Tajhier Vuds aryštavany za kiravańnie ŭ pjanym stanie
Tajhier Vuds, suśvietna viadomy hulec u holf, byŭ aryštavany ŭ paniadziełak ranicaj u štacie Fłaryda za kiravańnie aŭtamabilem u niećviarozym stanie, paviedamlaje miascovaja palicyja, piša VVS.
Fota aryštavanaha Vudsa ŭ pastarunku akruhi Pałm-Bič
Pa słovach palicyjantaŭ akruhi Pałm-Bič, Vuds byŭ zatrymany kala troch hadzin ranicy pa miascovym časie ŭ horadzie Džupiter i vypuščany na svabodu paśla poŭdnia.
41-hadovy Tajhier Vuds prachodzić reabilitacyju paśla niadaŭna pieraniesienaj apieracyi na śpinie. 24 maja jon napisaŭ u sacsietkach, što apieracyja pazbaviła jaho ad žachlivaha bolu, i što jon užo daŭno nie adčuvaŭ siabie tak dobra.
Jon dadaŭ, što mahčymaść jaho viartańnia ŭ prafiesijny holf zastajecca adkrytaj, ale što jon nikudy nie śpiašajecca.
«Ja chaču hulać u holf na prafiesijnym uzroŭni, ale ja nie buduju nijakich płanaŭ, — skazaŭ Vuds. — Ja nie zmahu narmalna pavaročvacca jašče miesiacy dva-try miesiacy. Ciapier usia maja ŭvaha nakiravanaja na reabilitacyju i na toje, kab prytrymlivacca ŭsich pradpisańniaŭ lekaraŭ».
Tajhier Vuds — 14-razovy pieramožca turniraŭ «Mejdžar». Za apošnija niekalki hadoŭ halfist pieranios try apieracyi na pazvanočniku. U lutym u jaho adnavilisia prablemy sa zdaroŭjem, u vyniku čaho jamu daviałosia admovicca ad udziełu ŭ turniry ŭ Ahaście.
Tajhier Vuds nie pieramahaŭ na asnoŭnych turnirach z 2013 hoda.
Presa zacikaviłasia jaho asabistym žyćciom jašče ŭ 2009 hodzie, kali jamu byli vystaŭlenyja abvinavačvańni ŭ nieaściarožnym kiravańni aŭtamabilem kala jaho doma ŭ Fłarydzie. Zatym jon pryznaŭsia, što zdradžvaŭ svajoj žoncy, i prynios joj publičnyja prabačeńni. Nakolki viadoma, paśla hetaha jon prajšoŭ sieansy psichałahičnaj dapamohi.
Vuds zarabiŭ svaje miljony nie stolki hulnioj u holf, kolki ad rekłamadaŭcaŭ, mnohija ź jakich pierastali mieć ź im spravu paśla ŭsich hetych skandałaŭ.