Nafta padaražeła na fonie navin ab pahadnieńni Rasii i Saudaŭskaj Aravii
Cana na naftu padskočyła, paśla taho jak Rasija i Saudaŭskaja Aravija padpisali zajavu ab supracoŭnictvie na rynku nafty.
Paśla abviaščeńnia ab pahadnieńni nafta marki Brent nienadoŭha padaražeła adrazu na 4%, adnak tut ža pačała tańnieć i spyniłasia na ŭzroŭni ŭ 47,31 dalara za baral, što na 1% vyšej, čym padčas adkryćcia handlu ŭ paniadziełak.
Pavodle zajavy ministraŭ enierhietyki dźviuch krain, jany damovilisia ab sumiesnych dziejańniach u metach padtrymańnia stabilnaści na rynku nafty i zabieśpiačeńnia ŭstojlivaha ŭzroŭniu inviestycyj u doŭhaterminovaj pierśpiektyvie.
Rasijski ministr enierhietyki Alaksandr Novak zajaviŭ, što pahadnieńnie, jakoje ŭklučaje ŭ siabie dziejańni, nakiravanyja na zamarozku zdabyčy nafty, nosić histaryčny charaktar.
«Z našym kaleham ministram my damovilisia, što najbolš efiektyŭnym na siońnia bačym instrumienty zamarozki, jakija mohuć być realizavanyja», — padkreśliŭ jon na pres-kanfierencyi paśla zaviaršeńnia samita G20 ŭ kitajskim horadzie Chančžoŭ.
Adnak ministr enierhietyki, pramysłovaści i minieralnych resursaŭ Saudaŭskaj Aravii Chaled bien Abdel Aziz al-Falech zajaviŭ, što zamarozka zdabyčy ciapier nie źjaŭlajecca nieabchodnaj.
«Zamarozka — adna z najbolš pažadanych mahčymaściaŭ, adnak u ciapierašni čas jana nie nieabchodnaja», — zajaviŭ jon telekanału Al-Arabija.
«Situacyja na rynku stanovicca lepšaj, i my zaŭvažyli, što ceny adlustroŭvajuć heta», — dadaŭ jon.
U pačatku 2016 hoda ceny na naftu ŭpali da samaha nizkaha ŭzroŭniu amal za 13 hadoŭ z-za pieranasyčeńnia rynka, i jany pa-raniejšamu značna nižejšyja, čym cana ŭ 110 dalaraŭ, zafiksavanaja ŭsiaho tolki dva hady tamu.
Krainy, jakija ŭvachodziać u APIEK, sprabujuć damovicca ab zamarozcy zdabyčy nafty z kanca minułaha hoda. Pakul hetyja pieramovy biezpaśpiachovyja.
Bolšaść krain, jakija vyrablajuć naftu, hatovyja padtrymać uhodu. Vyklučeńniem zastajecca Iran, jaki ŭ apošnija miesiacy pačaŭ vychodzić na naftavy rynak paśla šmathadovaj adsutnaści, vyklikanaj sankcyjami ZŠA i ES.