Baćka paprasiŭ sud dać jamu aryšt, a nie štraf, kab być z asudžanym na 10 sutak chvorym synam
U sudzie Zavodskaha rajona Minska siońnia asudzili baćku i syna — Anatola i Maksima Frałovych.
Anatol Piatrovič Frałoŭ, 1964 hoda naradžeńnia, kaval z Žodzina, artykuł 17.1, jaho sudziŭ Hienadź Jankoŭski. Frałoŭ skazaŭ, što ŭ jaho jazvavaja chvaroba, prasiŭ śpiecyjalnuju ježu, jamu nie dali, haładaŭ da suda, i nie piŭ vady. Prapanavali advakata.
Frałoŭ: A jano niešta źmienić?
Sudździa: Voś mienavita. Ja baču, što psichičnych zachvorvańniaŭ niama. Vam vaša adukacyja dazvalaje abaraniać siabie samoha.
Zatrymany rastłumačyŭ, što pryjechaŭ z synam u Minsk pajści pa kramach. Abodvuch zatrymali, kali jany byli razam, biez tłumačeńniaŭ. U pratakołach napisana, što jany z synam byli zatrymanyja ŭ roznych damoŭ - 73 i 83 pa praśpiekcie Niezaležnaści.
Frałoŭ prasiŭ dapytvać milicyjantaŭ na palihrafie, sudździa admoviŭ.
Śviedku majora Vaskieviča dapytvaje sudździa.
— Kampanija 15 čałaviek, pryciahnuła ŭvahu, kryčali, šumieli, razmachvali rukami.
— Što supraćpraŭnaha jany zrabili?
— Kryčali, šumieli, razmachvali rukami.
— U vašych pakazańniach napisana, što jon niecenzurna łajaŭsia.
— Paru maciukoŭ pamiž słovami praskočyła, nie bolej.
Potym sudździa pakazaŭ na błytaninu ŭ numarach damoŭ, major skazaŭ, što nie ź Minska, tamu ŭsie numary damoŭ nie pamiataje. Ale skazaŭ, što zatrymlivali kala Parku Čaluskincaŭ.
Lejtenant Andrej Rahatka naohuł nazvaŭ numar doma Niezaležnaści 80 i zajaviŭ, što ŭ natoŭpie, jaki pryciahnuŭ uvahu, było 30 čałaviek. Jon skazaŭ, što zatrymali Frałova kala Akademii Navuk. Na pytańnie, u čym było parušeńnie Frałova i kampanii, u jakoj jaho bačyli, lejtenant adkazaŭ:
— Pavodzili siabie ahresiŭna, matam niecenzurna łajalisia.
Sudździa: Na kaho?
- Možna ličyć, što i na ludziej, i na supracoŭnikaŭ milicyi.
Sudździa vyrašyŭ, što nie daviarać pakazańniam supracoŭnikaŭ milicyi niama padstaŭ, bo nie supiarečać adzin adnamu.
Vierdykt — štraf 10 bazavych z ulikam stanu zdaroŭja.
Syn, Maksim Frałoŭ, atrymaŭ 10 sutak. Baćka, Frałoŭ-starejšy, zajšoŭ da svajho sudździ, prasiŭ jaho pierapisać štraf na sutki, kab być z synam, u jakoha jość prablemy z sercam.