Publicyst Alaksiej Dziermant prapanuje nacyjanalizavać tut.by
Z žorstkaj krytykaj papularnaha partała tut.by vystupiŭ hałoŭny redaktar sajta imchakłab.baj, publicyst Alaksiej Dziermant. Jaho aburyŭ toj fakt, što sajt daŭ infarmacyju pra toje, što ŭ internecie pačaŭsia zbor podpisaŭ suprać «biezpakaranaści milicyi».
«Śviadomaje koła» sprabuje pierachodzić u nastup, — piša Alaksiej Dziermant. — Tam cudoŭna razumiejuć, što padryŭ aŭtarytetu MUS — pieršačarhovaja zadača dla źmieny ŭłady, ciapier jany infarmacyjna atakujuć amal usich znakavych čynoŭnikaŭ, asabliva ministra. Nie mohuć prabačyć žorstkich mier u dačynieńni da narkahandlaroŭ i futbolnych fanataŭ, dyj histaryčnaja forma milicyi padčas paradu, na ich padziejničała jak na vupyroŭ [majecca na ŭvazie forma NKVD, u jakoj ministr Šunievič prymaŭ parad — «NN»]. Asabista majo mierkavańnie, Šunievič — adzin z najlepšych ministraŭ unutranych spravaŭ za ŭvieś čas isnavańnia niezaležnaj Biełarusi. PS. Chiba jašče nie vidavočna za kaho «zaŭzieje» tutbajčyk?»
U kamientarach da pasta Dziermant piša, što ŭ internecie niezaležnyja miedyi stali bolš papularnymi za dziaržaŭnyja. «U ich źjaŭlajecca infarmacyjnaja pieravaha ŭ internecie. Toj ža tut.by daŭno para nacyjanalizavać, ci chacia b pamianiać usiu palitredakcyju».
Paźniej Dziermant prapanoŭvaje pieradać tut.by pad jahonaje kiraŭnictva, choć i robić heta sa smajlikam, adnak u nastupnym kamientary razvažaje, jak by arhanizavaŭ pracu kalektyvu.
«Ciapier miedyja-asiarodździe ŭ internecie vielmi ščylnaje, prabicca praktyčna niemahčyma. Patrebien albo adminresurs, albo źniešniaje inviestavańnie. Albo prosta adciskać, ale znoŭ ža z dapamohaj adminresursu», — piša publicyst.
Alaksiej Dziermant na siońniašni dzień redahuje małapapularny prarasijski sajt «Imchakłab». Miesiačnaja aŭdytoryja staronki składaje ad 30 da 40 tysiač IP-adrasoŭ. Raniej Dziermant byŭ ideołaham bałckaha ruchu ŭ Biełarusi, adstojvaŭ krajnie pravyja, antykamunistyčnyja pohlady, vydavaŭ časopisy «Druvis» i «Sivier», adnak ciaham apošnich hadoŭ całkam pieraaryjentavaŭsia ŭ bok Maskvy. Dziermanta aktyŭna kličuć na ŭdzieł u pieradačach na dziaržaŭnych telekanałach Biełarusi.
Tut.by — samy papularny navinavy resurs Biełarusi. Jaho miesiačnaja aŭdytoryja składaje zvyš 30 miljonaŭ IP-adrasoŭ.