Ukrainskaja raźviedka: Rasijskaja avijacyja adpracoŭvała nad Biełaruśsiu naniasieńnie avijaŭdaraŭ pa Ukrainie
Ukrainskaja raźviedka 28 kastryčnika zajaviła, što rasiejskaja avijacyja adpracoŭvała ŭ pavietranaj prastory Biełarusi naniasieńnie avijaŭdaraŭ pa abjektach Ukrainy. Ale ŭ Minabarony Biełarusi nahadali ab praviadzieńni maštabnych vučeńniaŭ Abjadnanaj sistemy supraćpavietranaj abarony SND.
Treniroŭka Abjadnanaj sistemy SPA SND u listapadzie 2012 h. Fota BiełTA.
«26 kastryčnika, vykarystoŭvajučy abaviazki Respubliki Biełaruś u ramkach sajuznaj dziaržavy, rasijskimi bajavymi samalotami ŭ pavietranaj prastory Biełarusi adpracavana pytańnie ŭmoŭnaha naniasieńnia masiravanych avijacyjnych udaraŭ pa stratehičnych abjektach na terytoryi Ukrainy», — zajaviŭ padčas bryfinhu pradstaŭnik Hałoŭnaha ŭpraŭleńnia raźviedki Ministerstva abarony Ukrainy Vadzim Skibicki, pieradaje 112.ua.
Pavodle jaho słoŭ, byli zaŭvažanyja samaloty A-50U, Tu-160, Tu-22M3 i Su-34, jakija vykonvali paloty ŭzdoŭž dziaržaŭnaj miažy Ukrainy i ŭmoŭna ažyćciaŭlali puski rakiet.
U Minabarony Biełarusi nahadali, što raniej paviedamlałasia pra praviadzieńnie maštabnych vučeńniaŭ sistemy supraćpavietranaj abarony (SPA) SND.
26 kastryčnika pačalisia vučeńni i prajšła treniroŭka z udziełam dziažurnych sił SPA Armienii, Biełarusi, Kazachstana, Kyrhyzstana, Rasii, Tadžykistana i Uźbiekistana.
Manieŭry prachodziać u pavietranaj prastory Rasii, Biełarusi, Kazachstana i Armienii. Adpracoŭvajucca dziejańni dziažurnych sił SPA suprać pavietranych sudoŭ, jakija parušajuć miežy krain SND, u vypadku zhonu pavietranych sudoŭ, pry akazańni dapamohi ekipažam samalotaŭ i viertalotaŭ, jakija cierpiać biedstva.