprabuje patłumačyć, što tatu aznačaje «ŭzajemaźviazanaść usiaho na płaniecie», što jano nie maje ničoha supolnaha z nacyzmam. Ale jašče Pavieł kaža, što simpatyzuje nieanacysckaj ideałohii.
«U maim vypadku ja stanoŭča staŭlusia da inšaziemcaŭ, jakija žyvuć na svajoj ziamli. Kab nie było mihracyi i hetak dalej. Pretenzij da jaŭrejaŭ u mianie taksama niama. Bolš mianie turbuje vyradžeńnie nacyi, rasy. Voś takija pryhožyja momanty», — tłumačyć małady čałaviek.
Pavieł nie lubić sučasnuju Rasiju i ŭ vajnie na ŭschodzie Ukrainy padtrymlivaje žoŭta-błakitnaje vojska. Jon śćviardžaje, što nikoli nie byŭ futbolnym chulihanam, a tatu nabiŭ z pryčyny ŭłasnych pierakanańniaŭ. Milicyja jaho pakul nie turbavała. Ad znajomych historyjaŭ pra štrafy i sutki za tatu jon nie čuŭ.
«Ale kali tak pojdzie dalej, kali buduć pieraśledavać i mianie, ja chutčej pakinu respubliku, čym budu heta ciarpieć», — vykazvajecca małady čałaviek.
Siarhiej sa svastykaj: «Heta nie simvał Treciaha Rejchu»
Hutarym ź jašče adnym biełarusam, na ciele ŭ jakoha tatu, vielmi padobnaje da svastyki. Palityčnyja pohlady Siarhieja vidavočna adroźnivajucca ad pohladaŭ Paŭła.
«Ja nie nacyst, ja — ruski», — piša małady čałaviek u sacyjalnych sietkach na…niamieckaj movie.
Siarhiej kateharyčna nie lubić biełaruskuju ŭładu, ličyć jaje «žydoŭskaj», ź biełaruskich kiraŭnikoŭ pavažaje tolki Piatra Mašerava. Zrešty, Hitlera i jaho vojska Siarhiej taksama nie lubić.
«U mianie na ciele niama tatuirovak Treciaha Rejchu. Na plačy naniesieny simvał Roda (Rod — adzin sa słavianskich Bahoŭ — Jeŭraradyjo) čyrvonaha koleru. Jon nie maje ničoha supolnaha z fašyzmam i nacyjanalizmam, jaki byŭ naviešany niamieckamu narodu ŭ 1933 hodzie», — adkazvaje Siarhiej.
Jon nie suprać, kab ludzi nabivali na ciele jakija zaŭhodna tatu, i prapanoŭvaje svoj varyjant zakonaprajekta.
«Kožny niachaj nabivaje toje, što choča. Hałoŭnaje, kab jon asensoŭvaŭ značeńnie hetych tatu, a nie lapiŭ ich ślepa pa ŭsim ciele. Treba ŭvieści zakon ab naniasieńni tatu z 24 hadoŭ. U hetym uzroście mazhi pracujuć lepš, čym u 15-19-22-hadovych prydurkaŭ».
Darečy, abodvum chłopcam, ź jakimi Jeŭraradyjo pahutaryła, kala 25 hadoŭ.