CVK tajemna pryniała pastanovu ab źmianšeńni kolkaści naziralnikaŭ pry vybarkamach
Napiaredadni asnoŭnaha dnia hałasavańnia CVK uniesła źmieny ŭ Pałažeńnie ab paradku nakiravańnia naziralnikaŭ u vybarčyja kamisii, źvioŭšy da minimumu kolkaść davieranych asobaŭ kandydataŭ u deputaty. Adznačajučy chutki i tajemny charaktar uniasieńnia hetych źmienaŭ, ekśpierty kampanii «Pravaabaroncy za svabodnyja vybary» rasceńvajuć heta jak palityčny krok, skiravany na źnižeńnie prazrystaści padliku hałasoŭ.
Źmieny, uniesienyja ŭ punkty 3 i 15 Pałažeńnia ab paradku nakiravańnia naziralnikaŭ ad 8 červienia 2016 h., zaćvierdžany apublikavanaj na sajcie CVK Pastanovaj №57 ad 10 vieraśnia 2016 h.:
« punkt 3 vykłasci ŭ nastupnaj redakcyi:
«Davieranyja asoby kandydata ŭ deputaty Pałaty pradstaŭnikoŭ majuć prava ažyćciaŭlać nazirańnie na pasiedžańniach akruhovaj i ŭčastkovych vybarčych kamisij, na učastkach dla hałasavańnia toj vybarčaj akruhi, pa jakoj bałatujecca kandydat u deputaty.
Na pasiedžańni akruhovaj, učastkovaj vybarčaj kamisii, na ŭčastku dla hałasavańnia majuć prava prysutničać nie bolš za adnaho naziralnika z kolkaści davieranych asobaŭ kandydata ŭ deputaty Pałaty pradstaŭnikoŭ (z papiaredniaj zhody kamisii - bolš za adnaho)»;
častku druhuju punkta 15 vykłaści ŭ nastupnaj redakcyi:
«Naziralniki, akredytavanyja pry akruhovych vybarčych kamisijach, majuć prava prysutničać u hetych kamisijach pry pryjomie pratakołaŭ učastkovych vybarčych kamisij ab vynikach hałasavańnia na učastkach. Z davieranych asobaŭ kandydata ŭ deputaty Pałaty pradstaŭnikoŭ u adpaviednaj akruhovaj vybarčaj kamisii maje prava prysutničać tolki adzin naziralnik (z papiaredniaj zhody kamisii - bolš za adnaho).».
Asablivuju ŭvahu kaardynatar kampanii «Pravaabaroncy za svabodnyja vybary» Uładzimir Łabkovič źviarnuŭ na toj fakt, što Pastanova №57 CVK była pryniataja tajemna ad naziralnikaŭ ź niaŭradavych hramadskich arhanizacyj i apazicyjnych palityčnych partyj.
«Centralnaja kamisija, u parušeńnie svaich ža mietadyčnych rekamiendacyj, dzie kamisija abaviazanaja zaprašać naziralnikaŭ na kožnaje pasiedžańnie, praviała tajemnaje pasiedžańnie. Nichto ź niezaležnych naziralnikaŭ ci naziralnikaŭ ad apazicyjnych palityčnych partyjaŭ, akredytavanych pry CVK, nie byŭ na jaho zaprošany. Naziralnik našaj kampanii Źmicier Čarnych nie atrymlivaŭ zaprašeńnia na hetaje pasiedžańnie ni telefanavańniem, ni navat praz sms. Hetaje pasiedžańnie było pryśviečanaje tolki adnoj temie — abmiežavańniu kolkaści davieranych asobaŭ kandydataŭ u deputaty na vybarčych učastkach da adnoj asoby. Da pryniaćcia hetaj pastanovy, padčas usich papiarednich vybarčych kampanijaŭ takoha abmiežavańnia nie było.
Tajemny i chutki charaktar pryniaćcia hetaj pastanovy (bo jana prymajecca za sutki da asnoŭnaha dnia vybaraŭ, kali ŭžo prajšło piać dzion daterminovaha hałasavańnia) śviedčyć, što jana skiravanaja tolki na adno — kab padlik hałasoŭ siońnia, 11 vieraśnia, byŭ jak maha mienš prazrystym. Kab, nakiravaŭšy na vybarčyja ŭčastki davieranych asobaŭ kandydataŭ u deputaty, nie mahčyma było adsačyć usiu praceduru padliku hałasoŭ, to bok pilna sačyć za kožnym siabram vybarčaj kamisii. Tolki ŭ hetym ja baču metu nazvanaj pastanovy», — kaža pravaabaronca.
Pry hetym ekśpierty kampanii nie ŭpieršyniu ŭkazvajuć na supiarečlivaść u padychodach kiraŭnictva CVK.
«Iznoŭ ža, kiraŭnictva CVK kryvadušničaje. Jany zaŭsiody kazali, što nie mohuć unieści źmieny ŭ vybarčaje zakanadaŭstva mienš čym za paŭhady da vybarčaj kampanii, što jość u rekamiendacyjach Vieniecyjanskaj kamisii i BDIPČ ABSIE. Ale, jak bačym, svaimi pastanovami jany źmianiajuć pravaprymianialnuju praktyku za sutki, padčas hałasavańnia. Tamu, ja liču, heta nie jurydyčnaja karektyroŭka pravoŭ naziralnikaŭ, a vyklučna palityčnaja, skiravanaja na toje, kab zrabić jašče bolš nieprazrystym padlik hałasoŭ», - padkreśliŭ Uładzimir Łabkovič.
Kampanija «Pravaabaroncy za svabodnyja vybary» źjaŭlajecca niezaležnaj i nie stavić metaj padtrymku palityčnych partyj i jakich-niebudź palityčnych dziejačoŭ. Uvieś vybarčy praces naziralniki aceńvajuć vyklučna zychodziačy z pryncypaŭ svabodnych, demakratyčnych i prazrystych vybaraŭ, pry jakich narod Biełarusi moža ŭ poŭnaj miery realizavać svajo kanstytucyjnaje prava na ŭdzieł u kiravańni svajoj krainaj.