Janukoviča buduć sudzić za dziaržzdradu zavočna. Jon admoviŭsia prysutničać na sudzie pa Skype
Abałonski rajonny sud Kijeva vyrašyŭ, što praces pa spravie ab dziaržzdradzie suprać byłoha prezidenta Ukrainy Viktara Janukoviča budzie prachodzić biez padsudnaha, to bok zavočna. Sud vynies takoje rašeńnie, pakolki Janukovič nie źjaviŭsia na druhoje pa liku pasiedžańnie pa sutnaści.
U svaim rašeńni staršynia sudździa Uładzisłaŭ Dziaviatka adznačyŭ, što Janukoviču prapanavali ŭdzielničać pa videakanfierencyi, ale jon admoviŭsia. Havorka idzie pra toje, kab padklučyć Janukoviča pa Skype.
Advakaty byłoha prezidenta admovilisia ad hetaj pracedury, zajaviŭšy, što jana nie prapisanaja aficyjna, a značyć, dokazy abarony mohuć być potym pryznanyja niedapuščalnymi.
Zamiest hetaha, abaroncy paprasili sud nakiravać zapyt u Miniust Rasii dla arhanizacyi telemosta z Rastoŭskim abłasnym sudom. Kijeŭski sud heta rabić admoviŭsia.
Sud nad Janukovičam pa spravie ab dziaržzdradzie pačaŭsia 4 maja 2017 hoda. Byłoha prezidenta abvinavačvajuć u tym, što ŭ razhar pratestnych akcyj u 2014 hodzie jon paprasiŭ Rasiju ŭvieści va Ukrainu vojski.
Sam Janukovič viasnoj 2014 hoda vyjechaŭ u Rasiju, dzie žyvie z tych časoŭ.