Lulka z budaŭnikami sarvałasia z vyšyni ŭ Breście
Bresckim mižrajonnym adździełam Śledčaha kamiteta vyśviatlajucca akaličnaści traŭmiravańnia rabotnikaŭ u vyniku vypadzieńnia z budaŭničaj lulki, paviedamiła BIEŁTA aficyjny pradstaŭnik USK pa Bresckaj vobłaści Maryna Drańkova.
Nadzvyčajnaje zdareńnie adbyłosia 18 maja prykładna ŭ 13.30 padčas kapitalnaha ramontu šmatkvaternaha doma, raźmieščanaha pa bulvary Šaŭčenki, 10. Pavodle papiarednich danych, na ŭzroŭni piataha paviercha abarvaŭsia adzin z trosaŭ, što ŭtrymlivaje budaŭničuju lulku, jakaja ŭpała na kazyrok budynka. U hety momant u joj znachodzilisia try rabotniki RBU №1 filijała AAT «Rambudtrest». Paciarpiełaja 48-hadovaja malar z šmatlikimi pierałomami dastaŭlenaja ŭ Bresckuju abłasnuju balnicu, jaje 28-hadovaja kaleha špitalizavanaja ŭ centralnuju haradskuju balnicu z traŭmaj pazvanočnika i strasieńniem hałaŭnoha mozhu, 20-hadovy ciaślar atrymaŭ udary.
«U ciapierašni čas śledčymi pravodzicca ahlad miesca zdareńnia z pryciahnieńniem śpiecyjalistaŭ Dziaržaŭnaha kamiteta sudovych ekśpiertyz, inśpiekcyi pracy i pradstaŭnikami budaŭničaj arhanizacyi. Dla vyśviatleńnia ŭsich abstavin apytvajucca vidavočcy, kanfiskoŭvajecca słužbovaja dakumientacyja», — dadała aficyjny pradstaŭnik USK.