Łukašenka: Supolnaja zadača biełarusaŭ — źbierahčy krainu, niezaležnaja Biełaruś nie pa dušy mnohim
Ahulnaja zadača ciapierašnich pakaleńniaŭ biełarusaŭ — źbierahčy krainu i pieradać jaje svabodnaj i niezaležnaj tym, chto pryjdzie paśla ich. Pra heta Alaksandr Łukašenka zajaviŭ 10 studzienia na cyrymonii ŭručeńnia premij «Za duchoŭnaje adradžeńnie», śpiecpremij dziejačam kultury i mastactva i «Biełaruski spartyŭny Alimp».
Jak paviedamlaje pres-słužba kiraŭnika dziaržavy, Łukašenka padkreśliŭ, što niezaležnaść nie prosta zdabyć. Ale jašče bolš składana adstajać i abaranić. «Siła duchu, zhurtavanaść i adzinstva — mienavita tyja asnovy, toj padmurak, bieź jakich siońnia nie vyžyć. Jašče tysiaču hadoŭ tamu Amar Chajiam skazaŭ: «Toj, chto ŭpaŭ ducham, hinie raniej za termin». I heta vielmi dakładna! Bo tolki mocny ducham čałaviek viedaje, što rabić i kudy iści. Biez mocnaha stryžnia luby asudžany na parazu. A našamu narodu siły duchu nie zajmać! Biełarusy pieražyli krovapralitnyja vajny, zdoleli vystajać u samyja ciažkija paślavajennyja časy, adnavili krainu z ruin, a ŭ našy dni na skryžavańni daroh, kultur i histaryčnych losaŭ adstojvajuć suvierenitet rodnaj krainy», — skazaŭ kiraŭnik dziaržavy.
Razam z tym Łukašenka zajaviŭ, što i ciapier znachodziacca tyja, chto sprabuje pradstavić biełarusaŭ ludźmi biez rodu i plemieni. «Źjaŭleńnie takich hałasoŭ zusim nie vypadkovaje. Niezaležnaja Biełaruś, jakaja žyvie svaim rozumam i pracaj, nie pa dušy mnohim. Paklikańnie sapraŭdnaha tvorcy supraćstajać luboj chłuśni, lubomu falšu i kryvadušnaści. Tym bolš kali havorka idzie pra Ajčynu, pra rodnuju ziamlu. Mienavita tut i jość pole duchoŭnaj bitvy za Biełaruś, za našy kaštoŭnaści, ideały i tradycyi. I vyjhrać hetuju bitvu, vyjhrać jaje ŭ dušach ludziej — voś sapraŭdnaje, vialikaje paklikańnie ŭsich tych, kaho my ŭšanoŭvajem siońnia, i tych, chto sabraŭsia ŭ hetaj zale», — upeŭnieny kiraŭnik dziaržavy.
Premii prezidenta Biełarusi «Za duchoŭnaje adradžeńnie» ŭdastojeny nastajaciel Śviata-Jelisiejeŭskaha Łaŭryšaŭskaha mužčynskaha manastyra Navahrudskaj jeparchii ihumien Jaŭsievij (Kanstancin Ciuchłoŭ), zahadčyk kafiedry architektury žyłych i hramadskich budynkaŭ Biełaruskaha nacyjanalnaha techničnaha ŭniviersiteta Siarhiej Sierhačoŭ, kalektyvy Respublikanskaha reabilitacyjnaha centra dla dziaciej-invalidaŭ i Biełaruskaha dziaržaŭnaha piedahahičnaha ŭniviersiteta imia Maksima Tanka, Fiederacyja prafsajuzaŭ Biełarusi.
Nazvanyja taksama łaŭreaty śpiecyjalnaj premii prezidenta dziejačam kultury i mastactva. U ich liku kalektyvy Nacyjanalnaha akademičnaha teatra imia Janki Kupały, Pałaca kultury Maładziečna i inšyja. Uznaharody ŭdastojeny taksama mastak, člen hramadskaha abjadnańnia «Biełaruski sajuz mastakoŭ» Kanstancin Vaščanka i kiraŭnik zasłužanaha amatarskaha kalektyvu Biełarusi studyi dekaratyŭna-prykładnoha mastactva «Biełaruski suvienir» Centra tvorčaści dziaciej i moładzi Salihorskaha rajona Raisa Ramanienia.