Ułady praktykujuć kankurencyju ŭnutry režymu
Radykał Siarhiej Kaścian budzie kankuravać z staršyniom rajvykankamu, arfohraf Uładzimier Zdanovič taksama atrymaŭ supiernika.
Radykał Siarhiej Kaścian budzie kankuravać z staršyniom rajvykankamu, arfohraf Uładzimier Zdanovič taksama atrymaŭ supiernika.
Deputat Siarhiej Kaścian budzie schilać na svoj bok žycharoŭ Mazyrščyny, vybarnikaŭ Paleskaj vybarčaj akruhi № 43.
Siarhiej Kaścian: «U mianie svajoj asabistaj prahramy niama. Jość prahrama prezydenta, jakuju ŭchvalili na Usiebiełaruskim schodzie, i jość prahrama Kamunistyčnaj partyi Biełarusi, siabram jakoj ja źjaŭlajusia. Hetyja dźvie prahramy identyčnyja, jany nakiravany na padtrymku bolš vysokaha ŭzroŭniu žyćcia biełaruskaha naroda, i tamu ja padtrymlivaju hetyja abiedźvie prahramy i budu ich vykarystoŭvać».
Ad siabie Kaścian usio ž abiacaje prakłaści 87 kilametraŭ čyhunki ad vioski Ruškievičy da Mazyra, 15 kilametraŭ tramvajnych rejek ad Mazyra da Naroŭli, pabudavać stadyjon u miastečku Jelsk i zavieršyć budaŭnictva cahielni ŭ Mazyrskim rajonie. Ale ci zdoleje jon ich ažyćciavić, zaležyć ad supiernikaŭ. Ich dva — pradstaŭnik ad apazycyi, siabra AHP i staršynia Jelskaha rajvykankama. Hałoŭnym kankurentam na deputacki mandat palityk ličyć kiraŭnika vykankama. Kaža, u jaho ŭ rukach vialiki administracyjny resurs, jaki jon nie saromiejecca vykarystoŭvać.
Siarhiej Kaścian: «Učora pradstaŭniku majoj inicyjatyŭnaj hrupy ŭ saŭhasie‑kambinacie «Kamienka», staršynia hetaha kambinata ŭziaŭ dy parvaŭ paśviedčańnie».
Abiacać vybarščykam Dnieprabuhskaj vybarčaj akruhi №10 niešta kankretnaje pabudavać albo niešta dać, deputat Uładzimir Zdanovič ličyć niemetazhodnym. Kaža, pakul dajedzieš z rajona da stalicy, moža niešta pamianiacca i vykanać abiacanaje nie atrymajecca. Budzie niajomka pierad vybarščykami. Tamu, kab nie było niajomka, jon addaje pieravahu ahulnym abiacańniam. Uładzimir Zdanovič: «Prahrama takaja, jakaja idzie ad serca: kab kładučysia spać, my byli ŭpeŭnienyja, što ranicaj pračniomsia ŭ spakojnaj dziaržavie, u jakoj niama ni źniešniaj, ni ŭnutranaj vajny. Kab ekanomika pracavała jašče lepš, jašče bolš. Kab u nas zarobak apiaredžvaŭ rost koštaŭ na pradukcyju. I hetak dalej». Supiernikaŭ u deputata poŭny nabor — i praŭładnyja, i apazycyjny.
Deputat Volha Abramava ździviła tym, što jaje pakul absalutna nie cikavić toje, chto budzie jaje supiernikam na vybarach. Volha Abramava: «Ja ŭvohule nie cikaviłasia ni tym, kolki zaraz kandydataŭ u kandydaty pa majoj akruzie, ni tym, adkul jany. Usio heta pakul mianie nie cikavić. Heta lišniaja, niepatrebnaja infarmacyja». Ad siabie jana abiacaje siurpryzy: Volha Abramava: «Ja nie tolki palityk, ale i palittechnolah. Vy bačyli palittechnolaha, jaki raskazvaje pra svaje patencyjnyja metady napiaredadni kampanii? Heta ž davać kozyry svaim kankurentam i apanentam. Navošta ja budu rabić biaspłatnyja padarunki?! Mahu skazać tolki toje, što ni adna maja kampanija nikoli nie padobnaja na papiaredniuju». Svaje šancy na pieramohu deputat aceńvaje jak vielmi vialikija.